ءماجىلىس ءبىرىنشى وقىلىمدا راديواكتيۆتى قالدىقتارمەن جۇمىس ىستەۋ ماسەلەلەرى بويىنشا زاڭ جوباسىن ماقۇلدادى. قۇجاتتار قازاقستان زاڭناماسىن «راديواكتيۆتى قالدىقتارمەن جۇمىس ىستەۋ تۋرالى» زاڭ جوباسىنىڭ نورمالارىنا سايكەستەندىرۋگە جانە وسى سالاداعى مەملەكەتتىك رەتتەۋ تەتىكتەرىن كۇشەيتۋگە باعىتتالعان. مۇندا نەگىزگى ۇعىمدار, وبەكتىلەر مەن سۋبەكتىلەر ايقىندالادى, دەپ حابارلايدى Egemen.kz.
زاڭ جوباسىندا راديواكتيۆتى قالدىقتاردى باسقارۋدىڭ قۇقىقتىق نەگىزدەرى, مەملەكەتتىك باقىلاۋ مەن ليتسەنزيالاۋ ءتارتىبى, سونداي-اق راديواكتيۆتى قالدىقتاردى ەسەپكە الۋ جانە كومۋ ماسەلەلەرى ايقىندالىپ وتىر.
زاڭ جوباسىندا راديواكتيۆتى قالدىقتاردى سىنىپتاۋ بەلگىلەنەدى. ولاردىڭ شىعۋ كوزى, اگرەگاتتىق جاي-كۇيى, بەلسەندىلىك دەڭگەيى, راديونۋكليدتەردىڭ جارتىلاي ىدىراۋ كەزەڭى ولاردى سىنىپتاۋعا نەگىز بولدى. بۇعان قوسا راديواكتيۆتى قالدىقتارمەن جۇمىس ىستەۋ سالاسىنداعى قىزمەتتى جۇزەگە اسىرۋ شارتتارى مەن ءتارتىبى رەگلامەنتتەلدى.
قازاقستان مەن قىتاي راديواكتيۆتى قالدىقتاردى وتكىزبەۋگە قاتىستى زاڭدى قابىلدادى
سونىمەن قاتار زاڭ جوباسىندا راديواكتيۆتى قالدىقتارمەن جۇمىس ىستەۋ جونىندەگى ۇلتتىق وپەراتور ينستيتۋتىن قۇرۋ قاراستىرىلعان. ول راديواكتيۆتى قالدىقتاردى جيناۋ, تاسىمالداۋ, قايتا وڭدەۋ, كومۋ جانە ۇزاق مەرزىمدى مونيتورينگ جۇرگىزۋ سياقتى نەگىزگى فۋنكتسيالاردى اتقارادى. حالىقارالىق تاجىريبە مۇنداي وپەراتورلاردىڭ سالانى قاۋىپسىز ءارى ورتالىقتاندىرىلعان تۇردە باسقارۋعا مۇمكىندىك بەرەتىنىن كورسەتىپ وتىر.
سونداي-اق دەپۋتاتتار نەگىزگى انىقتامالاردى ناقتىلاۋعا باعىتتالعان تۇزەتۋلەر ەنگىزدى, «راديواكتيۆتى قالدىقتار» ۇعىمى وعان جابدىقتاردى, ماتەريالداردى, سونداي-اق تاۋ-كەن ءوندىرىسى قىزمەتىنىڭ قالدىقتارىن قوسا وتىرىپ كەڭەيتىلدى, راديواكتيۆتى قالدىقتار ءتىزىلىمىن جانە جۇمىس ىستەۋ وبەكتىلەرىنىڭ كاداسترىن جۇرگىزۋ ءتارتىبى ەنگىزىلەدى, باستاپقى ەسەپكە الۋ مىندەتى بەكىتىلەدى, سونداي-اق راديواكتيۆتى قالدىقتاردى تۇزۋشىلەردىڭ جاۋاپكەرشىلىگى ناقتىلاندى.