الماتى پوليتسياسى ءال-فارابي داڭعىلىنداعى رەزونانس تۋدىرعان جول-كولىك وقيعاسى بويىنشا تەرگەۋدى اياقتادى. ەندى ءىس سوتقا جولداندى, دەپ حابارلايدى Egemen.kz.
قازا تاپقان 29 جاستاعى Mercedes جۇرگىزۋشىسىنىڭ تۋىستارىنىڭ مۇددەسىن قورعايتىن ادۆوكات ولەگ چەرنوۆ الدىن الا سوت وتىرىسى 28 مامىر كۇنى ساعات 15:00-دە الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا وتەتىنىن مالىمدەدى.
ادۆوكاتتىڭ ايتۋىنشا, سوتقا دەيىنگى تەرگەۋ تولىق اياقتالعان. ول الماتى قالالىق پوليتسيا دەپارتامەنتى قىزمەتكەرلەرىنە ءىستى جەدەل ءارى وبەكتيۆتى تەرگەگەنى ءۇشىن العىس ءبىلدىردى.
بۇعان دەيىن قورعاۋشى ايىپتالۋشى تاراپتىڭ قازا تاپقان ەلاماننىڭ تۋىستارىمەن تاتۋلاسۋعا ارەكەت جاساعانىن ايتقان. الايدا مارقۇمنىڭ وتباسى بۇل ۇسىنىستان باس تارتقان.
ءال-فارابي داڭعىلىنداعى وقيعادان كەيىن الماتىدا جول قاۋىپسىزدىگى كۇشەيتىلدى
ەسكە سالايىق, قايعىلى جول اپاتى 21 ناۋرىزعا قاراعان ءتۇنى الماتىداعى ءال-فارابي داڭعىلىندا بولعان. اپات سالدارىنان Mercedes جۇرگىزۋشىسى جانە كولىكتەگى 20 جانە 22 جاستاعى ەكى قىز قازا تاپتى. رەسمي ەمەس مالىمەتتەر بويىنشا, Zeekr كولىگى تاعى ءبىر اۆتوكولىكپەن جارىسقان بولۋى مۇمكىن.
اتالعان فاكتى بويىنشا قىلمىستىق ءىس قوزعالدى. تەرگەۋ بارىسىندا Zeekr جۇرگىزۋشىسىنىڭ جول اپاتى كەزىندە جەڭىل دارەجەدەگى الكوگولدىك ماس كۇيدە بولعانى انىقتالعان. 7 ساۋىردە ول تەرگەۋ يزولياتورىنا جەتكىزىلگەن.