ەلىمىزدىڭ قاي وڭىرلەرىندە جەڭىلدەتىلگەن سالىق مولشەرلەمەسى تومەندەتىلدى؟

پالاتا مالىمەتىنشە, بىرنەشە وڭىردە ارنايى سالىق رەجيمى (اسر) اياسىندا جۇمىس ىستەيتىن بيزنەس ءۇشىن جەڭىلدەتىلگەن دەكلاراتسيا نەگىزىندەگى سالىق مولشەرلەمەلەرى تومەندەتىلدى.

سالىق مولشەرلەمەسى تومەندەتىلگەن وڭىرلەر:

اقمولا وبلىسى – بارلىق اۋدانداردا 2%, تەك جاقسى اۋدانىنان باسقا;

اتىراۋ وبلىسى – اتىراۋ, ماحامبەت جانە جىلىوي اۋداندارىندا 2%;

شىعىس قازاقستان وبلىسى – وسكەمەن قالاسىندا 2%;

سولتۇستىك قازاقستان وبلىسى – اققايىڭ اۋدانىندا 3%.

جاڭا ارنايى سالىق رەجيمى بويىنشا بازالىق مولشەرلەمە 4% دەڭگەيىندە بەلگىلەنەدى. ال 2 جانە 3% جەڭىلدەتىلگەن مولشەرلەمەلەردى وڭىرلەر ءماسليحاتتارىنىڭ شەشىمىمەن شاعىن جانە ورتا بيزنەستى قولداۋ ماقساتىندا ەنگىزۋگە مۇمكىندىك بەرىلگەن.

«جاڭا ارنايى سالىق رەجيمى بويىنشا سالىق مولشەرلەمەلەرىن 1 جەلتوقسانعا دەيىن بەكىتۋ قاجەت. بۇل بيزنەسكە ءوز قىزمەتىن جوسپارلاپ, 2026 جىلدان باستاپ جاڭا شارتتارعا كوشۋگە جەتكىلىكتى ۋاقىت بەرەدى, ويتكەنى وسى كۇننەن باستاپ بۇرىنعى ارنايى رەجيمدەر كۇشىن جويادى», دەپ مالىمدەدى «اتامەكەن» پالاتاسى.

ەسكە سالا كەتسەك, 2026 جىلعى 1 قاڭتاردان باستاپ بولشەك ساۋدا سالىعى رەجيمى الىنىپ تاستالىپ, ونىڭ ورنىنا جەڭىلدەتىلگەن دەكلاراتسيا نەگىزىندەگى جاڭارتىلعان ارنايى سالىق رەجيمى ەنگىزىلەدى.

سونىمەن قاتار, الماتى اكىمدىگى شاعىن جانە ورتا بيزنەس ءۇشىن سالىق مولشەرلەمەسىن 3%-عا, ال استانادا — 2%-عا دەيىن تومەندەتۋدى ۇسىندى.