ەلدەگى ينجەنەرلىك ينفراقۇرىلىمدى جاڭارتۋ جۇمىسى جاڭا قارقىن الدى. ۇكىمەتتە وتكەن جيىندا ەنەرگەتيكا مەن كوممۋنالدىق سەكتوردى قامتيتىن ۇلتتىق جوبانىڭ جۇزەگە اسۋ بارىسى تالداندى. كورسەتكىشتەر ورىندالماعان جاعدايدا لاۋازىمدى تۇلعالاردىڭ جەكە جاۋاپكەرشىلىگى قارالاتىنى ەسكەرتىلدى.
پرەمەر-ءمينيستردىڭ ورىنباسارى قانات بوزىمباەۆتىڭ توراعالىعىمەن وتكەن وتىرىستا ەنەرگەتيكالىق جانە كوممۋنالدىق سەكتورلاردى جاڭعىرتۋعا ارنالعان ۇلتتىق جوبا پىسىقتالدى. وندا ينفراقۇرىلىمدىق باستامالاردى قارجىلاندىرۋ, ەسەپكە الۋ قۇرالدارىن ورناتۋ, تسيفرلىق شەشىمدەردى ەنگىزۋ شاراسى تالقىلاندى. سۋ جۇيەلەرىن باسقارۋدا جاڭا تەحنولوگيالاردى سىناقتان وتكىزۋگە ارنالعان پيلوتتىق جوبالار دا كۇن تارتىبىنە شىقتى.
قازىر ۇلتتىق جوبا اياسىندا قۇپتالعان باستامالاردىڭ جيىنتىق قۇنى 974 ملرد تەڭگەگە جەتتى. ونىڭ 34-ءى ىسكە اسىرۋ كەزەڭىندە تۇر. تاعى 130 جوبا EPC-مەردىگەرلەردى انىقتاۋ ساتىسىندا. بۇدان بولەك, 145 جوبا ىرىكتەۋدىڭ ءتۇرلى كەزەڭدەرىنەن ءوتىپ جاتىر. بۇل ينفراقۇرىلىمدى جاڭارتۋ ۇدەرىسى كەڭ اۋقىمدا ءجۇرىپ جاتقانىن اڭعارتادى.
وڭىرلەردىڭ جوباعا دايىندىق دەڭگەيى سارالانىپ, ارنايى رەيتينگ ءتۇزىلدى. الدىڭعى قاتاردا الماتى قالاسى, قاراعاندى وبلىسى مەن الماتى وبلىسى كورىندى. ماڭعىستاۋ مەن ۇلىتاۋ وبلىستارى ازىرلىك قارقىنى باياۋ ايماقتار قاتارىندا قالدى. مۇنداي باعالاۋ جۇيەسى جەرگىلىكتى بيلىكتىڭ جاۋاپكەرشىلىك دەڭگەيىن ناقتى ايقىنداۋعا باعىتتالعان.
ۇلتتىق جوبا شەڭبەرىندە كارىزدىك-تازارتۋ قۇرىلىستارىن سالۋ مەن جاڭارتۋ جۇمىستارى دا جالعاسىپ كەلەدى. قازىرگى ساتتە 16 جوبا تولىق ىسكە اسىرۋعا دايىن. تاعى 6 باستاما پىسىقتاۋ كەزەڭىندە تۇر, جەرگىلىكتى اتقارۋشى ورگاندار تۇپكىلىكتى شەشىم قابىلداۋى قاجەت. بۇل نىساندار قالالارداعى ەكولوگيالىق قاۋىپسىزدىك پەن سانيتارلىق جاعدايدى جاقسارتۋعا ىقپال ەتەدى.
«بايتەرەك» حولدينگىنە كەلىپ تۇسكەن وتىنىمدەر سانى مىڭنان استى. ەكىنشى كەزەڭدە جالپى قۇنى 300 ملرد تەڭگەدەن اساتىن 144 جوبا كەلىسىم الدى. ونىڭ 89-ى قازاقستاننىڭ دامۋ بانكى مەن ەكىنشى دەڭگەيلى بانكتەر ارقىلى تىكەلەي كرەديتتەۋ تەتىگىمەن قارجىلاندىرىلادى. 55 جوبا «قازاقستاندىق تۇرعىن ءۇي كومپانياسى» ارقىلى مەملەكەتتىك باعالى قاعازداردى ساتىپ الۋ جولىمەن ماقۇلدانعان.
ۇلتتىق جوبانىڭ ەلەكتروندىق ساتىپ الۋ پلاتفورماسىنا ارنالعان بايلانىس ورتالىعى جۇمىسىن باستادى. ىسكە قوسىلعان ۋاقىتتان بەرى 800-دەن استام ءوتىنىش قابىلدانعان. قازىر پلاتفورمانى Bitrix جۇيەسىمەن بىرىكتىرۋ جۇمىستارى اياقتالۋعا جاقىن. بۇل قادام ساتىپ الۋ راسىمدەرىن جەدەلدەتىپ, قاتىسۋشىلارعا قولايلى تسيفرلىق ورتا قالىپتاستىرۋدى كوزدەيدى.
وتىرىس بارىسىندا قانات بوزىمباەۆ جەلىلەر ۇزىندىعى, قارجىلاندىرۋ كولەمى, وڭىرلىك ءبولىنىس ءتارىزدى ناقتى پارامەترلەر قامتىلعان جوسپار-كەستە بەكىتىلگەنىنە قاراماستان, كەي كورسەتكىشتەردە كەشەۋىلدەۋ بارىن ايتتى. ءار ينديكاتورعا جاۋاپتى مەملەكەتتىك ورگاندار بەلگىلەنگەن. ۆيتسە-پرەمەر ماقساتتى ناتيجەلەرگە قول جەتكىزۋ تۋرالى تولىق ءارى ناقتى مالىمەت ۇسىنۋدى تالاپ ەتتى. ۋاقىت مەجەسى بۇزىلعان جاعدايدا لاۋازىمدى تۇلعالاردىڭ جەكە جاۋاپكەرشىلىگى قارالاتىنى ەسكەرتىلدى. KPI كورسەتكىشتەرىنىڭ ورىندالماۋى باسقارۋ ساپاسىنا تىكەلەي باعا بەرەتىن فاكتور رەتىندە قاراستىرىلادى.