پرەمەر-مينيستر ولجاس بەكتەنوۆ ۇكىمەتتىڭ كەڭەيتىلگەن وتىرىسىندا مەملەكەت باسشىسى جۇكتەگەن مىندەتتەردىڭ ورىندالۋ بارىسىن تالقىلاۋ ماقساتىندا ارنايى كەڭەس وتكىزدى. جيىندا پرەزيدەنت تاپسىرمالارىن ىسكە اسىرۋدىڭ ناقتى تەتىكتەرى, مەرزىمدەرى ءارى جاۋاپتى ورگاندار ايقىندالدى.
«مەملەكەت باسشىسى جاڭا كونستيتۋتسيا جوباسىنىڭ ءمانى مەن ماڭىزىنا ارنايى توقتالدى. ۇسىنىلىپ وتىرعان وزگەرىستەردىڭ اۋقىمى كەڭ, ماڭىزى زور. ەڭ باستىسى – تالقىلاۋ ۇدەرىسى اشىق ءوتتى, مۇنداي تاجىريبە ەلىمىزدىڭ تاريحىندا بۇرىن-سوڭدى بولماعان. پرەزيدەنت اتاپ وتكەندەي, جاڭا كونستيتۋتسيادا «ادام مەملەكەت ءۇشىن ەمەس, مەملەكەت ادام ءۇشىن» دەگەن قاعيدات ايقىن كورىنىس تاپتى. كونستيتۋتسيالىق رەفورمانىڭ نەگىزگى ماقساتى – ساياسي جاڭعىرۋمەن قاتار ەكونوميكانىڭ ساپالى ءوسىمىن قامتاماسىز ەتۋ. ياعني ءبىرىنشى كەزەكتە حالىقتىڭ تابىسى مەن ءال-اۋقاتىن ارتتىرۋعا باسىمدىق بەرىلۋى كەرەك. بۇل – ءبىزدىڭ الدىمىزدا تۇرعان اسا ماڭىزدى مىندەت», دەدى وتىرىستى اشقان ۇكىمەت باسشىسى.
ال پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ ايتۋىنشا, تابىستىڭ ءوسۋى, ينفلياتسيانى تومەندەتۋ مەن ناقتى سەكتوردى قولداۋعا باسىمدىق بەرىلەدى. ۇلتتىق بانكپەن بىرلەسىپ, ينفلياتسيا دەڭگەيىن 9–11%-عا دەيىن تومەندەتۋ تۋرالى جوسپار ازىرلەنەتىنى ايتىلدى. 1 مامىرعا دەيىن حالىق تابىسىن ارتتىرۋدىڭ 2026–2029 جىلدارعا ارنالعان باعدارلاماسى قابىلدانادى. سونداي-اق بيزنەستى مەملەكەتتىك قولداۋ شارالارىن EGov Business پلاتفورماسىندا ء«بىر تەرەزە» قاعيداتى ارقىلى دامىتۋ جالعاسادى.
پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ بىرقاتار نەگىزگى تسيفرلىق جوبالاردىڭ جۇزەگە اسىرىلۋ بارىسى تۋرالى باياندادى. اتاپ ايتقاندا, Keden جانە قارجى مينيسترلىگىنىڭ سالىقتىق اكىمشىلەندىرۋ پلاتفورمالارى, سۋ تاسقىنىن بولجاۋعا ارنالعان Tasqyn جۇيەسى, اۆتوجول سالاسىنداعى eJoldar, تاسىمالداۋ باعىتىنداعى Smart Cargo جانە وزگە دە سالالىق تسيفرلىق شەشىمدەر تانىستىرىلدى. سونىمەن قاتار «الەۋمەتتىك ءاميان» مەن ءۇي شارۋاشىلىقتارىنىڭ تسيفرلىق پروفيلدەرىن دامىتۋ جۇمىستارى جالعاسىپ جاتقانى ايتىلدى. الداعى كەزەڭدە مەملەكەتتىك ورگانداردىڭ تيىمدىلىگىن ارتتىرۋ ماقساتىندا اقپاراتتىق جۇيەلەردى بىرىڭعاي QazTech پلاتفورماسىنا كوشىرۋ, كيبەرقاۋىپسىزدىكتى كۇشەيتۋ, سالالىق Data Lake جۇيەلەرى مەن جاساندى ينتەللەكت اگەنتتەرىن قالىپتاستىرۋ جوسپارلانىپ وتىر.
