جەتىسۋ تورىندەگى ەرەكشە فەستيۆال

بەس كۇن بويى تالدىقورعان قالاسى تەاتر ونەرىنىڭ حالىقارالىق ورتالىعىنا اينالىپ, كورەرمەندەر وتاندىق جانە شەتەلدىك تەاترلاردىڭ ۇزدىك قويىلىمدارىن تاماشالاۋ مۇم­كىن­دىگىنە يە بولدى. فەستيۆال اياسىندا ەلىمىزدىڭ جەتەكشى تەاتر­لارىمەن قاتار گرۋزيا, تۇركيا جانە وزبەكستاننان كەلگەن شى­عار­ماشىلىق ۇجىمدار ءوز ونەر­لەرىن ورتاعا سالىپ, كورەر­مەن­نىڭ ىستىق ىقىلاسىنا بولەندى. تۇركيانىڭ تاۋەلسىز «Painted Bird» تەاترىنىڭ جەتەكشىسى جالە كارابەكير قۋانى­شىن جاسىرا المادى.

«Biken Fest» فەستيۆالىنە قاتى­سۋ ءبىز ءۇشىن ۇلكەن مارتەبە. ونەر الەمىندە وزىندىك قولتاڭباسىن قالدىرعان بيكەن ريموۆا سىندى تۇلعانىڭ قۇرمەتىنە ارنالعان فەستيۆالدەن شاقىرتۋ الۋ ەرەك­شە قۋانىش سىيلادى. ۇيىمداس­تىرۋ دەڭگەيى وتە جوعارى. ءارتۇرلى باعىت­تاعى قويىلىمداردى تاماشالاپ, كوپتەگەن شىعارماشى­لىق تاجىري­بە جينادىق. ءبىزدى شاقىرعان ۇيىم­داستىرۋشىلارعا شىنايى العى­سىمىزدى بىلدىرە­مىز», دەدى ول.

اتالعان فەستيۆال تەك ونەردى باسەكەلەستىك الاڭىنا ەمەس, شىعار­ما­شىلىق ديالوگ پەن مادە­ني بايلانىستى نىعايتۋدىڭ قۇرالىنا اينالدىردى. سوندىقتان مۇندا جەڭىمپاز بەن جەڭىلگەن جوق. بارلىق قاتىسۋشى تەاتر ۇجىم­دارى جوعارى كاسىبي شەبەر­لىگى مەن ساحنالىق ىزدەنىستەرى ءۇشىن ارنايى ديپلومدارمەن ماراپاتتالدى.

«قازاق كورەرمەنى ءبىزدى ەرەكشە جىلى قارسى الدى. حالىقتىڭ قوناقجايلىعى مەن مادەنيەتكە دەگەن قۇرمەتىن سەزىندىك. بۇل ساپار ۇمى­تىلماس اسەر قالدىردى. بولاشاقتا قازاقستانعا تاعى دا كەلۋدى قالاي­مىز», دەدى تۇركيالىق تەاتر ءارتىسى پەلين ورۋچ.

فەستيۆال بارىسىندا ءار ەلدىڭ تەاتر مەكتەپتەرى مەن ساحنالىق داستۇرلەرى توعىسىپ, تاجىريبە ال­ماسۋعا مۇمكىندىك تۋدى. بۇل ءوز كەزەگىندە تەاتر ونەرىنىڭ دامۋىنا تىڭ سەرپىن بەرىپ, شىعارماشىلىق ىزدەنىستەردىڭ كوكجيەگىن كەڭەيتەدى. سونىمەن قاتار قازاق تەاتر ونەرىن حالىقارالىق دەڭگەيدە تانىتۋعا جانە ۇلتتىق مادەني قۇن­دى­لىق­تاردى دارىپتەۋگە نەگىز بولدى. بيكەن ريموۆا سىندى ساحنا ساڭ­لا­عى­نىڭ ەسىمىن ۇلىقتاۋ ارقىلى جاس ۇر­پاققا ونەردىڭ قادىر-قاسيەتى ناسيحاتتالدى.

قازاقستاننىڭ ەڭبەك سىڭىر­گەن قايراتكەرى, اكتەر كەندە­باي تەمىرباي ۇلى مۇنداي جوبا­لار­دىڭ حالىقارالىق مادەني بايلانىستاردى دامىتۋداعى ءرولى ەرەكشە ەكەنىن اتاپ ءوتتى.

«بۇل فەستيۆالدىڭ جىل سايىن وتكىزىلۋى ونىڭ مازمۇنى قايتا­لانادى دەگەن ءسوز ەمەس. ءار جىلى جاڭا تەاترلار كەلىپ, جاڭا شى­عار­ما­شىلىق ىزدەنىستەر مەن تىڭ يدەيالار ۇسىنىلادى. مۇنداي مادەني جوبالار حالىقتاردى جا­قىن­داستىرىپ, مەملەكەتتەر ارا­­سىن­داعى دوستىق پەن مادەني بايلانىستى نىعايتادى. بۇل – الەمنىڭ ءار قيىرىنان كەلگەن ونەر مايتالماندارىنىڭ باسىن قوساتىن ۇلكەن رۋحاني الاڭ. اسىرەسە جاستاردىڭ تەاتر ونەرىنە قىزى­عۋشىلىعىنىڭ ارتۋىنا ىقپال ەتەتىنى قۋانتادى. قازاقستان تەاتر ونەرىنىڭ ابىزى ءاسانالى ءاشىموۆ­تىڭ باستاماسىمەن دۇنيەگە كەلگەن «Biken Fest» بۇگىندە حالىقارالىق تەاتر كەڭىستىگىندە وزىندىك ورنى بار بەدەلدى فەستيۆالگە اينالدى», دەدى ول.

فەستيۆالدىڭ جابىلۋ ءراسىمى دە ەرەكشە اسەرلى ءوتتى. كەش بارىسىندا « ۇلىتاۋ» ەتنوروك توبى, ءانشى ماقسات راحمەت, «قاراقات» مەكتەپ-ستۋدياسىنىڭ «جەتىگەن­شى­لەر» ءانسامبلى مەن دانەش راقىشەۆ اتىنداعى وبلىستىق فيلار­مو­نيا­نىڭ «جەتىسۋ» بي ءانسامبلى ونەر كورسەتىپ, كورەرمەندەرگە كوتەرىڭكى كوڭىل كۇي سىيلادى.

وسىلايشا, IV حالىقارالىق «Biken Fest» تەاتر فەستيۆالى قورى­تىندىلاندى. الايدا ونىڭ ساحنا تورىندە باستالعان شىعار­ما­شى­لىق بايلانىستارى مەن رۋحاني اسەرى الداعى ۋاقىتتا دا جالعاسىن تابارى ءسوزسىز.

جەتىسۋ وبلىسى