اقتوعاي اۋدانى جاڭابەت اۋىلىنىڭ وقۋشىلارىنا اۋدەم جەردەگى مەكتەپكە جەتۋ ناعىز ماشاقات. جاڭبىر جاۋسا, جەر ەزىلىپ مي باتپاققا اينالادى. الايدا جەرگىلىكتى بيلىك اۋىلدىڭ مۇڭىن كوپ جىلدان بەرى ەلەمەي وتىر.
جاڭابەت اۋىلىنىڭ كوشەلەرى كۇزدىڭ جاۋىنىندا مي باتپاققا اينالىپ شىعا كەلەدى. ادام تۇگىلى, كولىك ارەڭ قوزعالادى. كەيبىرەۋلەر بالالارىن مەكتەپكە تراكتورمەن تاسىپ ءجۇر. مۇنداي ماشاقات جازعىتۇرىم قار ەرىگەننەن باستاپ اياز تۇسكەنشە سوزىلاتىن كورىنەدى. جىل سايىن قايتالاناتىن كەلەڭسىز جاعداي اكىمدەردىڭ ەسەپتىك كەزدەسۋلەرىندە ايتىلا-ايتىلا جاۋىر بولعان. ۋادەلەرىن ورىندامايتىن بيلىك وكىلدەرىنە جۇرتتىڭ وكپەسى قارا قازانداي.
– مىناۋ كوشە دەگەننىڭ اتى عانا, ايتپەسە ناعىز تايگانىڭ مي باتپاعى ءتارىزدى. جۇرسەڭ اياعىڭا جابىسىپ, شالىنىپ قۇلايسىڭ. كوكتەم مەن كۇزدە, جازدىڭ جاڭبىرلى كۇندەرى ەزىلىپ كەتەتىنى سونشالىق, اۋىل ىشىندە كولىكپەن عانا جۇرۋگە ءماجبۇر بولامىز. بارىنەن بۇرىن بالالارىمىزعا قيىن. مەكتەپكە بارىپ-كەلۋ ناعىز ماشاقات. كەيبىر كورشىلەرىم بالالارىن تاڭەرتەڭ كولىك جالداپ اپارادى, – دەپ قىنجىلدى اۋىل تۇرعىنى ازامات قوجماعامبەتوۆ.
جاڭاتاپ بولىمشەسىنەن وقۋشىلار اكەلەتىن اۆتوبۋس بۇل جەرگە كەلە المايدى, ۇلكەن كولىك باتىپ قالۋى ىقتيمال. امالسىزدان اۋىل سىرتىنان توقتاپ, بالالار باتپاق كەشىپ جەتەدى. باتپاق ماسەلەسى جاڭاتاپ اۋىلىندا دا بار, اۆتوبۋس مۇندا دا الىستان ايالدايدى. سونىڭ سالدارىنان بىرنەشە اتا-انا بالالارىن مەكتەپكە جىبەرۋدەن باس تارتقان.
وسى ورايدا, تۇرعىندار تىم بولماعاندا كوشە جولدارىنا ۋاقىتشا قيىرشىق تاس توسەپ بەرسە ەكەن دەگەن تىلەكتەرىن جەتكىزدى. جولداردىڭ جالپى ۇزىندىعى ەكى شاقىرىمنان اسپايدى. بۇدان بىرەر جىل بۇرىن اۋىل ازاماتتارى باس قوسىپ, كوشەلەردىڭ جولىنا توپىراق توگىپ, ءوز قولدارىمەن بيىكتەتكەن ەكەن. الايدا قيىرشىق تاس بولماعان سوڭ الگى جاساعاندارى ءبىر جىلعا جەتپەي بۇزىلىپ قالعان. كەيدە جەردىڭ ەزىلىپ كەتەتىنى سونشالىق, اۋىلعا كولىك كىرە الماي, ۇلكەن جولدىڭ بويىنا قاڭتارىپ قويادى. كىرەبەرىس جول دا جوندەۋگە سۇرانىپ تۇر.
انىقتاعانىمىزداي, جاڭابەت اۋىلىنداعى تۇرعىندار سانى 300-ءدىڭ ۇستىندە. مەكتەپتە 71 بالا وقيدى. مۇتكەنوۆ اۋىلدىق وكرۋگىنە قارايتىن ەلدى مەكەننىڭ ادامدارى وزدەرىن شەتتە قالعان ارال تۇرعىندارى رەتىندە سەزىنەتىندەرىن ايتادى. سەبەبى اۋىل يگىلىگىنە جاسالعان جۇمىس جوقتىڭ قاسى. حالىقتىڭ بىرلىگى ايرانداي ۇيىعانىمەن, اۋىل تىرلىگىن جانداندىرا تۇسەتىن, جاستاردىڭ تۇراقتاپ قالۋىنا نەگىز بولاتىن مەملەكەتتىك قولداۋدى سەزىنە الماي وتىر.
اقتوعاي اۋدانىنىڭ بيلىگى جاڭابەتكە اسفالت تۇرماق, قيىرشىق تاس توسەۋدىڭ ءوزى ازىرشە مۇمكىن ەمەس دەيدى. ەڭ اۋەلى جوبالىق-سمەتالىق قۇجاتتاما (جسق) ازىرلەنىپ, سونىڭ قورىتىندىسىنا سايكەس جوندەۋ جۇمىستارىنا كونكۋرس جاريالانۋى كەرەك. ماسەلەنى ءبىر دەمدە شەشىپ بەرە سالاتىن دەمەۋشى جومارت كاسىپكەر تابىلماي وتىرعان كورىنەدى.
– جاڭابەتتەگى ماسەلە بىزگە جاقسى ءمالىم. بىراق وسى ۋاقىتقا دەيىن كوشە جولدارىن جوندەۋ جونىندە جوبا ازىرلەنبەگەن. سول سەبەپتى وعان ازىرشە قاراجات ءبولۋ, ۋاقىتشا شارا رەتىندە قيىرشىق تاس توسەۋ دە مۇمكىن ەمەس. قازىرگى ۋاقىتتا اۋىلدىڭ ورتالىق جانە مەكتەپ ورنالاسقان قوس كوشەسىنە, 500 مەترلىك كىرەبەرىس جولعا اسفالت توسەۋگە قاتىستى جسق ازىرلەۋگە ۇسىنىس جاسالدى, ول كەلەر جىلدىڭ بيۋدجەتىنە ەنگىزىلەدى. بيۋدجەتتە قارالماعان سوڭ, ونداي مۇمكىندىك جاساي المايمىز. جوسپار بويىنشا 2026 جىلى جسق ازىرلەنسە, 2027 جىلى اسفالت توسەلۋى كەرەك. كوشەلەرگە تەك اسفالت توسەلمەيدى, ونىڭ تاباندارى نىعىزدالىپ, سۋ شايىپ كەتپەيتىندەي بەرىك ەتىپ جاسالۋى ءتيىس, – دەپ جاۋاپ بەردى اۋداندىق اكىمدىكتەن.
جالپى, ءوڭىر جۇرتىنىڭ ايتۋىنشا, مۇنداي ماسەلە ەرتىس بويىن قونىس ەتكەن كوپتەگەن اۋىلدا بار. الايدا كوپ جىلدار بويى قوردالانعان ماسەلەنى وبلىس بيلىگى قاپەرىنە الۋعا اسىعار ەمەس.
پاۆلودار وبلىسى,
اقتوعاي اۋدانى,
جاڭابەت اۋىلى