قۇنارى مول تۇيە ءسۇتى جەرگىلىكتى حالىق اراسىندا جوعارى سۇرانىسقا يە. وسى سۇرانىستى وتەۋ ماقساتىندا وڭىردە جۋىردا قۇرعاق تۇيە ءسۇتىن وندىرەتىن تسەح ىسكە قوسىلدى. جاڭا ءوندىرىس ورنى ءونىمدى ۇزاق مەرزىم ساقتاۋعا مۇمكىندىك بەرىپ, ىشكى نارىقتى ساپالى وتاندىق ونىممەن قامتاماسىز ەتۋگە جول اشادى.
جاڭاوزەن ءسۇت زاۋىتىنىڭ سۋبليماتسيالانعان قۇرعاق تۇيە ءسۇتىن ءوندىرۋ تسەحى – وڭىردەگى ساپالى, قۇنارلى تاعام ۇسىناتىن ماڭىزدى ءوندىرىس ورىندارىنىڭ ءبىرى. «جاڭاوزەن ءسۇت زاۋىتى» جشس تاراپىنان سالىنعان جوبانىڭ جالپى ينۆەستيتسيالىق قۇنى – 148 ملن تەڭگە.
جالپى اۋدانى 500 شارشى مەتردى الىپ جاتقان نىساننىڭ وندىرىستىك قۋاتى جىلىنا 18 توننا ءونىم وندىرۋگە نەگىزدەلگەن. قازىر تسەحتا اشىلعان جاڭا جۇمىس ورىندارىنا ون ەكى ادام جۇمىسقا قابىلداندى. جىل بويى شۇبات ءونىمىن ۇزدىكسىز قامتاماسىز ەتۋدى ماقسات ەتكەن تسەح جالپى شۇبات ءوندىرىسىن ۇلعايتۋ مەن اۋىل شارۋاشىلىعىن قولداۋدى جوسپارلاپ وتىر. زاۋىت 30-عا جۋىق جەكە شارۋا قوجالىعىنان ءبىر جىلدا 68 مىڭ ليتر ءسۇت قابىلداپ كەلگەن, ەندى وسى كولەمدى ەكى ەسەگە ۇلعايتپاق.
– بۇل جاڭا ءوندىرىس ورنى – ءوڭىرىمىز ءۇشىن ماڭىزدى ءارى پايدالى جوبا. جوعارى ساپالى, ەكولوگيالىق تازا ءونىم ءوندىرىسىن دامىتۋ, جاڭا جۇمىس ورىندارىن اشۋ ءارى وتاندىق ءوندىرىستى قولداۋ – ءبىزدىڭ باستى ماقساتىمىز, – دەيدى ءوڭىر باسشىسى ن.قيلىباي.
ەكولوگيالىق تازا ءونىم ءوندىرىسىن جولعا قويۋعا, وتاندىق ءوندىرىستى دامىتۋعا باعىتتالعان زاۋىت ونىمدەرىن ەكسپورتقا شىعارۋدى جوسپارلاپ وتىر. قازىردىڭ وزىندە ونىمدەردى قىتاي مەن ءباا-گە جەتكىزۋ كەلىسسوزدەرى بار.
سالتاناتتى جاعدايدا اشىلعان سوڭ كوپ ۇزاماي جاڭاوزەن قالالىق ءسۇت زاۋىتى ەلىمىزدىڭ اتىنان دۋبايدا وتكەن الەمدەگى ەڭ ءىرى حالىقارالىق ازىق-ت ۇلىك كورمەلەرىنىڭ ءبىرى – «Gulfood» كورمەسىنە قاتىسىپ, ونىمدەرىن حالىقارالىق نارىققا ۇسىندى.
وتاندىق ءونىمدى حالىقارالىق نارىققا شىعارۋ مەن ەكسپورتتىق الەۋەتتى ارتتىرۋ ماقساتىنداعى «Gulfood» كورمەسىنە بيىل 50-دەن استام مەملەكەتتەن ازىق-ت ۇلىك ءوندىرۋشىسى, ديستريبيۋتورلار مەن ءىرى ساۋدا كومپانيالارى قاتىستى. ناتيجەسىندە, جاڭاوزەن قالالىق ءسۇت زاۋىتى ەكولوگيالىق تازا ءسۇت ونىمدەرىن, سونىڭ ىشىندە وڭىردە وندىرىلەتىن ۇلتتىق ونىمدەردى تانىستىرىپ, شەتەلدىك سەرىكتەستەرمەن ىسكەرلىك بايلانىس ورناتۋعا قول جەتكىزدى.
تۇيە جۇنىنەن زاماناۋي جاداعايدى نارىققا شىعارىپ, كوفە دايىنداعان ماڭعىستاۋلىقتار ەندى تۇيە سۇتىنەن ازىرلەنگەن ونىمدەردى شەتەلدىك نارىققا شىعارۋعا قام جاساي باستادى. تۇيەنىڭ ءسۇتى دە, ءجۇنى دە – تۇتىنۋعا قولايلى, ساپالى, قۇنارلى ەكەندىگى عاسىرلار بويى دالەلدەنگەن. ونىڭ ۇستىنە ويسىلقارا ت ۇلىگى – ماڭعىستاۋ تابيعاتىنا ءتوزىمدى ءارى وڭىردە وسىرىلەتىن نەگىزگى مال ءتۇرى ەكەنى دە بەلگىلى. سوندىقتان بۇل ءوندىرىستىڭ پايداسى كول-كوسىر.
ماڭعىستاۋ وبلىسى