بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ توراعاسى مادينا ابىلقاسىموۆا 2025 جىلعى 25 جەلتوقساندا سەنات كۋلۋارىندا ايتتى, دەپ حابارلايدى Egemen.kz.
ونىڭ ايتۋىنشا, ەلىمىزدىڭ بانك جۇيەسى تۇراقتى ءارى سەنىمدى كۇيدە.
«بانك جۇيەسىندە كاپيتال قورى جەتكىلىكتى دەڭگەيدە قالىپتاسقان. كاپيتالدىڭ جەتكىلىكتىلىك دەڭگەيى 2,7 پايىزدى قۇرايدى, ال ەڭ تومەنگى تالاپ – 8 پايىز. ياعني, وتىمدىلىك پەن كاپيتالدىڭ ايتارلىقتاي قورى بار, سوندىقتان بانكتەردىڭ بانكروتقا ۇشىراۋىنا ەشقانداي العىشارت جوق», دەدى اگەنتتىك توراعاسى.
مادينا ابىلقاسىموۆانىڭ مالىمەتىنشە, قازىرگى تاڭدا قاداعالاۋ جۇيەسى بانكتىك سەكتوردا تاۋەكەلدەردىڭ الدىن الۋعا باعىتتالعان. وسى ماقساتتا جىل سايىن اكتيۆتەردىڭ ساپاسىنا باعالاۋ جۇرگىزىلەدى, بانكتەردىڭ نەسيە پورتفەلى تەكسەرىلىپ, انىقتالعان شىعىندار بويىنشا ءتيىستى پروۆيزيالار قالىپتاستىرىلادى.
«سونىمەن قاتار بانكتەردىڭ كۇيزەلىس جاعدايلارىنا توزىمدىلىگىن انىقتاۋ ءۇشىن قاداعالاۋ سترەسس-تەستىلەۋى جۇرگىزىلەدى. بۇدان بولەك, بانكتىڭ بيزنەس-مودەلى, كورپوراتيۆتىك باسقارۋ دەڭگەيى جانە باسقا دا تاۋەكەلدەر باعالانادى. وسى باعالاۋلاردىڭ نەگىزىندە جىل سايىن بانكتەر ءۇشىن قوسىمشا قاداعالاۋ كاپيتالى بەلگىلەنەدى. مۇنىڭ بارلىعى بانكروتتىقتىڭ الدىن الۋعا باعىتتالعان», دەپ ءتۇسىندىردى اگەنتتىك باسشىسى.
ول سونداي-اق بانكروت دەپ تانىلعان بانكتەرگە مەملەكەتتىك قولداۋ كورسەتىلمەيتىنىن اتاپ ءوتتى. مۇنداي بانكتەر زاڭناماعا سايكەس مىندەتتى تۇردە تاراتىلۋى ءتيىس.
«قازىرگى ۋاقىتتا ەلىمىزدە توعىز بانك تارالۋ ساتىسىندا تۇر. ولاردىڭ ليتسەنزيالارى 2007-2021 جىلدار ارالىعىندا قايتارىلىپ الىنعان. مەملەكەتتىك قولداۋ تەك قارجىلىق تۇراقتىلىعىن قالپىنا كەلتىرۋگە مۇمكىندىگى بار بانكتەرگە عانا كورسەتىلدى», دەدى مادينا ابىلقاسىموۆا.
ونىڭ ايتۋىنشا, 2017 جىلى قارجىلىق تۇراقتىلىقتى قامتاماسىز ەتۋ باعدارلاماسى قابىلدانىپ, ونىڭ اياسىندا التى بانككە جالپى سوماسى 1,8 ترلن تەڭگە كولەمىندە مەملەكەتتىك قولداۋ كورسەتىلگەن. سونىڭ ىشىندە ءۇش بانك 738 ملرد تەڭگە كولەمىندەگى قاراجاتتى مەرزىمىنەن بۇرىن تولىق قايتاردى. قالعان ءۇش بانك تە مەملەكەتتىك قولداۋدى جوسپارلانعان مەرزىمنەن ەرتە وتەۋدى كوزدەپ وتىر.