اناستاسيا كۋليك تاعدىرىنىڭ ءبىر-اق كۇندە وزگەرىپ شىعا كەلەتىنىن ءتىپتى ويلاماعان ەدى. جاستايىنان جەتىمدەر ۇيىندە تاربيەلەنگەن ول مەيىربان جانداردىڭ كومەگىنىڭ ارقاسىندا كوپتەن ارمانداعان پاتەرىن ساتىپ الدى.
اناستاسيانىڭ جاسى 32-دە. جەتىمدەر ۇيىندە تاربيەلەنگەن نازىك قىز جاستايىنان تاعدىر تاۋقىمەتىن باستان كەشىردى. باسىندا باسپاناسى, جانىندا كومەكتەسەتىن بىردە-ءبىر جاقىن تۋىسى جوق ول مۇڭعا ءجيى باتىپ, قيىندىقتان شىعاتىن جولدى ىزدەيتىن. قارىزعا باتىپ العان پاتەرىنىڭ قۇنىن تولەۋ قورقىنىشقا اينالدى. ونسىز دا از جالاقىسى ءىشىپ-جەمىنەن ارتىلمايتىن. بىردە ناستيا Instagram-داعى پاراقشاسىندا اينالاسىنداعى مەيىربان ادامدار كورەر, ەستىر دەگەن ۇمىتپەن ءوزىنىڭ ارمانى جايىندا باياندادى. نەبارى 5 مىڭداي عانا جازىلۋشىسى بار ونىڭ بۇل بەينەروليگى سول ساتتە عالامتوردى شارلاپ, مىڭداعان ادامعا تاراپ كەتەتىنىن كىم بىلگەن.
«ەگەر تىم بولماعاندا 30 مىڭ ادام 200 تەڭگەدەن اۋدارسا, جەكە پاتەرىم بولار ەدى. مەن الەمگە, ونداعى ادامداردىڭ شەكسىز مەيىرباندىعىنا سەنەمىن», دەگەن سوزدەرى مىڭداعان جۇرەكتى جىلىتقانى انىق ەدى. بەينەروليك جاريالانعان ساتتەن باستاپ مۇلدە بەيتانىس ادامدار ونىڭ ەسەپشوتىنا اقشا اۋدارا باستاعان. ارادا تاۋلىك وتكەندە اناستاسيانىڭ شوتىندا ءبىر پاتەردىڭ قۇنىنا جەتەتىن اقشا جينالادى.
– ومىرىمدە مۇنداي تاڭعاجايىپ وقيعا بولعانىنا ءالى كۇنگە سەنە الار ەمەسپىن. ءاۋ باستا بانكتەن ءماجبۇرلى تۇردە اقشالاي نەسيە راسىمدەگەن ەدىم. وعان قۇنى 5,5 ملن تەڭگە تۇراتىن, اۋماعى 20,5 شارشى مەتر ءبىر بولمەلى شاعىن پاتەر ساتىپ الدىم. ال وتانداستارىم ءبىر تاۋلىك ىشىندە 8 ملن تەڭگەدەن استام قاراجات جيىپ بەرەدى دەپ كىم ويلاعان؟ جينالعان اقشامەن بانكتەن العان نەسيەمدى, ياعني ءۇيدىڭ قۇنىن تولىقتاي وتەدىم. قالعان قاراجاتتىڭ ءبىر بولىگىن پاتەرىمدى جوندەۋگە جۇمساپ جاتىرمىن. سونداي-اق انام مەن اجەمنىڭ زيراتتارىنىڭ باسىنداعى ەسكەرتكىشتەرىن جاڭالاسام دەيمىن. ماعان وسى كۇندەرى كومەك سۇراپ حابارلاسقاندار بار. قاتەرلى دەرتكە شالدىققان ەكى ادامعا قاراجات اۋداردىم. ادامدار ماعان ءالى كۇنگە اقشا اۋدارۋلارىن قويار ەمەس. سوندىقتان اقشا جيناۋدى توقتاتتىم. كومەك كورسەتكەن ادامدارعا العىسىم شەكسىز. مەيىربان جانداردىڭ اينالامىزدا كوپ ەكەنىنە شىن مانىندە كوز جەتكىزدىم. ءوزىمنىڭ ءالى دە وزگەلەرگە كەرەك ەكەنىمدى جان دۇنيەممەن سەزىندىم, – دەپ تولعاندى اناستاسيا.
