الماتى وبلىسىندا ءبىر وتباسى ءۇيىن كۇن پانەلدەرى ارقىلى جىلىتىپ وتىر

ءتىپتى ەلدى مەكەندە ەلەكتر قۋاتى ۋاقىتشا وشىرىلگەن جاعدايدا دا «جاسىل» تەحنولوگيالاردىڭ ارقاسىندا ولاردىڭ ءۇيى جارىقپەن جانە ىستىق سۋمەن ۇزدىكسىز قامتىلادى.  

بۇل جوبانى كاسىپكەر تەمىرحان جاڭاباەۆ ەكى جىل بۇرىن قولعا العان. العاشقى كەزەڭدە ءۇي شاتىرىنا 24 كۇن پانەلى ورناتىلىپ, سونىڭ ناتيجەسىندە ورتالىق جەلىدەن تۇتىنىلاتىن ەلەكتر ەنەرگياسى 90 پايىزعا دەيىن ازايتىلعان. كاسىپكەردىڭ ايتۋىنشا, كۇن پانەلدەرىنىڭ قىزمەت ەتۋ مەرزىمى 25 جىلعا دەيىن جەتەدى. باستاپقى ينۆەستيتسيانى قاجەت ەتكەنىمەن, پانەلدەر بەرىك شىڭدالعان اينەكتەن جاسالعان جانە اۋا رايىنىڭ قولايسىز جاعدايلارىنا ءتوزىمدى.

شىعىستا جىلۋ جۇيەسىنە كۇن ەنەرگياسى تەحنولوگيالارى ەنگىزىلىپ جاتىر

قازىرگى ۋاقىتتا شارۋاشىلىقتا قۋاتى 670 ۆاتت بولاتىن 42 كۇن پانەلى جۇمىس ىستەيدى. جالپى وندىرىلەتىن قۋات كولەمى ساعاتىنا شامامەن 30 كيلوۆاتتى قۇرايدى. بۇدان بولەك, ۇيدە تەك كۇن ەنەرگياسىمەن جۇمىس ىستەيتىن, سىيىمدىلىعى 250 ليترلىك سۋ جىلىتقىش ورناتىلعان. ارنايى جىلۋ ساقتاۋ جۇيەسىنىڭ ارقاسىندا كۇندىز قىزدىرىلعان سۋ تاۋلىك بويى ءوز جىلۋىن ساقتايدى.

تاۋلى ايماقتىڭ ەتەگىندە ورنالاسۋى دا ەنەرگيا ءوندىرۋ تيىمدىلىگىنە وڭ اسەرىن تيگىزىپ وتىر. تەمىرحان جاڭاباەۆتىڭ ايتۋىنشا, كۇن پانەلدەرى وتباسى ءۇشىن قوسىمشا تابىس كوزىنە اينالعان. كۇن سايىن شامامەن 25 كيلوۆاتت ارتىق ەلەكتر ەنەرگياسى «الاتاۋ جارىق كومپانياسىنا» ساتىلىپ, سالىنعان 5 ميلليون تەڭگە ينۆەستيتسيانىڭ جارتىسىنا جۋىعى قايتارىلعان.

جاز ايلارىندا كۇن ساۋلەسىنىڭ مولدىعىنا بايلانىستى اي سايىنعى تابىس 200 مىڭ تەڭگەگە دەيىن جەتسە, قىس مەزگىلىندە بۇل كورسەتكىش 50-60 مىڭ تەڭگە شاماسىندا بولادى.

الداعى جوسپاردا كاسىپكەر بۇرىن الما باعى بولعان 1,5 گەكتار جەر تەلىمىنە قوسىمشا كۇن پانەلدەرىن ورناتۋدى كوزدەپ وتىر. قولدانىستاعى زاڭناما تاۋلىگىنە 200 كيلوۆاتتقا دەيىن ەلەكتر ەنەرگياسىن ساتۋعا مۇمكىندىك بەرەدى, بۇل جوبانى كەڭەيتۋگە جول اشادى.

كۇن ەنەرگياسىمەن جۇرەتىن ياحتا

مۇنداي باستامالار ەڭبەكشىقازاق اۋدانىندا «جاسىل» ەنەرگەتيكانى دامىتۋعا جانە اۋىلدىق جەرلەردەگى ەنەرگيا تيىمدىلىگىن ارتتىرۋعا ايتارلىقتاي ۇلەس قوسادى.