ەلدىڭ ەڭ ءىرى تەلەكوممۋنيكاتسيالىق وپەراتورى – «قازاقتەلەكوم» اق جاڭا كونستيتۋتسيا جوباسىن تالقىلاۋعا ارنالعان اۋقىمدى ينتەراكتيۆتى تەلەكوپىر ۇيىمداستىردى. بۇل ءىس-شارا بارلىق وڭىردەن قىزمەتكەرلەرگە ناقتى ۋاقىت رەجىمىندە سۇراق قويىپ, رەفورمالاردىڭ ءار وتانداسىمىزدىڭ ومىرىنە اسەرىن تالقىلاۋعا مۇمكىندىك بەردى.
تەلەكوپىرگە تسيفرلىق جانە قۇقىقتىق رەفورمالاردىڭ ارحيتەكتورلارى قاتىستى. پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ جاڭا نورمالار اياسىنداعى تەحنولوگيالىق تاۋەلسىزدىكتىڭ الەۋەتىن ءتۇسىندىردى.
– جاڭا كونستيتۋتسيادا ازاماتتاردىڭ قۇقىقتارى مەن بوستاندىقتارىن قورعاۋ بۇگىنگى زاماننىڭ سۇرانىسى مەن تالابىن ەسكەرە وتىرىپ, جان-جاقتى قامتىلعانىن باسا ايتۋىمىز قاجەت. سونىڭ ىشىندە جاڭا كونستيتۋتسيالىق قۇجاتتا ازاماتتاردىڭ جەكە مالىمەتتەرىنىڭ قاۋىپسىزدىگىنە قۇقىقتىق كەپىلدىكتەر بەرىلەدى. قازىرگى ۋاقىتتا الەم قارقىندى تسيفرلىق وزگەرىستەر كەزەڭىنە قادام باستى. مەملەكەتتىك قىزمەتتەر, قارجى وپەراتسيالارى, ءبىلىم بەرۋ, مەديتسينا جانە الەۋمەتتىك قاتىناستاردىڭ باسىم بولىگى ەلەكتروندى فورماتقا كوشتى. بۇل ازاماتتاردىڭ مۇمكىندىكتەرىن كەڭەيتىپ, قىزمەتتەردىڭ قولجەتىمدىلىگىن ارتتىرعانىمەن, جاڭا قاۋىپتەردى دە قاتار الىپ كەلەدى. وسىعان بايلانىستى تسيفرلىق داۋىردە دەربەس دەرەكتەردى قورعاۋ ماسەلەسى ەرەكشە ماڭىزعا يە بولىپ وتىر. كونستيتۋتسيالىق دەڭگەيدە دەربەس دەرەكتەردىڭ قورعالۋىنا ەرەكشە ءمان بەرۋ تسيفرلىق كەڭىستىكتە قاۋىپسىز قۇقىقتىق ورتا قالىپتاستىرادى. سوندىقتان ءار ازاماتتىڭ بۇل تاريحي وزگەرىستەرگە جاۋاپكەرشىلىكپەن قاراپ, ەلدىك, مەملەكەتشىلدىك ۇستانىمىن تانىتۋى ارقايسىمىزدىڭ ەل بولاشاعىنا قوسقان ناقتى ۇلەسىمىز بولماق, – دەدى ج.ماديەۆ.
جالپى العاندا, تسيفرلاندىرۋ ۇدەرىسىن قۇقىقتىق تۇرعىدان بەكىتۋ – بولاشاققا جاسالعان ماڭىزدى قادام. ول ەلدىڭ قاۋىپسىز دامۋىن قامتاماسىز ەتىپ, ازاماتتاردىڭ قۇقىقتارىن قورعاۋدى جاڭا دەڭگەيگە كوتەرەدى. بۇل باعىتتاعى وزگەرىستەر قازاقستان قوعامىنىڭ زاماناۋي, قاۋىپسىز ءارى ادىلەتتى بولاشاعىنا جول اشادى.
ءماجىلىس دەپۋتاتتارى, قوعام قايراتكەرلەرى مەن قاتىسۋشىلار ازاماتتاردىڭ الەۋمەتتىك-ەكونوميكالىق جاعدايىن جاڭارتۋعا باعىتتالعان باپتاردى دا ەگجەي-تەگجەي تالقىلادى.
– جاڭا كونستيتۋتسيا – تەك قۇقىقتىق قۇجات ەمەس, بۇل مەملەكەتتىڭ دامۋ باعىتىن ايقىندايتىن قۇندىلىقتار جۇيەسى, قوعامدىق كەلىسىم مەن تۇراقتىلىقتىڭ نەگىزى. بۇگىن بەكىتىلەتىن قاعيداتتار ەرتەڭگى قازاقستاننىڭ كەلبەتىن قالىپتاستىرادى. ويتكەنى جاڭا اتا زاڭداعى ۇسىنىلىپ وتىرعان بارلىق وزگەرىس مەملەكەتىمىزدىڭ ساياسي جۇيەسىن جاڭعىرتىپ, ازاماتتاردىڭ تۇرمىس ساپاسىن ارتتىرۋعا, قۇقىقتىق ءتارتىپتى نىعايتۋعا جانە وتانشىلدىق يدەيانى كۇشەيتۋگە باعىتتالعان, – دەدى «قازاقتەلەكوم» اق باسقارما توراعاسى باعدات مۋسين.
«قازاقتەلەكومنىڭ» ساندىق ينفراقۇرىلىمى ارقىلى الىس ايماقتارداعى قىزمەتكەرلەر دە ونلاين رەجىمىندە قاتىسىپ, سپيكەرلەرگە سۇراق قويدى. باسىم كوپشىلىگى جاڭا رەداكتسياداعى جەكە ومىرگە قول سۇقپاۋشىلىق كەپىلدىكتەرى, ازاماتتاردىڭ دەربەس دەرەكتەرىن زاڭسىز جيناۋدان ساقتاۋ جانە پايدالانۋدان قورعاۋ قۇقىعى, سونداي-اق حات الماسۋ, تەلەفون ارقىلى سويلەسۋ جانە بانك سالىمدارىنىڭ قۇپياسى جونىندە ساۋال جولداپ, اقپارات الدى.
تەلەكوپىر قورىتىندىسىندا جاڭا كونستيتۋتسيا قۇقىقتىق ساۋاتتى ارتتىرۋعا, يننوۆاتسيالىق دامۋدى ىلگەرىلەتۋگە جانە مەملەكەت پەن ازاماتتار اراسىندا سەنىم مەن اشىقتىققا نەگىزدەلگەن ساندىق قوعام قالىپتاستىرۋعا جول اشاتىنى ايتىلدى.