جامبىل وبلىسىندا جالپى قۋاتى 50 مۆت قۇرايتىن بۋ-گاز ەلەكتر ستانساسى سالىنىپ جاتىر, دەپ حابارلايدى Egemen.kz.
ىرگەلى جوبا جامبىل اۋدانى اۋماعىنداعى اۋليەكول ەلدى مەكەنىندەگى «GES مىرزاتاي» جشس باستاماسىمەن قولعا الىنعان. ينۆەستيتسيانىڭ جالپى كولەمى 60 ملن اقش دوللارىن قۇرايدى. جوسپار بويىنشا جوبا ەكى كەزەڭدى قامتيدى. باستاپقىدا قۋاتى 50 مۆت بولاتىن بۋ-گاز ەلەكتر ستانتسياسى سالىنادى, ال ەكىنشى كەزەڭدە ونىڭ قۋاتى 150 مۆت-قا دەيىن ۇلعايتىلادى. ناتيجەسىندە ستانتسيانىڭ جالپى قۋاتتىلىعى 200 مۆت-قا جەتەدى.
جوبا جەتەكشىسى حوۋ چۋان ءتسيۋننىڭ ايتۋىنشا, ينۆەستيتسيالىق باستاما اياسىندا جەر تەلىمىن راسىمدەۋ, ينجەنەرلىك ىزدەستىرۋ, جوبالاۋ جانە ءتيىستى كەلىسۋ جۇمىستارى كەزەڭ-كەزەڭىمەن اتقارىلىپ جاتىر.
بۇگىنگى تاڭدا 7 گەكتار جەر بولىنگەن. قۇرىلىستى جۇزەگە اسىراتىن مەردىگەر ۇيىم تاڭدالدى. گيدروگەولوگيالىق زەرتتەۋلەر جۇرگىزىلىپ, 185 مەتر تەرەڭدىكتە ۇڭعىما بۇرعىلاندى. سونداي-اق گازبەن جابدىقتاۋ بويىنشا ءتيىستى تەحنيكالىق شارتتار الىندى. قۇرىلىس جۇمىستارىنا 500-گە جۋىق ادام تارتىلادى, بۋ-گاز ەلەكتر ستانتسياسى تولىق قۋاتىنا شىققاندا 80 جاڭا جۇمىس ورنى اشىلادى.
جامبىل وبلىسى