يراننىڭ يسفاحان پروۆينتسياسىنداعى يادرولىق نىسان اقش پەن ءيزرايلدىڭ سوققىسىنا ۇشىرادى. بۇل تۋرالى يراننىڭ ISNA اقپارات اگەنتتىگى ەلدىڭ يادرولىق قاۋىپسىزدىك ۇلتتىق ورتالىعىنىڭ مالىمەتىنە سۇيەنە وتىرىپ حابارلادى, دەپ جازادى Egemen.kz.
بۇعان دەيىن يران بيلىگى 1 ناۋرىزدا قارسى تاراپ ناتانز قالاسىنداعى يادرولىق نىسانعا ەكى مارتە سوققى جاساعانىن مالىمدەگەن. بۇل جەردە ۋران بايىتۋ زاۋىتى ورنالاسقان. الايدا سول كەزدە دە رادياتسيالىق اعىپ كەتۋ دەرەگى تىركەلمەگەن.
ەسكە سالايىق, 28 اقپاندا اقش پەن يزرايل يرانعا قارسى اسكەري وپەراتسيا باستاعانىن جاريالاعان ەدى. تەل-اۆيۆ بۇل ارەكەتتىڭ ماقساتى تەگەراننىڭ يادرولىق قارۋعا قول جەتكىزۋىنە جول بەرمەۋ ەكەنىن مالىمدەدى. ۆاشينگتون يراننىڭ اسكەري-تەڭىز كۇشتەرى مەن قورعانىس ونەركاسىبىن جويۋ قاۋپىن ايتىپ, ەل ازاماتتارىن بيلىككە قارسى شىعۋعا شاقىردى.
شابۋىلداردىڭ سالدارىنان يراننىڭ جوعارعى كوشباسشىسى اياتوللا ءالي حامەنەي قازا تاۋىپ, ەلدە 40 كۇندىك ازا جاريالاندى.
ءوز اۋماعىنا جاسالعان سوققىلارعا جاۋاپ رەتىندە تەگەران تاياۋ شىعىستاعى اقش-تىڭ وداقتاس ەلدەرىندە ورنالاسقان امەريكالىق نىساندارعا شابۋىل جاساعانى حابارلاندى.