تۇركىستان وبلىسىندا بەس جاسار قىزعا يت شابۋىل جاساپ, ونىڭ بەتىن قاتتى جاراقاتتادى. وقيعا ساۋران اۋدانىنداعى ەسكى يقان اۋىلىندا بولعان. دارىگەرلەر بالاعا شۇعىل وتا جاساعانىمەن, ونىڭ بەتىندە تىرتىق قالاتىنىن ايتتى, دەپ حابارلايدى Egemen.kz.
قىزدىڭ اناسىنىڭ ايتۋىنشا, بالا تۋىستارىنىڭ ۇيىندە باسقا بالالارمەن ويناپ جۇرگەن كەزدە يت كەنەتتەن شابۋىل جاساعان. بالا اۋىر جاراقاتپەن اۋرۋحاناعا جەتكىزىلىپ, جانساقتاۋ بولىمىنە تۇسكەن. دارىگەرلەر قىزدىڭ بەتىنىڭ وڭ جاعى قاتتى زاقىمدانعانىن, باسىنان دا جاراقات العانىن مالىمدەدى. قازىر بالانىڭ جاعدايى تۇراقتى, ەم قابىلداپ جاتىر.
تۋىستارى وقيعادان كەيىن ءيتتى ىزدەگەنىمەن, تابا الماعان. اۋىل تۇرعىندارى مۇنداي جاعداي العاش رەت ەمەس ەكەنىن, بۇعان دەيىن دە بىرنەشە ادام يتتەن زارداپ شەككەنىن ايتتى.
ساۋران اۋدانى اكىمدىگى شابۋىل جاساعان ءيتتىڭ يەسى بار ەكەنىن حابارلادى. قازىرگى ۋاقىتتا پوليتسيا قىزمەتكەرلەرى جانۋار مەن ونىڭ يەسىن ىزدەستىرىپ جاتىر. ال اۋىلداعى تاعى ءبىر ادامعا شابۋىل جاساعان يت ۇستالىپ, زەرتحاناعا جىبەرىلگەن.
اكىمدىكتىڭ مالىمەتىنشە, اۋدان بويىنشا قاڭعىباس يتتەردى اۋلاۋعا بيىل 6,5 ميلليون تەڭگە بولىنگەن. جىل باسىنان بەرى شامامەن 50 يت ۇستالعان.