21 مامىر كۇنى اتىراۋداعى «سالتانات سارايى» ماڭىنداعى اۆتوتۇراقتا 200-دەن استام كولىك يەسى جينالدى. ولاردىڭ باسىم بولىگى ارميان, گرۋزين جانە رەسەيلىك نومىرمەن تىركەلگەن اۆتوكولىكتەر بولدى. جۇرگىزۋشىلەر پوليتسيا تاراپىنان جۇرگىزىلەتىن تەكسەرۋلەر مەن ايىپپۇلدارعا بايلانىستى الاڭداۋشىلىق ءبىلدىردى, دەپ حابارلايدى Egemen.kz.
جەرگىلىكتى «اق جايىق» باسىلىمىنىڭ جازۋىنشا سوڭعى كۇندەرى قالادا باسقا وڭىرلەردەن كەلگەن قوسىمشا پوليتسيا جاساقتارى كوبەيگەن. بۇعان دەيىن پوليتسەيلەر جۇرگىزۋشىلەردىڭ قۇجاتتارىن, ساقتاندىرۋ پوليستەرىن, ءدارى قوبديشاسىن, ءورت سوندىرگىشىن جانە شەتەلدىك تىركەۋدەگى كولىكتەردى تەكسەرگەن.
جۇرگىزۋشىلەردىڭ ءبىرى ادىلبەك تابىلدىەۆ گرۋزين ءنومىرلى كولىكتى بىرنەشە جىل بۇرىن ساتىپ العانىن ايتتى. ونىڭ سوزىنشە, بۇعان دەيىن ەش قيىندىق بولماعان, ال قازىر ساقتاندىرۋدى شۇعىل راسىمدەۋ تالاپ ەتىلىپ جاتىر.
«30 مينۋتتىق قۋات»: BYD كولىكتەرىنىڭ يەلەرى نەگە دابىل قاقتى؟
بەيرەسمي مالىمەت بويىنشا, اتىراۋدا شەتەلدىك ءنومىرلى بەس مىڭنان استام كولىك بار. كولىكتەردىڭ كوبى گرۋزيا مەن ارمەنيادا تىركەلگەن.
جينالعانداردىڭ ايتۋىنشا, وقيعا ورنىنا پوليتسيا, اكىمدىك, پروكۋراتۋرا جانە ۇقك قىزمەتكەرلەرى كەلگەن. الايدا جۇرگىزۋشىلەر ناقتى ءتۇسىندىرۋ جۇمىستارى جۇرگىزىلمەگەنىن ايتتى.
ال پوليتسيا دەپارتامەنتى وڭىردە كۇشەيتىلگەن پروفيلاكتيكالىق شارالار ءوتىپ جاتقانىن حابارلادى. ۆەدومستۆو مالىمەتىنشە, رەيدتەردىڭ ماقساتى – قوعامدىق ءتارتىپتى ساقتاۋ, جول قاۋىپسىزدىگىن قامتاماسىز ەتۋ جانە قۇقىقبۇزۋشىلىقتاردىڭ الدىن الۋ.
ەسكە سالا كەتەيىك, ەندى كولىك ءنومىرىن مۇراعا قالدىرۋعا رۇقسات ەتىلەدى.