گوندۋراستا بولعان ەكى قارۋلى شابۋىل سالدارىنان 25 ادام, ونىڭ ىشىندە 6 پوليتسيا قىزمەتكەرى قازا تاپتى, دەپ حابارلايدى Egemen.kz.
مالىمەتكە سايكەس, العاشقى وقيعا ەلدىڭ سولتۇستىگىندەگى ترۋحيلو مۋنيتسيپاليتەتىندەگى پلانتاتسيادا بولعان. بەلگىسىز قارۋلى ادامدار جۇمىسشىلارعا وق جاۋدىرىپ, كەمىندە 19 ادام كوز جۇمدى. قۇربانداردىڭ ناقتى سانى ازىرگە انىقتالعان جوق, سەبەبى تۋىستارى مايىتتەردىڭ ءبىر بولىگىن وقيعا ورنىنان الىپ كەتكەن.
ەكىنشى شابۋىل گۆاتەمالا شەكاراسىنا جاقىن ورنالاسقان كورتەس دەپارتامەنتىنىڭ وموا مۋنيتسيپاليتەتىندە بولعان. قارۋلى توپتار تەگۋسيگالپادان باندالىق قۇرىلىمدارعا قارسى وپەراتسياعا قاتىسۋ ءۇشىن كەلە جاتقان پوليتسيا قىزمەتكەرلەرىنە شابۋىل جاساعان. سونىڭ سالدارىنان 6 پوليتسەي, ونىڭ ىشىندە جوعارى لاۋازىمدى وفيتسەر قازا تاپتى.
گوندۋراس قاۋىپسىزدىك مينيسترلىگى شابۋىل جاسالعان ايماقتارعا پوليتسيا مەن قارۋلى كۇشتەردىڭ بولىمشەلەرى جىبەرىلگەنىن مالىمدەدى.
وقيعالاردى تەرگەۋ ءۇشىن كريميناليستەر مەن پروكۋرورلاردىڭ قاتىسۋىمەن ارنايى تەرگەۋ توپتارى قۇرىلدى.
ايتا كەتەيىك, قىتايدىڭ وڭتۇستىگى مەن ورتالىق بولىگىندە نوسەر جاڭبىر سالدارىنان بولعان جويقىن سۋ تاسقىنى سالدارىنان 18 ادام قازا تاپتى.