نۇرسۇلتان شوقانوۆ: الماتى ورتالىق ازياداعى ەڭ ءىرى تاۋ ءتۋريزمى ورتالىعىنا اينالۋى مۇمكىن

الماتىداعى تاۋ ينفراقۇرىلىمىن دامىتۋعا ارنالعان تالقىلاۋ بارىسىندا نۇرسۇلتان شوقانوۆ قالاداعى تاۋ كلاستەرىنە تۇسەتىن جۇكتەمەنىڭ جىل سايىن ارتىپ كەلە جاتقانىن ايتتى. ونىڭ سوزىنشە, قازىرگى ينفراقۇرىلىم سۇرانىستى تولىق قامتاماسىز ەتە الماي وتىر.

ء«بىز كۇن سايىن ينفراقۇرىلىم تاپشىلىعىن جانە الماتى تاۋ كلاستەرىنە تۇسەتىن جۇكتەمەنىڭ ارتىپ جاتقانىن كورىپ وتىرمىز. قالانىڭ ءارى قاراي دامۋى ءۇشىن ناقتى قانداي شەشىمدەر قاجەت ەكەنىن جاقسى تۇسىنەمىز», دەدى ول.

شوقانوۆتىڭ ايتۋىنشا, بۇگىندە الماتى – قازاقستانداعى سپورتشىلارعا جىل بويى تولىققاندى دايىندىق جاساۋعا مۇمكىندىك بەرەتىن جالعىز قالا. قازىرگى تاڭدا الپينيزم جانە سپورتتىق قۇزعا ورمەلەۋ بويىنشا ۇلتتىق قۇرامانىڭ 60 پايىزدان استامىن الماتىلىق سپورتشىلار قۇرايدى.

«ميفپەن ءومىر ءسۇرۋدى دوعارايىق»: قوعام قايراتكەرى «Almaty Superski» جوباسىن قولداۋعا شاقىردى

فەدەراتسيا پرەزيدەنتى Almaty Super Ski جوباسى اياسىندا 150 شاقىرىمنان استام جاڭا شاڭعى تراسساسىن سالۋ جوسپارلانىپ وتىرعانىن ايتتى. جوبا شىمبۇلاق, پيونەر, Oi-Qaragai, كيماسار جانە بۋتاكوۆكا كۋرورتتارىن ءبىرتۇتاس جۇيەگە بىرىكتىرۋدى, سونداي-اق كوكجايلاۋ باعىتىن دامىتۋدى كوزدەيدى.

«الماتىنىڭ ورتالىق ازياداعى ەڭ ءىرى تاۋ ءتۋريزمى ورتالىعىنا اينالۋىنا بارلىق العىشارت بار,» دەدى نۇرسۇلتان شوقانوۆ.

ول بۇل باعىت تەك شاڭعى تراسسالارى مەن اسپالى جولدار سالۋمەن شەكتەلمەيتىنىن اتاپ ءوتتى. ونىڭ پىكىرىنشە, سالانى تولىققاندى دامىتۋ ءۇشىن قوناقۇيلەر, كولىك قولجەتىمدىلىگى, ينجەنەرلىك جەلىلەر, قاۋىپسىزدىك جۇيەلەرى جانە زاماناۋي سەرۆيستىك ينفراقۇرىلىم قاتار دامۋى قاجەت.

سپيكەر تۋريزم سالاسىنىڭ ەكونوميكالىق الەۋەتىنە دە توقتالدى. ونىڭ مالىمەتىنشە, تەك 2025 جىلدىڭ وزىندە الماتىعا شامامەن 2,5 ميلليون تۋريست كەلگەن. ال تۋريستىك قىزمەتتەردىڭ كولەمى 110 ميلليارد تەڭگەدەن اسقان.

«قوسىمشا ءبىر ميلليون تۋريست ءوڭىر ەكونوميكاسىنا شامامەن 900 ميلليون دوللار تىكەلەي ەكونوميكالىق اسەر اكەلۋى مۇمكىن», دەدى فەدەراتسيا پرەزيدەنتى.

سونداي-اق, ول الماتى ءۇشىن ءوز الەۋەتىن كاسىبي, جۇيەلى ءارى ەكولوگيالىق تالاپتاردى ساقتاي وتىرىپ دامىتۋ ماڭىزدى ەكەنىن اتاپ ءوتتى. ونىڭ سوزىنشە ورتا ازيا ەلدەرى اراسىندا تۋريزم سالاسىندا باسكەلەستىك ارتقان. بۇل باعىتتا قىرعىزستان حالىقارالىق تۋريستىك باعىتتاردى بەلسەندى دامىتسا, قىتاي قىسقى سپورت تۇرلەرىنە جۇيەلى تۇردە ينۆەستيتسيا قۇيۋدا.

جيىندا الماتىنى دامىتۋ ورتالىعى جانىنداعى جوبالىق كەڭسەنىڭ «كولىك جۇيەسىن دامىتۋ» بازالىق باعىتىن ىسكە اسىرۋ توبىنىڭ جەتەكشىسى ارتۋر شاحبازيان كوكجايلاۋعا ارنايى شاتتلدار قاتىنايتىنىن ايتتى.