الماتىداعى يادرولىق فيزيكا ينستيتۋتىندا زەرتتەۋ يادرولىق قوندىرعىلارىن جوبالاۋ, سالۋ مەن پايدالانۋ ماسەلەلەرىنە ارنالعان سەمينار باستالدى. ءىس-شارانى اتوم ەنەرگياسى جونىندەگى اگەنتتىكتىڭ قولداۋىمەن يادرولىق فيزيكا ينستيتۋتى مەن «روساتوم قۇرىلىس تەحنولوگيالارى» كومپانياسى بىرلەسىپ ۇيىمداستىردى.
سەمينار قازاقستان مەن رەسەيدىڭ جەتەكشى ماماندارىن بىرىكتىرىپ, تاجىريبە الماسۋ مەن ەلدىڭ زەرتتەۋ يادرولىق ينفراقۇرىلىمىن ودان ءارى دامىتۋ ماسەلەلەرىن تالقىلاۋ الاڭى بولدى. جيىندى اتوم ەنەرگياسى جونىندەگى اگەنتتىك توراعاسى الماسادام ساتقاليەۆ اشىپ, عىلىمي-زەرتتەۋ بازاسىن جاڭعىرتۋدىڭ ستراتەگيالىق ماڭىزدىلىعىن اتاپ ءوتتى. ول سونىمەن قاتار ونەركاسىپ, اتوم ەنەرگەتيكاسى مەن عىلىمي سەكتوردىڭ دامۋى زاماناۋي تاجىريبەلىك قوندىرعىلاردىڭ قۇرىلۋىن قاجەت ەتەتىنىن ايتتى.
«مەملەكەت باسشىسى اتوم سالاسىنىڭ عىلىمي نەگىزىن نىعايتۋعا ناقتى تاپسىرما بەردى, قولدانىستاعى قوندىرعىلاردى جاڭعىرتىپ, جاڭا قوندىرعىلار قۇرۋدى قامتاماسىز ەتۋ قاجەت. يادرولىق فيزيكا ينستيتۋتىندا زەرتتەۋ رەاكتورىن سالۋ, سونداي-اق ۇلتتىق يادرولىق ورتالىقتا ۇقساس جوبانى جۇزەگە اسىرۋ, زاماناۋي تەحنولوگيالاردى دامىتۋعا, كادرلار دايارلاۋعا ءارى عىلىمي-وندىرىستىك مۇمكىندىكتەردى كەڭەيتۋگە باعىتتالعان ماڭىزدى قادام. ەلىمىز ءارتۇرلى تەحنولوگيالىق شەشىمدەرگە اشىق جانە الەمدىك تاجىريبەنى ەسكەرە وتىرىپ, وڭتايلى كونفيگۋراتسيالاردى قاراۋعا دايىن», دەدى ا.ساتقاليەۆ.
سەمينار اياسىندا يادرولىق فيزيكا ينستيتۋتى مەن «روساتوم قۇرىلىس تەحنولوگيالارى» كومپانياسى اراسىندا ءوزارا تۇسىنىستىك مەموراندۋمىنا قول قويىلدى. قۇجات كوپماقساتتى زەرتتەۋ رەاكتورى مەن زەرتحانالىق كەشەندى بىرلەسىپ جوبالاۋدى, سونداي-اق اتوم ەنەرگياسىن بەيبىت ماقساتتا قولدانۋ سالاسىندا ىنتىماقتاستىقتى كەڭەيتۋدى كوزدەيدى.
«روساتوم قۇرىلىس تەحنولوگيالارى» جشس-نىڭ باس ديرەكتورى يليا ۆەرگيزاەۆ قازاقستاندىق سەرىكتەستەرگە ىنتىماقتاستىقتى نىعايتۋداعى جۇيەلى جۇمىسى ءۇشىن العىسىن ءبىلدىرىپ, جاڭا رەاكتور ەلدىڭ عىلىمي-زەرتتەۋ مۇمكىندىكتەرىن كەڭەيتەتىنىن العا تارتتى.
بۇعان قوسا, ءىس-شارا بارىسىندا قازاقستان رەسپۋبليكاسى مەن «روساتوم قۇرىلىس تەحنولوگيالارى» كومپانياسى اراسىندا يادرولىق عىلىم جانە تەحنولوگيالار ورتالىعىن (ياعتو) قۇرۋ ماسەلەلەرى بويىنشا ىنتىماقتاستىق كەلىسىمىنە قول قويىلدى. قۇجات جوبانى تەحنيكالىق-ەكونوميكالىق نەگىزدەۋدى دايىنداۋ مەن العاشقى ءىس-شارالاردى جۇزەگە اسىرۋ اياسىندا ءوزارا ارەكەتتەسۋدى ماقسات ەتەدى.
ءىس-شارا بارىسىندا ماماندار جاڭا رەاكتوردىڭ تەحنيكالىق تۇجىرىمدامالارى مەن مۇمكىن كونفيگۋراتسيالارىن تانىستىردى, زەرتتەۋ باعىتتارىن, پەرسپەكتيۆالى ماتەريالداردى, زاماناۋي يزوتوپتىق تەحنولوگيالاردى جانە جاڭا عىلىمي نىساندى ىسكە قوسقاندا شەشىلەتىن مىندەتتەردى تالقىلادى.
ءبىرىنشى كۇننىڭ قورىتىندىسى رەتىندە قاتىسۋشىلار بولاشاق زەرتتەۋ رەاكتورىن جوبالاۋ مەن قولدانۋ نۇسقالارى بويىنشا پىكىر الماستىرعان ديسكۋسسيالىق سەسسيا ءوتتى.