ورتالىق سايلاۋ كوميسسياسى بلوگەرلەردى جاسىرىن ساياسي جارناما جۇرگىزگەنى ءۇشىن جاۋاپكەرشىلىككە تارتۋعا بولاتىنىن مالىمدەدى. بۇل ءۇشىن كانديداتپەن نەمەسە پارتيامەن رەسمي كەلىسىمشارتتىڭ بولۋى مىندەتتى ەمەس, دەپ حابارلايدى Egemen.kz.
ماسەلە سايلاۋ زاڭناماسىنا ەنگىزىلەتىن تۇزەتۋلەردى تالقىلاۋ كەزىندە كوتەرىلدى. ءماجىلىس دەپۋتاتى نيكيتا شاتالوۆ مىسال رەتىندە كوپ وقىرمانى بار بلوگەردىڭ پارتيا سيمۆوليكاسى بەينەلەنگەن كيىممەن ەفيرگە شىعىپ, بەلگىلى ءبىر كانديداتقا اشىق قولداۋ كورسەتۋى مۇمكىن جاعدايدى كەلتىردى. ونىڭ ايتۋىنشا, مۇنداي جاعدايدا بلوگەر اقشا الماۋى دا, رەسمي كەلىسىم جاساماۋى دا ىقتيمال.
ورتالىق سايلاۋ كوميسسياسىنىڭ حاتشىسى شاۆكات وتەمىسوۆ زاڭ بويىنشا ۇگىت-ناسيحات جۇرگىزۋ كانديداتتىڭ نەمەسە پارتيانىڭ جازباشا كەلىسىمىمەن عانا جۇزەگە اسۋى ءتيىس ەكەنىن ءتۇسىندىردى.
ەگەر مۇنداي كەلىسىم بولماسا, وندا بۇل ارەكەت «جاسىرىن ۇگىت» رەتىندە باعالانادى. مۇنداي قۇقىق بۇزۋشىلىق ءۇشىن اكىمشىلىك قۇقىق بۇزۋشىلىق تۋرالى كودەكستىڭ 118-بابى بويىنشا جاۋاپكەرشىلىك قاراستىرىلعان.
سونداي-اق شاۆكات وتەمىسوۆ بلوگەر بۇرىن قانداي دا ءبىر كانديداتپەن نەمەسە پارتيامەن كەلىسىمشارت نەگىزىندە جۇمىس ىستەسە, وندا ول ءوز پلاتفورماسىن باسقا كانديداتتارعا دا تەڭ دارەجەدە ۇسىنۋعا مىندەتتى ەكەنىن ايتتى.
ال ەگەر جاريالانىمدار اقىسىز ءارى رەسمي كەلىسىمسىز جاريالانسا, وندا مۇنداي مىندەت جۇكتەلمەيدى.
ەسكە سالايىق, بلوگەر ەربولات ءجانابىلوۆ پەن جۇبايىنا قاتىستى سوت ۇكىمى شىقتى.
جەتىسۋ وبلىسىندا ەلتاڭبانى قوقىستان الىپ شىققان بلوگەر ايىپپۇل ارقالادى.