امەريكالىق Netflix پلاتفورماسى فۋتبولدان اعىلشىن پرەمەر-ليگاسىنىڭ ترانسلياتسياسىن كورسەتۋ قۇقىعىن الۋدى كوزدەپ وتىر. الىپ كومپانيا جازىلۋشىلارعا ارنالعان سپورت تۋرالى كونتەنت سانىن كوبەيتكىسى كەلەدى, دەپ جازادى Egemen.kz.
Netflix پلاتفورماسى Champions League ماتچتارىن ۇلىبريتانيادا كورسەتۋ قۇقىعى ءۇشىن بولعان باسەكەدە Paramount+ پلاتفورماسىنان جەڭىلىپ قالعان. سول ءۇشىن دە سپورت باعىتى Netflix ءۇشىن باسىم باعىتقا اينالدى.
ەندى امەريكالىق الىپ كومپانيا نازارىن پرەمەر-ليگاعا بۇردى. پلاتفورما ۇلىبريتانيادا ماتچتاردى كورسەتۋ مۇمكىندىگى ءۇشىن Sky Sports جانە TNT Sports تەلەارنالارىمەن باسەكەگە تۇسپەك. سونىمەن قاتار Netflix ءدال وسى قۇقىق ءۇشىن اقش-تا NBC تەلەكومپانياسىمەن دە جارىسادى.
قازىرگى ۋاقىتتا ۇلىبريتانياداعى پرەمەر-ليگا ماتچتارىن تەلەديداردان كورسەتۋ قۇقىعى 2029 جىلعا دەيىن بولىنگەن. ال NBC-مەن جاسالعان كەلىسىم 2028 جىلعا دەيىن كۇشىندە. كەلەسى كەزەڭگە ارنالعان قۇقىقتاردى ءبولۋ الداعى ون ەكى اي ىشىندە وتەدى.
ايتا كەتەرلىگى, الەۋەتتى حابار تاراتۋشىلارى قاتارىنا Netflix-ءتىڭ قوسىلۋى پرەمەر-ليگا كلۋبتارىنىڭ تابىسىن ارتتىرۋى مۇمكىن. سەبەبى مۇنداي ءىرى پلاتفورمانىڭ ساۋداعا قاتىسۋى تەلەديداردان كورسەتۋ قۇقىعىنىڭ ساتۋ قۇنىن ارتتىرادى.