اقتوبە. 25 ماۋسىم. اقتوبەدە الاياقتىعى ءۇشىن ەكى مارتە اباقتىعا وتىرىپ شىققان 38 جاستاعى قىلمىسكەر تاعى دا تەمىر تورعا قامالدى. بۇل تۋرالى egemen.kz ءتىلشىسى حابارلادى.
تەرگەۋ بارىسىندا دىنمۇحامبەت ءادىلشىنوۆتىڭ بۇعان دەيىن الاياقتىق جاساعانى ءۇشىن ەكى رەت اباقتىعا وتىرىپ, 10 جىل جازاسىن وتەپ شىققانى انىقتالدى. بىراق, بۇل وعان ساباق بولماعان. ەندى ونىڭ قونىس كولونياسىندا ءجۇرىپ-اق اقتوبەدەگى «بيوس» مەديتسينا ورتالىعىنىڭ دارىگەرىن الداپ سوققانى اشكەرەلەنىپ وتىر.
باستاپقىدا ول ءوزىنىڭ Toyota Land Cruiser ماركالى اۆتوكولىگىن دارىگەردىڭ زاۋىتتان 1995 جىلى شىققان Mitsubishi Pajero كولىگىنە ۇستەمە اقىمەن اۋىستىرۋعا كوندىرەدى. كەيىن بوكەنباي باتىر كوشەسىندەگى ۇيلەردىڭ بىرىنەن پاتەر الۋعا ۇسىنىس جاسايدى. دارىگەردىڭ 5 440 مىڭ تەڭگەگە جۋىق قاراجاتىن جىمقىرعان ول ۋادەسىنىڭ بىردە-بىرەۋىن ورىنداماعان. تەرگەۋ كەزىندە الاياقتىڭ دارىگەردىڭ اقشاسىن ءوز قاجەتتىلىگىنە جۇمساعاندىعى ءمالىم بولدى. ال كولىكتى تانىسىنا قارىزىن وتەۋ ءۇشىن بەرىپ جىبەرگەن.
بۇدان بولەك الاياق 36 جاستاعى ەسەپشىنى الداپ, تاقىرعا وتىرعىزىپ كەتكەن. تانىسىنىڭ سەنىمىنە كىرگەن ول 3 ميلليون تەڭگەگە ارزان پاتەر الىپ بەرمەك بولادى. الايدا, كەلىسىلگەن اقشانىڭ تەڭ جارتىسىن العان ول ءوز سوزىندە تۇرماعان. №2 اقتوبە قالالىق سوتىنىڭ سۋدياسى راۋيا كۋستانوۆا ونى 6 جىل 6 ايعا باس بوستاندىعىنان ايىرۋعا ۇكىم شىعاردى. الاياقتىقتىڭ اقىرى وسىلاي بىتەرى بەسەنەدەن بەلگىلى. ەندى ول وسىنشاما ۋاقىتىن تەمىر توردىڭ ار جاعىندا وتكىزەتىن بولادى.
ساتىبالدى ءساۋىرباي.
دەرەك: egemen.kz.
سۋرەت: tengrinews.kz.