«Talap» كەاق ۇيىمداستىرعان زاماناۋي پەداگوگيكالىق قۇرالداردى ەنگىزۋ, ءبىلىم بەرۋ پروتسەسىن تسيفرلاندىرۋ جانە تاجىريبەگە باعىتتالعان وقىتۋدى كۇشەيتۋ باعىتىندا بىلىكتىلىكتى ارتتىرۋ كۋرستارىنان بيىل 5000-عا جۋىق كوللەدج قىزمەتكەرى ءوتتى. ونىڭ ىشىندە 4500 پەداگوگ پەن 580 كوللەدج ديرەكتورى قامتىلعان, دەپ حابارلايدى Egemen.kz.
وقۋ-اعارتۋ مينيسترلىگىنىڭ مالىمەتىنشە, كۋرستار 11 باعىت بويىنشا جۇرگىزىلدى, ونىڭ ىشىندە IT, ەلەكتر ەنەرگەتيكاسى, قۇرىلىس, اۋىل شارۋاشىلىعى, تىگىن جانە دانەكەرلەۋ ءوندىرىسى, اۆتوموبيل كولىگى مەن قوعامدىق تاماقتانۋ سالالارى بار.
سالا ۆەدومستۆوسىنا قاراستى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى اسەت مۇحانبەتوۆتىڭ ايتۋىنشا, كوللەدج ديرەكتورلارىنىڭ جانە ورىنباسارلارىنىڭ بىلىكتىلىگىن ارتتىرۋعا ەرەكشە كوڭىل ءبولىندى.
«وقىتۋ باعدارلامالارى باسقارۋشىلىق قۇزىرەتتەردى دامىتۋعا, بيزنەس-پروتسەستەردى ءتيىمدى باسقارۋعا جانە كوللەدجدەردىڭ تسيفرلىق ترانسفورماتسياسىنا باعىتتالدى», دەپ اتاپ ءوتتى ءا.مۇحانبەتوۆ.
پەداگوگتەر ەلىمىزدىڭ جەتەكشى وندىرىستىك الاڭدارىندا ۇيىمداستىرىلعان تاعىلىمدامادا ءوز بىلىمدەرىن جەتىلدىرىپ, سالالىق وزىق تاجىريبەلەردى مەڭگەردى.