بىلتىر ەل ەكونوميكاسىنىڭ كولەمى 300 ملرد دوللارعا جەتتى. وسى كەزەڭدە اكىمشىلىك ايىپپۇلداردان تۇسكەن قارجى دا ايتارلىقتاي ءوستى. الايدا جول-كولىك اپاتتارىنان كەلگەن ادام شىعىنى بۇل كورسەتكىشتەرگە باسقا قىرىنان قاراۋدى تالاپ ەتەدى, دەپ جازادى Egemen.kz.
ادام ءومىرىنىڭ قۇنىن اقشاعا شاقتاۋ – اۋىر ءارى داۋلى تاقىرىپ. دەگەنمەن ەكونوميكالىق سالداردى باعالاۋ ءۇشىن شارتتى ەسەپكە جۇگىنۋگە تۋرا كەلەدى. ەلىمىزدە جان باسىنا شاققانداعى ىشكى جالپى ءونىم ء(ىجو) – شامامەن 15 مىڭ دوللار. ورتاشا ەڭبەك ەتۋ مەرزىمىن 40 جىل دەپ الساق, ءبىر ادامنىڭ ەكونوميكالىق الەۋەتى 600 مىڭ دوللار شاماسىندا.
45 جول اپاتى تىركەلدى: استانا پوليتسياسى جۇرگىزۋشىلەرگە ۇندەۋ جاسادى
2025 جىلى جول اپاتىنان 2 330 ادام كوز جۇمدى. وسى دەرەكتىڭ وزىنەن-اق تەك ءولىم-ءجىتىم سالدارىنان كەلگەن ەكونوميكالىق شىعىن 1,4 ملرد دوللاردان اسادى. بۇل – ايىپپۇل ارقىلى جينالعان قاراجاتتان بىرنەشە ەسە كوپ سوما.
تاۋەلسىز ساراپشى ەرلان كارىموۆ سوڭعى ون جىلداعى احۋالدى «سەرگەك» جۇيەسىنىڭ قايشىلىعى رەتىندە سيپاتتايدى.
«2015 جىلدان 2025 جىلعا دەيىن ايىپپۇل كولەمى 56,8 ملرد تەڭگەدەن 315,6 ملرد تەڭگەگە دەيىن ءوستى, ياعني 5,5 ەسە ارتتى. ال وسى ارالىقتا جول-كولىك وقيعالارىنىڭ سانى 18 917-دەن 36 146-عا دەيىن كوبەيدى», دەيدى ول.
تاكسي قىزمەتى: سالىق كودەكسى جۇرگىزۋشىلەرگە قالاي اسەر ەتەدى؟
باس پروكۋراتۋرا جانىنداعى قۇقىقتىق ستاتيستيكا جانە ارنايى ەسەپكە الۋ ورگاندارىنىڭ مالىمەتى دە ويلاندىرماي قويمايدى. سوڭعى ون جىلدا تىركەلگەن اكىمشىلىك قۇقىق بۇزۋشىلىقتار سانى 17,6 ملن-عا جەتكەن. بۇل – ءتورت ەسە ءوسىم.
«ناتيجەسىندە ەلدەگى ءار ادامعا, ءتىپتى سابيلەردى قوسا ەسەپتەگەندە, ورتا ەسەپپەن ءبىر قۇقىق بۇزۋشىلىقتان كەلەدى. قۇقىق بۇزۋشىلىق جاپپاي قۇبىلىسقا اينالعان جەردە ايىپپۇل تاربيەلەۋ تەتىگى بولۋدان قالادى», دەپ اتاپ ءوتتى ساراپشى.
ماسەلەنىڭ ءتۇپ-توركىنى جازالاۋدىڭ وزىندە ەمەس, الدىن الۋدىڭ السىزدىگىندە جاتىر. ەرلان كاريموۆتىڭ پىكىرىنشە, قازاقستان جول قاۋىپسىزدىگىن جاقسارتۋدى كوزدەسە, تەك ايىپپۇلعا سۇيەنگەن تاسىلدەن باس تارتىپ, Vision Zero – جولداعى ءولىمدى نولگە جەتكىزۋ قاعيداتىنا بەت بۇرۋى كەرەك. كامەرالار ءتارتىپ بۇزعاندى انىقتايدى, بىراق اپاتتى بولدىرمايدى.
جول-كولىك وقيعالارىنىڭ الدىن الۋ: دروندار يەسىز جايىلعان مالدى انىقتايدى
سوندىقتان ساراپشى ناقتى شەشىم ۇسىنادى. ونىڭ ايتۋىنشا, ايىپپۇلدان جينالاتىن 315 ملرد تەڭگەنى ەلدەگى نەگىزگى تراسسالاردا قارسى باعىتتاعى كولىك اعىندارىن بەتون نەمەسە مەتالل توسقاۋىلدارمەن بولۋگە باعىتتاۋ قاجەت.
«مۇنداي قورشاۋلار ماڭدايدان سوقتىعىساتىن اپاتتاردى جويادى. ال ءدال وسى اپاتتار جولداعى ءولىم-ءجىتىمنىڭ نەگىزگى سەبەبى بولىپ وتىر», دەيدى ول.