پرەمەر-ءمينيستردىڭ ورىنباسارى – ۇكىمەت اپپاراتىنىڭ باسشىسى عالىمجان قويشىباەۆ باستاعان وتاندىق دەلەگاتسيا قاتار استاناسى دوحا قالاسىندا وتكەن الەۋمەتتىك دامۋ تۋرالى ەكىنشى دۇنيەجۇزىلىك سامميتكە قاتىستى.
ءىس-شاراعا 180 جوعارى دەڭگەيدەگى وكىل قاتىستى. ولاردىڭ قاتارىندا مەملەكەت جانە ۇكىمەت باسشىلارى, مينيسترلەر, حالىقارالىق ۇيىمداردىڭ وكىلدەرى بولدى. سامميتكە اكادەميالىق ورتا, بيزنەس وكىلدەرى مەن ۇكىمەتتىك ەمەس ۇيىمدار دا قوسىلدى. جيىننىڭ نەگىزگى ماقساتى – جاھاندىق الەۋمەتتىك ماسەلەلەردى تالقىلاۋ, الەۋمەتتىك تۇراقتىلىقتى كۇشەيتۋ, ينكليۋزيۆتى ەكونوميكالىق ءوسۋدى دامىتۋ ءارى بۇۇ-نىڭ ورنىقتى دامۋ ماقساتتارىنا قول جەتكىزۋ جولدارىن قاراستىرۋ.
ەلىمىزدىڭ دەلەگاتسياسىنىڭ باسشىسى پلەنارلىق وتىرىستا ءسوز سويلەپ, الەۋمەتتىك دامۋدىڭ ءادىل, تۇراقتى الەم قۇرۋداعى ماڭىزىن اتاپ ءوتتى. ونىڭ ايتۋىنشا, پرەزيدەنت قاسىم-جومارت توقاەۆتىڭ باسشىلىعىمەن ەلىمىزدە ازاماتتاردىڭ ءال-اۋقاتىن ارتتىرۋ, تەڭ مۇمكىندىكتەر قامتاماسىز ەتۋ, الەۋمەتتىك ادىلەتتىلىكتى كۇشەيتۋ باعىتىندا كەڭ اۋقىمدى رەفورمالار جۇرگىزىلىپ جاتىر.
پرەمەر-ءمينيستردىڭ ورىنباسارى ەلىمىزدىڭ جاڭا تەحنولوگيالاردى ءتيىمدى پايدالانۋ ارقىلى وڭىرلىك كوشباسشى ەكەنىن ايتتى. ول ەكونوميكامىزدىڭ ءوسۋىن قولداۋ مەن حالىقتىڭ ءومىر ساپاسىن جاقسارتۋ ءۇشىن يننوۆاتسيا مەن تسيفرلاندىرۋ سالاسىنداعى باسىمدىقتاردى ايتتى.
عالىمجان قويشىباەۆ ەلىمىز بىرىككەن ۇلتتار ۇيىمى جارعىسىنىڭ قاعيداتتارىنا بەرىك ەكەنىن اتاپ ءوتتى. ەلىمىزدىڭ حالىقارالىق ىنتىماقتاستىققا, ادىلەت پەن ادامي قادىر-قاسيەتكە نەگىزدەلگەن بولاشاق قۇرۋعا بەيىلدى ەكەنىن جەتكىزدى.
سامميت اياسىندا قاتار مەملەكەتىنىڭ پرەمەر-ءمينيسترى جانە سىرتقى ىستەر ءمينيسترى شەيح مۇحاممەد بەن ابدۋلراحمان ءال تانيمەن ەكىجاقتى كەلىسسوزدەر ءوتتى. تاراپتار ەكى ەل اراسىنداعى ستراتەگيالىق سەرىكتەستىكتى اتاپ ءوتىپ, ەنەرگەتيكا, تەلەكوممۋنيكاتسيامەن قاتار باسقا دا باعىتتار بويىنشا بىرلەسكەن جوبالاردى تالقىلادى. سونداي-اق پرەزيدەنت قاسىم-جومارت توقاەۆتىڭ 2024 جىلعى اقپانداعى قاتارعا ساپارىندا جاسالعان كەلىسىمدەردى ىسكە اسىرۋعا نازار اۋدارىلدى.
ساپار بارىسىندا عالىمجان قويشىباەۆ قاتاردىڭ بايلانىس جانە اقپاراتتىق تەحنولوگيالار ءمينيسترى مۇحاممەد بەن ءالي ءال-مانايمەن كەزدەستى. تاراپتار تسيفرلاندىرۋ, تەلەكوممۋنيكاتسيالىق ينفراقۇرىلىم جانە ەلەكتروندىق ۇكىمەت سالاسىندا تاجىريبە الماسۋ مۇمكىندىكتەرىن قاراستىردى.
سونداي-اق دەلەگاتسيا باسشىسى «Power International Holding» كومپانياسىنىڭ توراعاسى مۋاتاز ءال-حاياتپەن كەزدەستى. تاراپتار حولدينگتىڭ ەلىمىزدەگى جوبالارىن ىسكە اسىرۋ ماسەلەلەرىن تالقىلادى.