اناستاسيا 8 جاسقا تولعاندا اناسى اۋىر دەرتتەن كوز جۇمىپ, بالالار ۇيىنە تاربيەلەنەدى. اناسىنىڭ ءولىمى جانىنا قاتتى باتقان بويجەتكەن ۇزاق جىلدار پسيحولوگيالىق كۇيزەلىستە جۇرگەن. دەگەنمەن ومىرگە قۇشتار قىز ءبىلىم الۋعا ۇمتىلىپ, قاتارلاستارىنىڭ الدى بولۋعا تىرىسادى. اۋەلى جەتىم بالالار مەن اتا-اناسىنىڭ قامقورلىعىنسىز قالعان بالالارعا ارنالعان №1 مەكتەپ-ينتەرناتتا, ودان سوڭ №2 مەكتەپ-ينتەرناتتا تاربيەلەندى. مەكتەپتى تامامداعاننان كەيىن اقسۋ قالاسىنداعى جاياۋ مۇسا اتىنداعى كوپسالالى كوللەدجگە وقۋعا ءتۇسىپ, رەجيسسەر ماماندىعىن الىپ شىعادى. سودان سوڭ رەسەيدىڭ ومبى مەملەكەتتىك ۋنيۆەرسيتەتىنە قۇجات تاپسىرىپ, تەاتر جانە كينو اكتەرى ماماندىعىن مەڭگەرگەن.
– كوللەدجدە وقىپ جۇرگەندە باستاپقىدا باسپانا ماسەلەسى اسا قيىن بولدى. سول ۋاقىتتا ماعان قامقورلىق تانىتىپ, ءوز ۇيىندە تۇرعىزعان ۇستازىم قايىرجان بەيسەنباەۆتىڭ كومەگىن ءالى كۇنگە ۇمىتپايمىن. سودان تسيرك ونەرىنىڭ ءبىر ءتۇرى – بىرنەشە دوپتى ءبىر ۋاقىتتا قاقپاقىلداۋدى ۇيرەنىپ الدىم. ول كەيىن ومبىدا وقىپ جۇرگەندە كۇنكورىسىمە قاراجات تابۋىما سەپ بولدى. كوشەدە تۇرىپ ونەر كورسەتەتىنمىن. ادامدار اقشا بەرىپ كەتەدى. ءسويتىپ, ىشەر اسىما, كيىمىمە قاجەت اقشا تاپتىم, – دەيدى اناستاسيا.
ومبى ۋنيۆەرسيتەتىن ءتامامداپ پاۆلودارعا ورالعان سوڭ شاھارداعى چەحوۆ اتىنداعى دراما تەارىنا شاقىرۋ الادى. العاشقى كەزەڭدە كوپشىلىك رولدەردى سومداپ ءجۇردى. «دۋبروۆسكي» قويىلىمىندا رەجيسسەرلەردىڭ كوزىنە ءتۇسىپ, «تانگو نا ترويح» سپەكتاكلىندە ءۇي قىزمەتشىسىنىڭ ءرولى سەنىپ تاپسىرىلادى. كەيىن «ليۋبوۆ ي گولۋبي», «ماستەر ي مارگاريتا», تاعى باسقا قويىلىمداردا سالماقتى رولدەردى سومدادى. بۇگىندە ناستيانىڭ اكتەرلىك شەبەرلىگى شىڭدالىپ, قالىپتاسۋ ۇستىندە. كەيىنگى ۋاقىتتا كينو كاستينگتەرگە قاتىسىپ ءجۇر. سونىمەن بىرگە يوگا ونەرىن ۇيرەنىپ, يوگا جاتتىقتىرۋشىسى اتانعان.
ونىڭ ايتۋىنشا, مەيىربان ادامدارى كوپ قوعامنىڭ بولاشاعى زور. مەملەكەتتىك ءتىلدى مەكتەپ كەزىندە مەڭگەرمەي قالعانىن وزىنە ۇلكەن كەمشىلىك دەپ سانايتىنىن, الداعى ۋاقىتتا قازاق ءتىلىن ۇيرەنۋدى مىقتاپ قولعا الاتىنىن جەتكىزدى.
پاۆلودار وبلىسى