پاۆلوداردا ادەبيەت الەمىنە ەسىمى تانىلا باستاعان جاس اقىن ەلامان قابدىلاشىمنىڭ «بولمىسىمنىڭ بوياۋى» ولەڭدەر جيناعىن جەرگىلىكتى زيالى قاۋىمنىڭ تالداۋى ءوتتى.
كىتاپ مادەنيەت جانە اقپارات مينيسترلىگىنىڭ «جاڭا قازاقستاننىڭ ادەبي-تانىمدىق پانوراماسى» باعىتى بويىنشا 2025 جىلى جارىق كورگەن. اۆتوردىڭ قاراعاندى وبلىسىنا جاساعان شىعارماشىلىق ساپارىنىڭ جەمىسى. اقىن بۇل جيناقتا ءوزىنىڭ ويىن, سەزىمىن, تانىمىن, تۇسىنىگىن, جانىن دالا ديدارىمەن, قالا بەدەرىمەن, تابيعات كورىنىسىمەن استاستىرا جىرلايدى.
جازۋشىلار وداعى وبلىستىق فيليالىنىڭ توراعاسى سەرىك ەلىكباي ەلاماننىڭ شىعارماشىلىعىنا جوعارى باعا بەرىپ, ونىڭ پوەزياسىنان ىشكى قايشىلىق پەن تەرەڭ سىرشىلدىق بايقالاتىنىن اتاپ ءوتتى. ونىڭ پىكىرىنشە, «بولمىسىمنىڭ بوياۋى» – ەرتىس-بايان وڭىرىندەگى كەيىنگى جاس تولقىن اراسىنداعى شوقتىعى بيىك تۋىندى.
«اقىننىڭ ىشكى الەمىندە ۇنەمى قايشىلىقتار بولىپ جاتاتىنىن اڭعارامىز. ءبىر ولەڭىن وقىپ وتىرىپ, ونى مۇڭشىل دەپ ۇعىنساق, ەندى ءبىر جىرىنان سىرشىل اقىن دەپ قابىلدايمىز. ادەبيەتتىڭ تارازىسىنا سالساق, الدىڭعى تولقىن كەيىنگى تولقىنعا بوگەت بولماۋى كەرەك, ال كەيىنگى تولقىن الدىنداعى اعالارىنان اسىپ تۇسۋگە ءتيىس», دەيدى قالامگەر.
كىتاپتى پاراقتاي وتىرىپ, اقىننىڭ پوەزياعا ىزدەنىسپەن كەلگەنىن بايقايمىز. ونداعى ء«الىمحان مەن سۇلتانماحمۇت», «نىقتۇراق», «سايىپقىران» پوەمالارى كىتاپ جۇگىن سالماقتاندىرىپ تۇرعانداي. اقىن تۇيسىك تانىمىن, ءوزىنىڭ ىشكى داۋىس ىرعاعىنا سالىپ, بولمىس بوياۋىمەن سۋرەتتەيدى. ادامنىڭ بولمىسى – جەكە ءبىر الەم. ونى ءالى كۇنگە دەيىن ەشكىم ءدوپ باسىپ تانىعان ەمەس. سول ءبىر ىشكى الەمنىڭ قانداي بولاتىنىن ءارتۇرلى تۇسپەن كەسكىندەپ, ادامنىڭ قۋانىش, وكىنىش, ءۇمىت, سەنىم سەكىلدى ىشكى يىرىمدەرىنە تەرەڭ بويلايدى. ماسەلەن, «قاسىم ۇيىندە. ىشىمە ءۇڭىلۋ» اتتى تسيكلدىك توپتاماسىنا ءوز ىشىنە كوزبەن ەمەس, «كوڭىلمەن ۇڭىلگەنىن» كورەمىز.
ەلامان – ادەبيەتپەن قاتار, جۋرناليستىك قىزمەتتى قاتار الىپ كەلە جاتقان ازامات. بىرنەشە كىتاپتىڭ اۆتورى رەتىندە جازۋشىلار وداعىنىڭ مۇشەلىگىنە قابىلداندى. وتكەن جىلى «شابىت» شىعارماشىل جاستار فەستيۆالىنىڭ لاۋرەاتى اتاندى.
پاۆلودار وبلىسى