مەملەكەت باسشىسى جاپونياعا رەسمي ساپارى بارىسىندا توكيوداعى مەيدجي دجينگۋ سينتو عيباداتحاناسىنا باردى. 1920 جىلى سالىنعان كەشەن يمپەراتورلىق كيەلى ورىن سانالادى. ونىڭ اۋماعىندا 120 مىڭعا جۋىق اعاش پەن جاسىل جەلەگى بار ساياباق ورنالاسقان, دەپ جازادى Egemen.kz اقوردانىڭ ءباسپاسوز قىزمەتىنە سىلتەمە جاساپ.
عيباداتحانا تۇبەگەيلى ساياسي جانە الەۋمەتتىك-ەكونوميكالىق رەفورمالار جۇرگىزۋ ارقىلى جاپونيانى الەمنىڭ دامىعان ەلدەرىنىڭ بىرىنە اينالدىرعان يمپەراتور مەيدجيگە ارنالعان.
كەشەنمەن تانىسقان سوڭ مەملەكەت باسشىسى قۇرمەتتى قوناقتار كىتابىنا جازبا قالدىردى.
«مەيدجي دجينگۋ – بەرەكەلى بىرلىك پەن ۇلتتىق سانا-سەزىمنىڭ سيمۆولى. جاپون حالقى ءۇشىن وسى قاسيەتتى عيباداتحانانىڭ تاريحي ءمان-ماڭىزى ەرەكشە. كۇنشىعىس ەلى ءوسىپ-وركەندەي بەرسىن», دەپ جازدى قاسىم-جومارت توقاەۆ. ايتا كەتەيىك, مەملەكەت باسشىسىنىڭ جاپونياعا العاشقى رەسمي ساپارى يمپەراتور نارۋحيتومەن كەزدەسۋدەن باستالدى. قاسىم-جومارت توقاەۆتى يمپەراتور نارۋحيتو يمپەراتور سارايىندا قارسى الدى.