ەلوردادا «e-Otinish» اقپاراتتىق جۇيەسىنىڭ 5 جىلدىعىنا وراي «e-Otinish» – «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋدىڭ نەگىزگى قۇرالى» اتتى كونفەرەنتسيا ءوتتى. مەرەيتويلىق شاراعا پرەزيدەنت كومەكشىسى ەرجان جيەنباەۆ, پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا, سونداي-اق مەملەكەتتىك جانە جەرگىلىكتى اتقارۋشى ورگانداردىڭ وكىلدەرى قاتىستى, دەپ حابارلايدى Egemen.kz.
جيىن بارىسىندا اقپاراتتىق پلاتفورمانىڭ مەملەكەتتىك باسقارۋ مادەنيەتىن جەتىلدىرۋدەگى ءرولى مەن ازاماتتاردىڭ قۇقىقتارىن قورعاۋداعى ماڭىزى ەگجەي-تەگجەيلى تالقىلاندى.
پرەزيدەنت كومەكشىسى ەرجان جيەنباەۆ بۇل جۇيەنىڭ بەس جىل ىشىندە حالىقتىڭ مەملەكەتتىك ينستيتۋتتارعا دەگەن كوزقاراسىن ايقىندايتىن ينديكاتورعا اينالعانىن اتاپ ءوتتى.
«بەس جىل ىشىندە «e-Otinish» جۇيەسى حالىقتىڭ مەملەكەتتىك ينستيتۋتتارعا دەگەن كوزقاراسىن ايقىندايتىن وبەكتيۆتى ينديكاتورعا اينالىپ, اشىقتىق پەن ەسەپتىلىككە نەگىزدەلگەن مەملەكەتتىك قىزمەتتىڭ جاڭا ادەبىن قالىپتاستىرۋعا ىقپال ەتتى. ازاماتتاردىڭ وتىنىشتەرىمەن جۇمىس بىرىڭعاي ءارى تۇتاس تەتىك رەتىندە جولعا قويىلدى. بۇل مەحانيزم وتىنىشتەردى جەدەل قاراۋدى عانا ەمەس, مەملەكەتتىك ورگاندار قىزمەتىنە وبەكتيۆتى باعا بەرۋدى دە قامتاماسىز ەتەدى», دەدى ەرجان جيەنباەۆ.
پرەمەر-ءمينيستردىڭ ورىنباسارى ايدا بالاەۆا بۇل جۇيەنىڭ مەملەكەت باسشىسى قاسىم-جومارت توقاەۆتىڭ ستراتەگيالىق باعىتىنىڭ ءىس جۇزىندەگى كورىنىسى ەكەنىنە توقتالدى.
«قاسىم-جومارت كەمەل ۇلى توقاەۆتىڭ باستاماسىمەن جۇزەگە اسقان كونستيتۋتسيالىق رەفورمالار ادىلەتتى قازاقستاندى قالىپتاستىرۋدىڭ جاڭا ستاندارتتارىن بەكىتتى. ونىڭ وزەگىندە ادام قۇقىعى, بيلىكتىڭ قوعام الدىنداعى جاۋاپكەرشىلىگى جانە ازاماتتارمەن اشىق ديالوگ قاعيداتتارى تۇر. «ە-ءوتىنىش» جۇيەسىنىڭ قىزمەتى ءدال وسى قاعيداتتارمەن تولىق ۇندەسەدى. وسى ۋاقىت ىشىندە جۇيە ازاماتتاردىڭ ءوتىنىش بەرۋ جانە مەملەكەتتىك ماسەلەلەردى شەشۋگە قاتىسۋ جونىندەگى كونستيتۋتسيالىق قۇقىعىن ىسكە اسىراتىن پارمەندى تەتىككە اينالدى. جىل سايىن وسى جۇيە ارقىلى ازاماتتاردىڭ ميلليونداعان ءوتىنىشى قارالادى. ءاربىر كورسەتكىشتىڭ ارتىندا ناقتى ادام, ونىڭ ماسەلەسى, ادىلدىككە دەگەن ءۇمىتى جانە مەملەكەتكە ارتقان سەنىمى تۇر. شىن مانىندە, «ە-ءوتىنىش» قوعام مەن بيلىك ينستيتۋتتارى اراسىنداعى سەنىم كوپىرى بولىپ وتىر», دەدى ايدا بالاەۆا.
كونفەرەنتسيا بارىسىندا وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى قاناتبەك جايسانباەۆ, AMANAT پارتياسى ساياسي مەنەدجمەنت اكادەمياسىنىڭ ديرەكتورى تامارا دۇيسەنوۆا, قر باس پروكۋراتۋراسى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ توراعاسى ءسابيت نۇرلىباي, قر جوعارعى سوتىنىڭ اكىمشىلىك ىستەر جونىندەگى سوت القاسىنىڭ توراعاسى اسلان تۇكيەۆ قۇتتىقتاۋ ءسوز سويلەدى.
ءىس-شارا ازاماتتارمەن تىكەلەي جۇمىس ىستەيتىن فرونت-لينيالار قىزمەتى, مەملەكەتتىك سەكتورداعى جاساندى ينتەللەكتىنىڭ ءرولى جانە حالىقپەن ءوزارا ءىس-قيمىل ستاندارتتارى تۋرالى باياندامالارمەن جالعاستى.
بۇگىندە «e-Otinish» – 50 مىڭداي مەملەكەتتىك ورگان مەن ۇيىمدى بىرىكتىرگەن تولىققاندى مەملەكەتتىك ەكوجۇيە. 3 ميلليوننان استام ازامات پلاتفورمانىڭ يگىلىگىن كورىپ وتىر. بەس جىل ىشىندە جۇيە ارقىلى 16 ميلليوننان استام ءوتىنىش قارالعان.
كونفەرەنتسيا اياسىندا قاسىم-جومارت توقاەۆتىڭ جارلىعىمەن بىرقاتار ازامات مەملەكەتتىك ناگرادالارمەن – «قۇرمەت» وردەنىمەن, ءىى دارەجەلى باۋىرجان مومىش ۇلى اتىنداعى «ايبىن» وردەنىمەن جانە «ەرەن ەڭبەگى ءۇشىن» مەدالىمەن, سونداي-اق پرەزيدەنتتىڭ «قۇرمەت» گراموتاسى جانە «العىس» حاتىمەن ماراپاتتالدى. سونىمەن قاتار بىرقاتار مەملەكەتتىك قىزمەتشىگە پرەمەر-ءمينيستردىڭ ورىنباسارى – مادەنيەت جانە اقپارات ءمينيسترىنىڭ العىس حاتتارى تابىستالدى.