«سامۇرىق-قازىنا» قورىنىڭ باسقارما توراعاسى نۇرلان جاقىپوۆتىڭ سوزىنە سۇيەنسەك, 2026–2030 جىلدارى 27 ملرد دوللاردان استام تىكەلەي شەتەلدىك ينۆەستيتسيا تارتۋ كوزدەلگەن. سونىمەن قاتار تسيفرلاندىرۋدىڭ ناتيجەلەرى, ونىڭ ىشىندە 5 جىل ىشىندە جيىنتىق ەكونوميكالىق اسەرى 1,3 ملرد دوللاردى قۇرايتىن جاساندى ينتەللەكت جوبالارىن ەنگىزۋ ماسەلەسى ءسوز بولدى. پرەمەر-مينيستر قور قۇرىلىمىن ودان ءارى جەتىلدىرۋدى, قاجەت بولعان جاعدايدا جەكەلەگەن كومپانيالاردى بىرىكتىرۋ ارقىلى ترانسفورماتسيالاۋ شارالارىن قاراستىرۋدى تاپسىردى.
قارجى ءمينيسترى ءمادي تاكيەۆتىڭ ايتۋىنشا, ءبىرىنشى جارتىجىلدىقتا تاۋارلاردىڭ ۇلتتىق كاتالوگىن ىسكە قوسۋ جوسپارلانىپ وتىر. سالىقتىق, كەدەندىك اكىمشىلەندىرۋدى تسيفرلىق فورماتقا كوشىرۋ جەدەل ءجۇرىپ جاتىر. ءتيىمسىز شىعىستاردى قىسقارتۋ ماقساتىندا بيۋدجەتتىك باعدارلامالارعا رەۆيزيا جۇرگىزىلەدى. سونداي-اق بيۋدجەت قاراجاتىنىڭ قاداعالانۋى ءۇشىن تسيفرلىق تەڭگەنى قولدانۋ اياسى كەڭەيتىلەدى.
ەنەرگەتيكا ءمينيسترى ەرلان اقكەنجەنوۆ كەلتىرگەن دەرەككە سۇيەنسەك, 2029 جىلعا دەيىن 13,3 گۆت جاڭا قۋات كوزدەرىن ىسكە قوسۋ جوسپارلانعان. سونىمەن قاتار كومىر گەنەراتسياسىن دامىتۋ تۋرالى ۇلتتىق جوبا دايىندالىپ, قوعامدىق تالقىلاۋعا شىعارىلدى, ەلىمىزدىڭ ەنەرگەتيكالىق نەگىزىن نىعايتۋ باعىتىندا جۇمىستار جۇرگىزىلەدى. مۇناي وڭدەۋ جانە مۇناي-گاز حيمياسى سالاسى بويىنشا پرەزيدەنت تاپسىرماسىنا سايكەس, جۇمىس ىستەپ تۇرعان مۇناي وڭدەۋ زاۋىتتارىنىڭ قۋاتىن كەڭەيتۋ جوبالارى بەلگىلەنىپ, جاڭا ءموز سالۋ ماسەلەسىنە دە نازار اۋدارىلدى. 2029 جىلعا دەيىن ءىرى مۇناي-گاز حيمياسى بويىنشا بىرقاتار جوبانى ىسكە قوسۋ جوسپارلانىپ وتىر, «مۇناي-گاز حيمياسى ونەركاسىبى تۋرالى» زاڭ جوباسى ازىرلەنىپ جاتىر.
