بۇگىن مەملەكەت باسشىسى قاسىم-جومارت توقاەۆ ۆولونتەرلەر فورۋمىندا ءسوز سويلەدى. پرەزيدەنت ءوز سوزىندە ەرىكتى بولۋ – وتانىڭا ادال قىزمەت ەتۋ, تۋعان جەرىڭە جاناشىر بولۋ ەكەنىن اتاپ ءوتتى, دەپ جازادى Egemen.kz.
قاسىم-جومارت توقاەۆ الدىمەن جينالعانداردى ۆولونتەرلەر فورۋمىنىڭ اشىلۋىمەن قۇتتىقتادى.
«بۇل – شىن مانىندە ەرەكشە باسقوسۋ. ءبارىڭىز دە بۇگىنگى فورۋمعا ەلىمىزدىڭ ءار ايماعىنان كەلىپ جاتسىزدار. مەن سىزدەردى قوعام يگىلىگى ءۇشىن قىزمەت ەتىپ جۇرگەن قازاقستاننىڭ ناعىز وتانشىل, جاسامپاز جانە قامقور جاستارى دەپ سانايمىن. بيىل بۇكىل الەم حالىقارالىق ەرىكتىلەر جىلىن اتاپ وتۋدە. وزدەرىڭىز بىلەسىزدەر, بۇل باستامانى مەن بىرىككەن ۇلتتار ۇيىمىنىڭ 75-ءشى سەسسياسىندا كوتەردىم. ەلىمىزدىڭ ۇسىنىسى جاھاندىق اۋقىمدا قولداۋ تاپتى. ءبىز وركەنيەتتى ەل رەتىندە كۇللى ادامزاتقا ورتاق قۇندىلىقتاردى دارىپتەيمىز, ونى كەلەشەك ۇرپاققا امانات ەتەمىز.
ەرىكتى بولۋ – يگى ىستەر جاساۋ, جاقسىلىق ىستەپ, باسقاعا ۇلگى كورسەتۋ, وتانىڭا ادال قىزمەت ەتۋ, تۋعان جەرىڭە جاناشىر بولۋ دەگەن ءسوز.
نيەتى ءتۇزۋ, جانى تازا ادامدار وسى جولدى تاڭدايدى, ەرىكتىلەر قاتارىنا قوسىلىپ, قاجىرلى ەڭبەك ەتەدى. ەرىكتىلەردى وزىق ويلى قوعامنىڭ ايناسى دەپ ايتساق, ارتىق بولمايدى», دەدى مەملەكەت باسشىسى.
ەسكە سالايىق, بۇگىن پرەزيدەنت يسپانيا كورولى VI فەليپەنى تۋعان كۇنىمەن قۇتتىقتاپ, جەدەلحات جولدادى.