اقتاۋدا «ماڭعىستاۋمۇنايگاز» جۋرناليستەردى قۇتتىقتادى

اقتاۋ. 25 ماۋسىم. «ماڭعىستاۋمۇنايگاز» اكتسيونەرلىك قوعامى جۋرناليستەردى العاش بولىپ قۇتتىقتادى. بۇل تۋرالى  egemen.kz ءتىلشىسى حابارلادى. «ماڭعىستاۋمۇنايگاز» اكتسيونەرلىك قوعامىنىڭ باسشىلىعى جۋرناليستەر كۇنى مەرەكەسى قارساڭىندا ايماقتاعى بىرقاتار جۋرناليستەرمەن كەزدەسۋ وتكىزدى. كەزدەسۋگە كومپانيانىڭ باس ديرەكتورى مىندەتىن اتقارۋشى چجان سيۋەۆەن, باس ديرەكتوردىڭ ءبىرىنشى ورىنباسارى ب.يمانباەۆ جانە كومپانيانىڭ دەپارتامەنت جەتەكشىلەرى قاتىستى. كومپانيانىڭ تىنىس-تىرشىلىگى, جاڭا تەحنولوگيالاردىڭ وندىرىسكە ەنگىزىلۋى, كاسىپوداق ۇيىمىنىڭ جۇمىسى تۋرالى باس ديرەكتوردىڭ ءبىرىنشى ورىنباسارى ب.يمانباەۆ اڭگىمەلەپ بەردى. ايماق بويىنشا مۇنايدىڭ 31 پايىزىن, ال رەسپۋبليكا بويىنشا 8 پايىزىن وندىرەتىن كومپانيا قۇرامىندا 15 مۇناي جانە گاز كەن ورنى بار, ولاردىڭ قالدىقتاعى وندىرىلەتىن قورلارى 157 ملن. توننادان اسادى. وتكەن جىلى «ماڭعىستاۋمۇنايگاز» 6 ملن. 273 مىڭ توننا مۇناي وندىرگەن. جۋرناليستەرمەن كەزدەسۋ وتكىزىپ, ولاردى كاسىبي مەرەكەلەرىمەن قۇتتىقتاۋ «ماڭعىستاۋمۇنايگاز» تاريحىندا العاش رەت وتكىزىلىپ وتىر. بۇل ەكىجاقتى جۇمىستىڭ اشىقتىعىنا, كەدەرگىسىز جولعا قويىلۋىنا ىقپال ەتەدى دەگەن سەنىم بار. گۇلايىم شىنتەمىرقىزى. سۋرەت, دەرەك: egemen.kz.