ونەركاسىپ جانە قۇرىلىس ءمينيسترى ەرسايىن ناعاسپاەۆتىڭ ايتۋىنشا, وتاندىق تاۋار وندىرۋشىلەردىڭ تىزىلىمىندە 5,6 مىڭ كومپانيا تىركەلگەن. اەا قىزمەتىن كەزەڭ-كەزەڭمەن ترانسفورماتسيالاۋ جوسپارلانعان. بۇگىندە اەا-دا وڭدەۋ ونەركاسىبى بويىنشا 4,4 ترلن تەڭگەگە 555 جوبا جۇزەگە اسىرىلدى, 33 مىڭنان استام تۇراقتى جۇمىس ورنى اشىلدى. ونەركاسىپ سالاسىندا تەرەڭ وڭدەۋگە باسىمدىق بەرىلەدى. شيكىزاتتى سىرتقا شىعارۋدى رەتتەۋ جانە جوعارى قايتا بولىنگەن ءونىم ءوندىرۋدى ىنتالاندىرۋ تەتىكتەرى قاراستىرىلىپ وتىر. سونىمەن قاتار ماڭىزدى مينەرالدار سالاسىن دامىتۋ ستراتەگياسى ازىرلەنىپ جاتىر. گەولوگيالىق بارلاۋ باعىتىندا الداعى 3 جىل ىشىندە قارجىلاندىرۋ كولەمىن كەيىنگى 30 جىلدا تارتىلعان ينۆەستيتسيا دەڭگەيىنە جەتكىزۋ جوسپاردا بار.
اۋىل شارۋاشىلىعى ءمينيسترى ايداربەك ساپاروۆ 2026–2030 جىلدارعا ارنالعان مال شارۋاشىلىعىن دامىتۋ تۋرالى كەشەندى جوسپاردى ىسكە اسىرۋعا ءارى سالانى جەڭىلدەتىلگەن قارجىلاندىرۋ اياسىن كەڭەيتۋگە باسىمدىق بەرىلەتىنى تۋرالى باياندادى. ۆەتەرينارلىق قاۋىپسىزدىكتى كۇشەيتۋ مەن باقىلاۋدىڭ تسيفرلىق قۇرالدارىن ەنگىزۋ مىندەتتەرى بولەك ايقىندالعان. قايتا وڭدەۋ جانە تاماق ونەركاسىبىندە 2026 جىلدان باستاپ ينۆەستيتسيالىق سۋبسيديالار ۇلعايتىلىپ, قوسىلعان قۇن سالىعى تومەندەتىلەدى. سونداي-اق شيكىزاتتى قايتا وڭدەۋ مەن تەرەڭ وڭدەۋگە باعىتتالعان جاڭا جوبالاردى ىسكە قوسۋ ءۇشىن قوسىمشا ىنتالاندىرۋ شارالارى ەنگىزىلەدى.
وقۋ-اعارتۋ ءمينيسترى جۇلدىز سۇلەيمەنوۆا ءبىلىم بەرۋ سالاسىن قارجىلاندىرۋ تەتىكتەرىن جەتىلدىرۋ تۋرالى ۇسىنىستارىن تانىستىردى. پرەزيدەنت تاپسىرمالارىن ورىنداۋ شەڭبەرىندە جەكەمەنشىك مەكتەپتەردى قارجىلاندىرۋ وڭىرلىك قاجەتتىلىككە سايكەس باسىم جوبالارعا باعىتتالادى. ولاردىڭ مەملەكەتتىك ستاندارتتارعا سايكەستىگىن باقىلاۋ كۇشەيتىلەدى. مەكتەپكە دەيىنگى ۇيىمداردى ۆاۋچەرلىك قارجىلاندىرۋ تەتىگىنىڭ ناتيجەلەرى دە ۇسىنىلدى. 2025 جىلدىڭ قورىتىندىسى بويىنشا بۇل جۇيە 25,7 ملرد تەڭگە ۇنەمدەۋگە مۇمكىندىك بەرگەن. الداعى كەزەڭدە اتالعان تەتىك كەزەڭ-كەزەڭىمەن كەڭەيتىلەدى.
ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتاەۆتىڭ ايتۋىنشا, قازىر بىرىڭعاي تسيفرلىق الەۋمەتتىك قورعاۋ پلاتفورماسى نەگىزىندە الەۋمەتتىك قىزمەتتەردى تولىق تسيفرلاندىرۋ مەن قولداۋ تەتىكتەرىن پرواكتيۆتى فورماتقا كوشىرۋ ءۇشىن دەرەكتەردى دايىنداۋ جۇمىستارى جۇرگىزىلۋگە ءتيىس. سونىمەن قاتار ەڭبەك نارىعىن جاڭارتۋ مىندەتى قويىلدى. مەملەكەتتىك-جەكەشەلىك ارىپتەستىك اياسىندا ۇلتتىق ماماندىقتار ترانسفورماتسياسى ورتالىعىن قۇرۋ جوسپارلانىپ وتىر.
