باتىس قازاقستان وبلىستىق تاريحي-ولكەتانۋ مۋزەيىنىڭ قورىنا اقىن, اعارتۋشى عۇمار قاراشتىڭ تۇپنۇسقا فوتوسۋرەتى قوسىلدى. ادەبيەت زەرتتەۋشىسى قابيبوللا سىديىق ۇلىنىڭ جەكە ارحيۆىندەگى قۇندى جادىگەردى مۋزەيگە ۇسىنعان – عالىمنىڭ جارى گۇلشات ومارقىزى.
ادەبيەتتانۋشى, فيلولوگيا عىلىمدارىنىڭ كانديداتى قابيبوللا سىديىق ۇلى عۇمار قاراشتىڭ تۇڭعىش تولىمدى جيناعىن قۇراستىرىپ, العىسوزىن جازىپ, 1994 جىلى «عىلىم» باسپاسىنان «زامانا» دەگەن اتاۋمەن شىعارعان. كەڭەس وكىمەتى جىلدارى اتى-ءجونى ۇمىتىلعان, شىعارمالارى وقۋلىقتاردان الىنىپ, جاريالاۋعا تىيىم سالىنعان اعارتۋشىنىڭ ەسىمىن حالىق جادىندا جاڭعىرتۋعا كوپ ۇلەس قوسقان عالىم عۇمار قاراشتىڭ تۇپنۇسقا فوتوسۋرەتىن دە تاۋىپ, اينالىمعا قوسقان ەكەن. قازىر ءبىز ءجيى كورەتىن عۇمار قاراشتىڭ قازاقى شاپان كيگەن سۋرەتى, بالاسى بۇرحاندى جانىنا الىپ تۇسكەن بەينەسى ءدال وسى سۋرەتتەن الىنعان بولىپ شىقتى.
كونە سۋرەتتە 4 ادام بەينەلەنگەن. عۇماردىڭ جانىندا وتىرعان – 1917 جىلى ساۋىردە ورال وبلىسىنىڭ قازيى بولىپ سايلانعان قايىرشاھ احمەتجان ۇلى ەكەنىن تانىدىق. بۇل سۋرەت عۇمار مەن قايىرشاھتىڭ ۋفادا, بۇكىلرەسەيلىك ءدىني باسقارمادا قىزمەت ەتىپ جۇرگەن 1918 جىلى تۇسكەن بولسا كەرەك. وكىنىشتىسى, سۋرەتتىڭ سىرتقى بەتىندەگى كونە جازۋ ءوشىپ, وقىلماستاي بولىپتى. قازىر مۋزەي ماماندارى كونە سۋرەتتىڭ تاريحىنا قاتىستى مالىمەتتەردى سۇراستىرىپ جاتىر.
باتىس قازاقستان وبلىسى