مەملەكەت باسشىسىنىڭ تاپسىرماسىنا سايكەس, الماتىنىڭ دەنساۋلىق ساقتاۋ سالاسىنا قىزمەت ەتەتىن 32 جاڭا نىساننىڭ قۇرىلىسى مەن 14 مەديتسينالىق مەكەمەنى جاڭعىرتۋ جوباسى جۇزەگە اسىرىلىپ جاتىر. بۇگىن وسى جوبالاردىڭ جايى الماتى قالاسىنىڭ اكىمى دارحان ساتىبالدىنىڭ توراعالىعىمەن وتكەن كەڭەستە قارالدى, دەپ حابارلايدى Egemen.kz.
قۇرىلىس جانە قوعامدىق دەنساۋلىق ساقتاۋ باسقارمالارىنىڭ مالىمەتىنشە, 32 جاڭا نىساننىڭ قۇرىلىسى مەن 14 ەسكى نىساندى جاڭعىرتۋ جوسپارلانعان.
قازىرگى تاڭدا 6 جاڭا نىسان پايدالانۋعا بەرىلسە, 5 نىساندا قۇرىلىس-مونتاج جۇمىستارى جۇرگىزىلۋدە, ال 10 جوبا بويىنشا جوبالىق-سمەتالىق قۇجاتتاما ازىرلەنۋ ۇستىندە. نەگىزگى جوبالاردىڭ قاتارىندا دارابوز شاعىناۋدانىندا 300 ورىندىق كوپبەيىندى اۋرۋحانا مەن 200 ورىندىق پەريناتالدىق ورتالىق سالۋ, سونداي-اق 250 ورىندىق كوپبەيىندى اۋرۋحانا, ونكولوگيالىق ورتالىققا قوسا, ءبىر اۋىسىمدا 350 پاتسيەنت قابىلداي الاتىن ەمحاناسى بار كەشەننىڭ قۇرىلىسى بار.
كەڭەس بارىسىندا جۇمىس ىستەپ تۇرعان مەديتسينالىق ۇيىمداردى كۇردەلى جوندەۋ ماسەلەسى دە جەكە قارالدى. 2025 جىلى 15 دەنساۋلىق ساقتاۋ نىسانى كۇردەلى جوندەۋمەن قامتىلدى.
وتىرىستا جوبالاردى بەلگىلەنگەن مەرزىمدە ىسكە اسىرۋدى قامتاماسىز ەتىپ, سالالىق باسقارمالار اراسىنداعى ۇيلەستىرۋدى كۇشەيتۋ تاپسىرما بەرىلدى.