كۇنى كەشە گەننادي گولوۆكين ريمدە وتكەن كونگرەستە حالىقارالىق World Boxing فەدەراتسياسىنىڭ پرەزيدەنتى بولىپ سايلاندى, دەپ جازادى Egemen.kz.
ورتا سالماقتا ەكى دۇركىن الەم چەمپيونى جانە 2004 جىلعى وليمپيادا ويىندارىنىڭ كۇمىس جۇلدەگەرى داڭقتى وتانداسىمىز وليمپيادالىق سپورت ءتۇرى بويىنشا حالىقارالىق فەدەراتسيانى باسقاراتىن تۇڭعىش قازاقستاندىق اتاندى.
گەننادي گولوۆكين وسى جاۋاپتى قىزمەتى بارىسىندا ەڭسەرۋدى كوزدەپ وتىرعان جوسپارىن ورتاعا سالدى.
«سىزدەردىڭ قولداۋلارىڭىزبەن World Boxing ۇيىمىنا دەگەن سەنىمدى قالپىنا كەلتىرۋ ءۇشىن بارىمدى سالامىن. بىرلەسە وتىرىپ حالىقارالىق وليمپيادالىق كوميتەتتىڭ تولىققاندى ماقۇلداۋىنا قول جەتكىزە الامىز. بوكستىڭ تەك لوس-انجەلەس-2028 وليمپياداسىندا عانا ەمەس الداعى بارلىق وليمپيادا ويىندارىنداعى ورنىن نىق قالىپتاستىرامىز», دەدى ول.
كەلەر جىلدان قويىلعان ماقساتتاردى جۇزەگە اسىرۋعا كىرىسەتىنىن ايتقان وتانداسىمىز World Boxing فەدەراتسياسىنىڭ پرەزيدەنتى رەتىندە 4 باستى ۇستانىمدى ايقىنداعانىن تىلگە تيەك ەتتى.
«سپورتشىلار – باستى ورىندا, ەكىنشى – ادىلدىك, ءۇشىنشى – يننوۆاتسيالار, ءتورتىنشى – قارجىلىق تۇراقتىلىق جانە دامۋ. ءار قادام جايىندا ۇيىم مۇشەلەرىن حاباردار ەتىپ وتىرامىز. مەن ادال, ناتيجەلى ەڭبەكتەنەتىن باسشىلىق قۇرامدى جاساقتايمىن. كوشباسشى بولۋ ادامداردىڭ ۇستىنەن قاراپ تۇرۋ ەمەس, ولارمەن بىرگە بولۋ. ەندى ارەكەت ەتەتىن ۋاقىت كەلدى», دەدى گەننادي گولوۆكين.
بۇعان دەيىن مەملەكەت باسشىسى قاسىم-جومارت توقاەۆ گەننادي گولوۆكيندى World Boxing حالىقارالىق فەدەراتسياسىنىڭ پرەزيدەنتى بولىپ سايلانۋىمەن قۇتتىقتاعانىن حابارلاعان بولاتىنبىز.