قازاقستاننىڭ عالامدىق ينۆەستيتسيالار جونىندەگى دوڭگەلەك ۇستەلى (KGIR-2025) اياسىندا سىرتقى ىستەر ءمينيسترىنىڭ ورىنباسارى الىبەك قۋانتىروۆ شەتەلدىك سەرىكتەستەرمەن بىرقاتار ەكىجاقتى كەزدەسۋ وتكىزدى. ءىس-شارا بارىسىندا ساۋدا-ەكونوميكالىق جانە ينۆەستيتسيالىق ءوزارا ءىس-قيمىلدى نىعايتۋ ماسەلەلەرى قارالدى, دەپ جازادى Egemen.kz.
العاشقى كەزدەسۋ بىرىككەن اراب امىرلىكتەرىنىڭ ينۆەستيتسيالار جونىندەگى ۆيتسە-ءمينيسترى مۋحاممەد ابدۋرراحمان الحاۋيمەن ءوتتى. تاراپتار ساۋدا جانە ينۆەستيتسيالىق ىنتىماقتاستىقتى كەڭەيتۋ, شەتەلدىك ينۆەستيتسيالاردى تارتۋ سالاسىنداعى تاجىريبە الماسۋ, سونداي-اق بىرلەسكەن ينفراقۇرىلىمدىق جانە يندۋستريالىق جوبالاردى ىسكە اسىرۋ پەرسپەكتيۆالارىن تالقىلادى.
ەرەكشە نازار – قازاقستان-ءباا ستراتەگيالىق ينۆەستيتسيالار پلاتفورماسى شەڭبەرىندەگى كووپەراتسيا مۇمكىندىكتەرىنە جانە مەملەكەتتىك-جەكەمەنشىك سەرىكتەستىك سالاسىنداعى ۇزدىك تاجىريبەلەرمەن الماسۋعا اۋدارىلدى.
كەلەسى كەزدەسۋدە ءا.قۋانتىروۆ «Orascom Construction PLC» كومپانياسىنىڭ بيزنەستى دامىتۋ جونىندەگى ۆيتسە-پرەزيدەنتى تامەر شافيكپەن كەلىسسوزدەر جۇرگىزدى. تاراپتار كومپانيانىڭ ەلىمىزدەگى ينفراقۇرىلىمدىق جانە ەنەرگەتيكالىق جوبالارعا, سونىڭ ىشىندە سۋ ەلەكتر ستانسالارىنىڭ, گاز ەلەكتر ستانسالارىنىڭ جانە سۋمەن جابدىقتاۋ نىساندارىنىڭ قۇرىلىسىنا قاتىسۋ الەۋەتىن ءسوز ەتتى.
باسقوسۋ قورىتىندىسىندا ەكىجاقتى ستراتەگيالىق سەرىكتەستىكتى دامىتۋعا, كومپانيانىڭ ءبىزدىڭ ەلدەگى باسىم ينفراقۇرىلىمدىق جوبالارعا قاتىسۋىنا جانە ەنەرگەتيكا, سۋ رەسۋرستارى مەن كولىك ينفراقۇرىلىمى سالالارىندا ينجەنەرلىك-تەحنولوگيالىق شەشىمدەرمەن الماسۋعا ءوزارا مۇددەلىلىك ءبىلدىردى.
«Kazakh Invest» ۇلتتىق كومپانياسى ءسىم ينۆەستيتسيالار كوميتەتىمەن بىرلەسىپ, KGIR-2025 ينۆەستيتسيالىق ترەگى شەڭبەرىندە قول جەتكىزىلگەن ۋاعدالاستىقتاردى ىسكە اسىرۋدى جانە ينۆەستورلارمەن جۇمىستى ۇيلەستىرۋدى جالعاستىرادى.
ايتا كەتەيىك, «Orascom Construction PLC» – تاياۋ شىعىس پەن سولتۇستىك افريكاداعى ەڭ ءىرى حالىقارالىق مەردىگەرلەردىڭ ءبىرى. كومپانيا الەمنىڭ 20-دان اسا ەلىندە 200-دەن اسا بەلسەندى جوبانى جۇزەگە اسىرىپ كەلەدى. ونىڭ پورتفەلىنە قۋاتى 30 گۆت-تان اساتىن ەنەرگەتيكالىق نىساندار, اقش, ەگيپەت جانە ساۋد ارابياسىنداعى ينفراقۇرىلىمدىق جوبالار, سونداي-اق تاۋلىگىنە 17 ملن تەكشە مەتر سۋ تازارتۋ جانە تۇششىلاندىرۋ ستانسالارى كىرەدى. سونداي-اق «Orascom» – افريكاداعى العاشقى «جاسىل» سۋتەك وندىرەتىن كەشەننىڭ جانە قۋاتى 650 مۆت بولاتىن Red Sea Wind Farm جەل ەلەكتر ستانساسىنىڭ ازىرلەۋشىسى.
ەسكە سالساق, استانادا جاھاندىق ينۆەستيتسيالار جونىندەگى VIII قازاقستاندىق دوڭگەلەك ۇستەل ءوتتى. فورۋمعا 50-دەن اسا ەلدەن مىڭنان اسا ءىرى ينۆەستورلار مەن كومپانيا باسشىلارى كەلدى. جيىن ناتيجەسىندە جالپى سوماسى 7,5 ملرد دوللار بولاتىن 49 كەلىسىمگە قول قويىلدى. ونىڭ 3,8 ملرد دوللارى – ناقتى كوممەرتسيالىق جوبالار.
بيىلعى 9 ايدا ءىجو 6,3%-عا, ال ينۆەستيتسيا كولەمى 13,5%-عا وسكەن. Moody’s اگەنتتىگى قازاقستاننىڭ كرەديتتىك رەيتينگىن «تۇراقتى» دەگەن دەڭگەيگە كوتەرگەن.