قازاقستان كۇرەس قۇراماسى ۆەتنامنىڭ دانانگ قالاسىندا ءوتىپ جاتقان جاستار اراسىنداعى ازيا چەمپيوناتىندا تاعى ءتورت مەدال ەنشىلەدى, دەپ حابارلايدى Egemen.kz ۇلتتىق وليمپيادا كوميتەتىنە سىلتەمە جاساپ.
جارىستىڭ كەزەكتى كۇنىندە ايەلدەر كۇرەسىندەگى سوڭعى جۇلدەلەر ساراپقا سالىنىپ, ەركىن كۇرەس باسەكەلەرى باستالدى.
قازاقستان قورجىنىنا التىن مەدالدى مايس اليەۆ سالدى. ول 70 كەلىگە دەيىنگى سالماق دارەجەسىندە توپ جارىپ, ازيا چەمپيونى اتاندى.
كۇمىس جۇلدەنى ەلامان امانگەلدى (57 كەلىگە دەيىن), التىن شاگاەۆا (57 كەلىگە دەيىن) جانە تىنىس دۋبەك (62 كەلىگە دەيىن) يەلەندى.
وسىلايشا, قازاقستان قۇراماسىنىڭ قورجىنىندا قازىر 16 مەدال بار. ونىڭ تورتەۋى التىن, سەگىزى كۇمىس جانە تورتەۋى قولا جۇلدە.
بۇعان دەيىن گرەك-ريم كۇرەسىنەن ايبەك ايتبەكوۆ (60 كەلىگە دەيىن), يسلام ەۆلوەۆ (97 كەلىگە دەيىن) جانە ايەلدەر قۇراماسىنىڭ وكىلى شۇعىلا ومىربەك (55 كەلىگە دەيىن) ازيا چەمپيونى اتانعان بولاتىن.
ايتا كەتەيىك, قازاقستاندىق تاەكۆوندوشى ازيا چەمپيوناتىندا قولا مەدال جەڭىپ الدى.
ال بوكسشىلارىمىز ازيا دوداسىندا 7 التىن مەدال ەنشىلەدى.