د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتى Horizon Europe باعدارلاماسىنىڭ كونكۋرستىق ىرىكتەۋىندە جەڭىسكە جەتتى. اتالعان باعدارلاما – ەۋروپالىق وداقتىڭ ەڭ ءىرى ءارى جوعارى باسەكەگە قابىلەتتى عىلىمي-زەرتتەۋ جانە يننوۆاتسيالىق قۇرالى سانالادى, دەپ حابارلايدى Egemen.kz.
تيتان, بەريللي رەسۋرستارى زەرتتەلەدى
ۋنيۆەرسيتەت TiBeRIUM (Titanium and Beryllium for European Resilience and Innovative Utilization of Minerals) حالىقارالىق جوباسىنىڭ قاتىسۋشىلارى قاتارىنا ەندى.
TiBeRIUM جوباسى سىني ماڭىزى بار شيكىزاتتى جەتكىزۋدىڭ ورنىقتى تىزبەكتەرىن قالىپتاستىرۋعا جانە وزىق «جاسىل» وڭدەۋ تەحنولوگيالارىن ەنگىزۋگە باعىتتالعان. قازاقستان مەن وزبەكستاندا العاش رەت وسىنداي فورماتتا تيتان مەن بەريللي رەسۋرستارى كەشەندى تۇردە زەرتتەلمەك. اتالعان مەتالدار ەۋروپالىق وداقتىڭ سىني ماڭىزى بار ماتەريالدار تىزىمىنە ەنگىزىلگەن جانە جوعارى تەحنولوگيالاردىڭ دامۋىنا, ونەركاسىپتىك تۇراقتىلىق پەن تەحنولوگيالىق ەگەمەندىككە تىكەلەي اسەر ەتەدى.
جوبا – 25 سەرىكتەستىكتى بىرىكتىرەدى
جوبا كونسورتسيۋمى گەرمانيا, گرەكيا, كيپر, ۇلىبريتانيا, نورۆەگيا, يسپانيا, پولشا, بەلگيا, بولگاريا, فينليانديا, قازاقستان, وزبەكستان ەلدەرىنەن 25 سەرىكتەستىكتى بىرىكتىرەدى. جوبانىڭ ۇيلەستىرۋشىسى – گەرمانياداعى فرايبەرگ تاۋ-كەن اكادەمياسى تەحنيكالىق ۋنيۆەرسيتەتى. قازاقستان تاراپىنان جوباعا د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتى, «Tenir Group» جشس جانە ء«ۇلبى مەتاللۋرگيالىق زاۋىتى» اق قاتىسىپ جاتىر.
اتالعان جوبا شەڭبەرىندە قازاقستان شيكىزات جەتكىزۋشى رەتىندە عانا ەمەس, عىلىمي زەرتتەۋلەر, تەحنولوگيالىق ازىرلەمەلەر جانە ەكولوگيالىق تۇرعىدان ءتيىمدى قايتا وڭدەۋ باعىتتارى بويىنشا تولىققاندى ارىپتەس رەتىندە قاتىسادى. بۇل – ء«وندىرۋ – ەكسپورتتاۋ» مودەلىنەن «عىلىم – تەحنولوگيا – كادرلار – قوسىلعان قۇن» مودەلىنە كوشۋ جولىنداعى ناقتى قادام.
وتاندىق عىلىم الەمدىك دەڭگەيدە باسەكەگە قابىلەتتى
TiBeRIUM جوباسىنا قاتىسۋ وزىق حالىقارالىق تەحنولوگيالاردىڭ ترانسفەرىن, قولدانبالى عىلىمدى جانە الەمدىك دەڭگەيدەگى ينجەنەرلىك قۇزىرەتتەردى دامىتۋدى, زەرتتەۋشىلەر مەن ينجەنەرلەردىڭ جاڭا بۋىنىن دايارلاۋدى, قازاقستاننىڭ سىني ماڭىزى بار ماتەريالداردىڭ جاھاندىق جەتكىزۋ تىزبەكتەرىندەگى ءرولىن كۇشەيتۋدى كوزدەيدى.
ۋنيۆەرسيتەت وكىلدەرىنىڭ ايتۋىنشا, Horizon Europe باعدارلاماسى شەڭبەرىندەگى باسەكەلەستىك وتە جوعارى, زەرتتەۋلەردىڭ ساپاسىنا جانە جوبالاردى باسقارۋعا قويىلاتىن تالاپتار قاتاڭ, ءارى گەوگرافيالىق ارتىقشىلىقتار قاراستىرىلمايدى. وتاندىق ۋنيۆەرسيتەتتىڭ وسى ىرىكتەۋدەن ءوتۋى وتاندىق عىلىمنىڭ الەمدىك دەڭگەيدە باسەكەگە قابىلەتتى ەكەنىن ايقىن كورسەتەدى.