بۇگىن «قازمەديا» ورتالىعىندا باسپا, راديو, ينتەرنەت-جۋرناليستيكا سالاسىنداعى «ۇركەر» – 2025 ۇلتتىق سىيلىعىن يەلەنگەن جەڭىمپازداردىڭ ەسىمى جاريالاندى, دەپ جازادى Egemen.kz.
بيىل ۇلتتىق بايگەگە جۋرناليستەردەن 400-دەن استام ءوتىنىم كەلىپ تۇسكەن. سالانىڭ ساقا جۋرناليستەرى مەن مەديا مەنەدجەرلەردەن جاساقتالعان تاۋەلسىز قازىلار القاسىنىڭ شەشىمىمەن شورت-ليستكە 44 نومينانتتىڭ ەسىمى ەندى.
بۇگىن جۇزدەن جۇيرىك شىققان 11 باق وكىلى مەن ۇجىمعا «ۇركەر» ەستەلىك مۇسىنشەسى جانە ءبىر ميلليون تەڭگە مولشەرىندەگى اقشالاي سىيلىق تابىستالدى.
سۇراق-جاۋاپ قانا ەمەس ەلدىك ماسەلەلەردى كوتەرە وتىرىپ, سۇحبات بەرۋشىنىڭ بولمىسىن اشۋعا ۇمتىلاتىن سۇحبات جانرىنىڭ بيىلعى ۇزدىكتەرى دە انىقتالدى. جىلدىڭ ۇزدىك سۇحباتى اتالىمىندا اشىلعانىنا 3 جىل بولعان Qaz365.kz اقپارات اگەنتتىگىنىڭ قىزمەتكەرى باۋىرجان كاريپوۆتىڭ ەسەمى ەرەكشە ەلەنىپ, جەڭىمپاز تانىلدى.
وقيعانىڭ قالىڭ ورتاسىندا ءجۇرىپ, شىنايى تىرشىلىكتى شەبەر جەتكىزەتىن رەپورتاج جانرىندا Tengrinews.kz سايتىنىڭ ءتىلشىسى يۆان سۋحورۋكوۆتىڭ ەڭبەگى باعالانىپ, جىلدىڭ ۇزدىك رەپورتاجى اتالىمىندا ۇزدىك شىقتى.
قوعامنىڭ تۇيىتكىلدى تاقىرىپتارىن كوتەرگەن قالام ۇستاعان قاۋىم اراسىنان الەۋمەتتىك تاقىرىپتاعى ۇزدىك ماتەريال اتالىمىندا Vlast.kz سايتىنىڭ ءتىلشىسى تامارا ۆاالدىڭ باعى جاندى. ايتا كەتەيىك, وسى اتالىمدا «ەگەمەن قازاقستان» گازەتىنىڭ ءتىلشىسى مۇرات اياعانوۆ ەسىمى دە ۇزدىك تورتتىك تىزىمىنەن تابىلدى.
«ۇركەر» بايقاۋىنىڭ تاۋەلسىز قازىلار القاسى جىلدىڭ ۇزدىك جۋرناليستىك زەرتتەۋى اتالىمىندا «اتىراۋ» گازەتىنىڭ ءتىلشىسى مايرا ەرعاليدىڭ زەرتتەۋىن بارىنەن جوعارى باعالادى.
اقپاراتتى بايانداپ قانا قويماي, جىكتەپ, سارالايتىن جانردا جىلدىڭ ۇزدىك اناليتيكالىق ماتەريالى اتالىمىندا «كازاحستانسكايا پراۆدا» گازەتىنىڭ ءتىلشىسى يليا پاششەنكو ۇلتتىق جۇلدەنى قانجىعالادى.
راديوستانتسياداعى ۇزدىك جوبا اتالىمىندا 60 جىلعا جۋىق ۋاقىتتان بەرى راديو تولقىندا ءۇنى تالماعان شالقار راديوسى جەڭىمپاز بولدى.
سان بەينە ىشىنەن ءساتتى تاسپالانعان «كازاحستانسكايا پراۆدا» گازەتى ءفوتوتىلشىسىنىڭ تۋىندىسى جىلدىڭ ۇزدىك فوتوسۋرەتى بولدى.
جىلدىڭ ۇزدىك جاڭالىقتار پورتالى اتالىمىندا Zakon.kz, Adyrna ۇلتتىق پورتالى Newtimes.kz, Inbusiness.kz, اراسىنان Adyrna ۇلتتىق پورتالى ۇزدىك شىقتى.
ۇزدىك وڭىرلىك باق اتالىمىندا ۇركەر ۇلتتىق بايگەسى «استانا اقشامى» گازەتىنە بۇيىردى. بۇل نوميناتسيادا Life09 اقپارات اگەنتتىگى, «جاڭاقورعان تىنىسى» گازەتى, Lada.kz اگەنتتىگى شورت-ليستتەن تابىلدى.
ايقاپ, Qstar Group, «قازاقستان تاريحى», «Qalam» شىعارماشىلىق ۇجىمدارى جىلدىڭ ۇزدىك پودكاستى نوميناتسياسىندا تالاسقا ءتۇسىپ, Qstar Group-قا تيەسىلى LS stories پودكاستى جەڭىمپاز اتاندى.
مەديا كوكجيەگىندە جاڭا تىنىس بولىپ اشىلعان يۋتۋب-ارنالار دا نازاردان تىس قالمادى. جىلدىڭ ۇزدىك YouTube-ارناسى نومينانتى رەتىندە ەكسپەرتى KZ جوباسىنىڭ باعاسى جاندى.
بيىلعى ۇلتتىق بايگە ارنايى 3 جۇلدە تاعايىندالۋىمەن دە ايرىقشالاندى. جۇمىسشى ماماندىقتار جىلى اياسىندا ەڭبەك ادامدارىنىڭ توككەن تەرىن ەلەۋلى دەڭگەيدە ناسيحاتتاعان zakon.kz ۇجىمى ماراپاتتالدى. سونداي-اق «كازاحستانسكايا پراۆدا» گازەتى مەن Kazinform اقپاراتتىق اگەنتتىگى دە ارنايى جۇلدەمەن ولجالى بولدى.
تالانتتى جۋرناليستەر مەن شىعارماشىلىق ۇجىمداردى انىقتاۋدى ماقسات ەتكەن بايقاۋدىڭ وتۋىنە مادەنيەت جانە اقپارات مينيسترلىگى, «مەديا دامىتۋ قورى» كورپوراتيۆتىك قورى مۇرىندىق بولعان. ال ءىس-شارانىڭ دەمەۋشىلەرى – «Qazcontent» اق, «قازاق گازەتتەرى» جشس جانە «Sport+» تەلەارناسى.