پرەمەر-ءمينيسترىنىڭ ورىنباسارى – ۇكىمەت اپپاراتىنىڭ باسشىسى عالىمجان قويشىباەۆ باستاعان قازاقستاندىق دەلەگاتسيا قاتار مەملەكەتىنىڭ استاناسى دوحا قالاسىندا وتكەن الەۋمەتتىك دامۋ جونىندەگى ەكىنشى دۇنيەجۇزىلىك سامميتكە قاتىستى, دەپ جازادى Egemen.kz.
ءىس-شاراعا جوعارى دەڭگەيدەگى 180 وكىل, ونىڭ ىشىندە مەملەكەتتەر مەن ۇكىمەتتەر باسشىلارى, مينيسترلەر, حالىقارالىق ۇيىمداردىڭ وكىلدەرى قاتىستى. سامميت جۇمىسىنا اكادەميالىق جانە ىسكەر توپتار, ۇكىمەتتىك ەمەس ۇيىمدار دا قوسىلدى. ءسامميتتىڭ باستى ماقساتى – جاھاندىق الەۋمەتتىك ماسەلەلەردى شەشۋ, سونداي-اق الەۋمەتتىك ورنىقتىلىق شارالارىن نىعايتۋ, ينكليۋزيۆتى ەكونوميكالىق ءوسۋدى قامتاماسىز ەتۋ جانە بۇۇ-نىڭ ورنىقتى دامۋ ماقساتتارىنا قول جەتكىزۋ جونىندەگى ستراتەگيالاردى تالقىلاۋ جانە ازىرلەۋ.
قازاقستان دەلەگاتسياسىنىڭ باسشىسى پلەنارلىق وتىرىستا سويلەگەن سوزىندە الەۋمەتتىك دامۋ تۇراقتى ءارى ادىلەتتى الەمنىڭ نەگىزى ەكەنىن اتاپ ءوتتى. ول قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ باسشىلىعىمەن ەلىمىزدە ازاماتتاردىڭ ءال-اۋقاتىن جاقسارتۋعا, تەڭ مۇمكىندىكتەردى قامتاماسىز ەتۋگە جانە الەۋمەتتىك ادىلەتتىلىكتى نىعايتۋعا باعىتتالعان كەڭ اۋقىمدى ساياسي جانە ەكونوميكالىق رەفورمالار جۇزەگە اسىرىلىپ جاتقانىن اتاپ ءوتتى.
پرەمەر-ءمينيستردىڭ ورىنباسارى قازاقستاننىڭ جاڭا تەحنولوگيالاردى پايدالانۋ سالاسىنداعى وڭىرلىك كوشباسشىلىعىن اتاپ ءوتىپ, ەلىمىزدىڭ ەكونوميكالىق ءوسۋىن قولداۋ جانە ازاماتتاردىڭ ءومىر ءسۇرۋ ساپاسىن ارتتىرۋ ماقساتىنداعى يننوۆاتسيالار مەن تسيفرلاندىرۋ سالاسىنداعى باسىمدىقتارىمەن ءبولىستى.
عالىمجان قويشىباەۆ قازاقستان رەسپۋبليكاسىنىڭ بىرىككەن ۇلتتار ۇيىمى جارعىسىنىڭ ماقساتتارى مەن قاعيداتتارىنا, حالىقارالىق ىنتىماقتاستىققا جانە ادىلدىك پەن ادامي قادىر-قاسيەتكە نەگىزدەلگەن بولاشاقتى قۇرۋعا بەيىلدىلىگىن راستادى.
سامميت اياسىندا قاتار مەملەكەتىنىڭ پرەمەر-ءمينيسترى – سىرتقى ىستەر ءمينيسترى شەيح مۇحاممەد بەن ابدۋلراحمان ءال تانيمەن ەكىجاقتى كەلىسسوزدەر ءوتتى. كەزدەسۋ بارىسىندا تاراپتار قازاقستان-قاتار قاتىناستارىنىڭ ستراتەگيالىق سيپاتىن اتاپ ءوتىپ, ەنەرگەتيكا, تەلەكوممۋنيكاتسيا جانە باسقا دا سالالارداعى بىرلەسكەن ينۆەستيتسيالىق جوبالاردى جۇزەگە اسىرۋدى قوسا العاندا, ەكىجاقتى ءوزارا ءىس-قيمىلدىڭ وزەكتى ماسەلەلەرىن تالقىلادى. پرەزيدەنت قاسىم-جومارت توقاەۆتىڭ 2024 جىلعى اقپانداعى قاتارعا مەملەكەتتىك ساپارى بارىسىندا قول جەتكىزىلگەن ۋاعدالاستىقتاردى جۇزەگە اسىرۋعا ەرەكشە نازار اۋدارىلدى.
ساپار اياسىندا عالىمجان قويشىباەۆ قاتاردىڭ بايلانىس جانە اقپاراتتىق تەحنولوگيالار ءمينيسترى مۇحاممەد بەن ءالي ءال-مانايمەن كەزدەسۋ وتكىزدى, وندا تسيفرلاندىرۋ, تەلەكوممۋنيكاتسيالىق ينفراقۇرىلىم سالاسىنداعى ىنتىماقتاستىق, سونداي-اق ەلەكتروندىق ۇكىمەت سالاسىنداعى تاجىريبە الماسۋ پەرسپەكتيۆالارى تالقىلاندى.
قاتار تاراپىنا جاساندى ينتەللەكت سالاسىندا جۇزەگە اسىرىلىپ جاتقان جوبالار دا ۇسىنىلدى. كەزدەسۋ قورىتىندىسى بويىنشا تاراپتار وسى باعىتتاعى ءوزارا ءىس-قيمىلدى كۇشەيتۋگە كەلىستى.
سونىمەن قاتار قازاقستاندىق دەلەگاتسيا باسشىسى Power International Holding كومپانياسىنىڭ توراعاسى مۋاتاز ءال-حاياتپەن جۇمىس بابىنداعى كەلىسسوزدەر جۇرگىزىپ, ونىڭ بارىسىندا قازاقستاندا حولدينگتىڭ جوبالارىن جۇزەگە اسىرۋ, سونداي-اق ىنتىماقتاستىقتى ودان ءارى كەڭەيتۋ ماسەلەلەرى تالقىلاندى.