اقش دوللاردىڭ ءتۇرىن تولىق وزگەرتەتىنىن حابارلادى. بۇل جۇمىس بىردەن ەمەس, كەزەڭ-كەزەڭىمەن جۇزەگە اسادى. جاڭارتۋ ۋاقىتى 2026 جىلدان 2034 جىلعا دەيىن سوزىلادى. وسىنداي ۇلكەن وزگەرىستىڭ باستى ماقساتى – اقشا قولدان جاسالماۋى ءۇشىن قورعاۋ دەڭگەيىن كۇشەيتۋ جانە كوزى ناشار كورەتىن ادامدارعا قولايلى جاعداي جاساۋ. ەسكى دوللار جارامسىز بولمايدى. سوندىقتان ۋايىمداۋعا نەگىز جوق, دەپ جازادى, Egemen.kz.
الدىمەن قانداي كۋپيۋرا قاي جىلى جاڭاراتىنىن ايتايىق. امەريكا بۇل جۇمىستى ناقتى كەستەمەن بولەدى. 2026 جىلى جاڭارعان 10 دوللار شىقپاق. 2028 جىلى 50 دوللار اينالىمعا قوسىلادى. 2030 جىلى 20 دوللار وزگەرەدى. 2032 جىلى جاڭا 5 دوللار شىعادى. ال 2034 جىلى حالىق كوپ كۇتكەن جاڭا 100 دوللار جارىق كورەدى.
امەريكا نەلىكتەن اقشانىڭ ءتۇرىن جاڭارتۋعا كىرىستى دەگەن سۇراق ءجيى قويىلادى. سەبەبى كەيىنگى جىلدارى جالعان دوللار كوبەيدى. قولدان جاسايتىندار ۇلكەن پرينتەر مەن ساندىق قۇرىلعىلاردى قولدانا باستادى. ءتىپتى ءۇش ولشەمدى قۇرىلعىمەن دە جاسالعان اقشا كوبەيگەن. مۇنداي اقشانى ارنايى قۇرىلعىسىز انىقتاۋ قيىن بولىپ بارادى. سول سەبەپتەن جاڭا قورعانىس تاسىلدەرى قاجەت بولدى.
جاڭا دوللار تەك قاۋىپسىزدىك ءۇشىن ەمەس, قولجەتىمدىلىك ءۇشىن دە وزگەرەدى. امەريكا تاريحىندا ءبىرىنشى رەت كۋپيۋرا بەتىنە ساۋساقپەن سەزىلەتىن ارنايى بەلگى قويىلادى. بۇل رەلەف بەلگىسى RTF دەپ اتالادى. بەلگى ارقىلى كوزى ناشار كورەتىن ادام اقشانىڭ نومينالىن سيپاپ انىقتاي الادى.
ەندى ەسكى دوللار ماسەلەسىنە توقتالايىق. فەدەرالدىق رەزەرۆ جۇيەسىنىڭ مالىمەتى بويىنشا 1914 جىلدان بەرى شىققان بارلىق دوللار ءوز كۇشىندە قالادى. ياعني ەسكى اقشانى وزگەرتۋ نەمەسە وتكىزۋ قاجەت ەمەس. ولار امەريكادا ارقاشان قابىلدانادى. ايىرباس ورىندارىنىڭ ەسكى ديزاين دەپ كوميسسيا ۇستاۋى زاڭعا قايشى.