دەنساۋلىق ساقتاۋ ءمينيسترى اقمارال ءالنازاروۆا بىرىڭعاي مەملەكەتتىك مەديتسينالىق اقپاراتتىق جۇيەنىڭ قۇرىلعانىن حابارلادى. بۇل جۇيە دەنساۋلىق ساقتاۋ سالاسىنداعى بارلىق ءىت شەشىمدەردى بىرىكتىرىپ, قىزمەت كورسەتۋ ۇدەرىستەرىنىڭ اشىقتىعىنا باعىتتالعان. اتالعان جۇيە مەن دەنساۋلىق ساقتاۋ پورتالى 2026 جىلعى 1 جەلتوقساندا ىسكە قوسىلادى. امبۋلاتورلىق ءدارى-دارمەكپەن قامتاماسىز ەتۋ سالاسىندا «الەۋمەتتىك ءاميان» تەتىگى كەڭىنەن قولدانىلىپ كەلەدى. 2025 جىلى وسى جۇيە ارقىلى 13,8 ملن-نان استام رەتسەپت بەرىلگەن, بۇل جالپى كولەمنىڭ 82%-ىن قۇرايدى.
كولىك ۆيتسە-ءمينيسترى ماقسات قالياقپاروۆتىڭ ايتۋىنشا, 2026 جىلى ترانزيت كولەمىن 55 ملن تونناعا دەيىن جەتكىزۋ كوزدەلگەن, بۇل 65%-دىق ءوسىمدى بىلدىرەدى. بىرقاتار ءىرى ينفراقۇرىلىمدىق جوبالاردى اياقتاۋ جوسپارلانعان. رەسەي فەدەراتسياسى جانە قىتاي حالىق رەسپۋبليكاسىمەن شەكارالىق ينفراقۇرىلىمدى ۇيلەستىرۋ جۇمىستارى جالعاسىپ جاتىر. «قتج» جول كارتاسى مەن جاڭا تاريفتىك ساياسات بەكىتىلدى. اۆتوجول سالاسىندا قىزىلوردا, سارىاعاش جانە رۋدنىي قالالارىندا 3 اينالما جولدىڭ قۇرىلىسى باستالادى, 33 وتكىزۋ پۋنكتى جاڭعىرتىلىپ جاتىر. جاساندى ينتەللەكت شەشىمدەرىن ەنگىزۋ اياسىندا Smart Cargo پلاتفورماسىن مەملەكەتتىك جانە سالالىق سەرۆيستەرمەن ىقپالداستىرۋ جالعاسادى. 2027 جىلعا دەيىن ءبىرتۇتاس ينتەللەكتۋالدى كولىك ەكوجۇيەسىن قالىپتاستىرۋ جوسپارلانعان.
جيىن قورىتىندىسىندا پرەمەر-مينيستر ولجاس بەكتەنوۆ پرەزيدەنت بەلگىلەگەن بارلىق مىندەتتەر حالىق پەن بيزنەسكە ناقتى ناتيجە بەرۋگە ءتيىس ەكەنىن ايتتى. ونىڭ ايتۋىنشا, قابىلدانعان شەشىمدەر قاعاز جۇزىندە قالماي, ءىس جۇزىندە ورىندالۋى قاجەت. وسىعان بايلانىستى بىرقاتار ناقتى تاپسىرمالار جۇكتەلدى.
«كورىپ وتىرعانىمىزداي, الدىمىزدا تۇرعان ماقسات-مىندەتتەردىڭ اۋقىمى وتە ۇلكەن. مەملەكەت باسشىسى اتاپ وتكەندەي ويلانىپ-تولعانۋعا ۋاقىت جوق. باتىل, ءتيىمدى شەشىم قابىلداپ, ونى جەدەل جۇزەگە اسىرۋ قاجەت. حالىقتىڭ تابىسى مەن ءال-اۋقاتىن ارتتىرۋ – اتقارىلاتىن جۇمىستىڭ ناقتى ناتيجەسى بولۋعا ءتيىس. مەملەكەتتىك ورگاندار مەن اكىمدىكتەر پرەزيدەنت تاپسىرمالارىنىڭ ساپالى ءارى ۋاقتىلى ورىندالۋىن قامتاماسىز ەتۋى كەرەك», دەپ قورىتىندىلادى ۇكىمەت باسشىسى.