«وتباسى بانك» 2026 جىلدىڭ قازان ايىنان باستاپ يسلامدىق يپوتەكا ءونىمىن ىسكە قوسۋدى جوسپارلاپ وتىر. بۇل تۋرالى بانك باسشىسى ءلاززات يبراگيموۆا Kazinform اگەنتتىگىنە بەرگەن سۇحباتىندا مالىمدەدى, دەپ حابارلايدى Egemen.kz.
قازىرگى ۋاقىتتا بانك يسلام يپوتەكاسىنىڭ تەتىكتەرىن زەرتتەپ جاتىر. ءلاززات يبراگيموۆا بۇل باعىتتىڭ قازاقستاندا بولاشاعى زور ەكەنىن اتاپ ءوتتى. سەبەبى حالىق تاراپىنان مۇنداي قارجى قۇرالدارىنا قىزىعۋشىلىق جوعارى.
ايتا كەتەيىك, ءساۋىر ايىندا قارجى نارىعىن رەتتەۋ جانە دامىتۋ اگەنتتىگى ماجىلىستە «وتباسى بانككە» يسلامدىق قارجىلاندىرۋمەن اينالىسۋ قۇقىعىن بەرەتىن زاڭنامالىق تۇزەتۋلەردى تانىستىرعان بولاتىن.
بانك باسشىسىنىڭ سوزىنشە, زاڭ ماۋسىم ايىنىڭ سوڭىنا دەيىن قابىلدانۋى مۇمكىن. كەيىن ليتسەنزيا راسىمدەۋ جۇمىستارى جۇرگىزىلىپ, جاڭا ءونىم قىركۇيەك نەمەسە 2026 جىلدىڭ 1 قازانىنا دەيىن تانىستىرىلۋى ىقتيمال.
يسلام قارجىلاندىرۋىنىڭ باستى ەرەكشەلىگى – شاريعات تالاپتارىنا سايكەس پايىز ەسەپتەلمەيدى. وسىعان بايلانىستى بانك پايىزسىز دەپوزيتتەر مەن نەسيەلەر ۇسىنۋدى كوزدەپ وتىر.
سونىمەن قاتار يسلام يپوتەكاسىندا باستاپقى جارنا كولەمى ءارتۇرلى بولۋى مۇمكىن. الدىن الا مالىمەت بويىنشا, ول باسپانا قۇنىنىڭ 20-50 پايىزى ارالىعىندا بەلگىلەنەدى. جاڭا يپوتەكا باعدارلاماسى باسقا تۇرعىن ءۇي باعدارلامالارىنان بولەك جۇزەگە اسىرىلادى.
ايتا كەتەيىك, 1 شىلدەدەن باستاپ يپوتەكالىق نەسيەلەر بويىنشا شەكتى مولشەرلەمە باستاپقى جارنا كولەمىنە قاراي بەلگىلەنەدى.
ەندى كوممەرتسيالىق بانكتەر دە تۇرعىن ءۇي-قۇرىلىس جيناقتارى جۇيەسىنە قاتىسىپ, ازاماتتارعا جاڭا يپوتەكالىق ونىمدەر ۇسىنا الادى.