كىتاپ وقۋعا قىزىعۋشىلىق ايتارلىقتاي ارتىپ كەلەدى. بيىل ەل كىتاپحانالارىنا كەلۋشىلەر سانىنىڭ رەكوردتىق كورسەتكىشى تىركەلىپ وتىر. جىل باستالعالى 37 ميلليون وقىرمان كىتاپحاناعا بارعان, دەپ جازادى Egemen.kz.
ەلىمىزدە 3 883 قوعامدىق كىتاپحانا جۇمىس ىستەيدى, ولارعا بيىل 5,3 ميلليوننان استام جاڭا وقىرمان تىركەلگەن.
مادەنيەت جانە اقپارات مينيسترلىگىنىڭ مالىمەتىنشە, سوڭعى ءبىر ايدىڭ وزىندە الماتىداعى ۇلتتىق كىتاپحاناعا شامامەن 13 مىڭ ادام جۇگىنگەن. ەڭ بەلسەندى وقىرماندار – 17 مەن 25 جاس ارالىعىنداعىلار, ال 45 جاستان اسقان كەلۋشىلەردىڭ سانى – ەكى مىڭعا جۋىق. ال شامامەن ءۇش مىڭ ادام كىتاپحاناعا العاش رەت تىركەلگەن.
وقىرماندار كوبىنە قازاق جانە الەم ادەبيەتىنىڭ كلاسسيكالىق جانە كوركەم شىعارمالارىن وقىعاندى ءجون كورەدى. كىتاپ سۇيەر قاۋىم كوبىنە روماندار, پوۆەستەر مەن پوەزيانى تاڭدايدى. سوڭعى ايلاردا قازاق كلاسسيكاسىنا جانە ۇلتتىق فيلوسوفيالىق ادەبيەتكە قىزىعۋشىلىق ايتارلىقتاي ارتقان.