مەملەكەت باسشىسى «اكىمشىلىك ادىلەت جانە ونىڭ قۇقىق ۇستەمدىگىن قامتاماسىز ەتۋ ىسىندەگى ءرولى» اتتى حالىقارالىق فورۋمدا زاڭ مەن ءتارتىپ قاعيداتىن ۇلتتىق بولمىسىمىزدىڭ اجىراماس بولىگىنە اينالدىرۋىمىز كەرەك ەكەنىن ايتتى, دەپ حابارلايدى Egemen.kz.
«سوڭعى جىلدارى مەملەكەتىمىز اسا اۋقىمدى قۇقىقتىق جانە قوعامدىق جاڭعىرۋ جولىنا ءتۇستى. ەلىمىزدە جاڭا ساياسي مادەنيەت قالىپتاسا باستادى. ءبىز وركەنيەتتى ەل رەتىندە زاڭ مەن ءتارتىپ قاعيداتىن ۇلتتىق بولمىسىمىزدىڭ اجىراماس بولىگىنە اينالدىرۋىمىز كەرەك. بارشا ازاماتتارعا, اسىرەسە, جاستارعا زاڭدى قۇرمەتتەۋ, زاڭعا باعىنۋ قاجەت ەكەنىن قاراپايىم تىلمەن جان-جاقتى تۇسىندىرگەن ءجون. زاڭدى قادىرلەۋ, ءتارتىپتى قولداۋ, بۇل – ءار ادامنىڭ جارقىن ومىرىنە جول اشاتىن ماڭىزدى شارت», دەدى پرەزيدەنت.
وسى ورايدا ول جالپىۇلتتىق رەفەرەندۋمدا قابىلدانعان جاڭا كونستيتۋتسيامىزدا وسى نەگىزگى قاعيدات تۋرالى انىق جازىلعانىن ەسكە سالدى.
«قازاقستاننىڭ باس قۇجاتى – بارشا ازاماتقا تەڭ مۇمكىندىك بەرەتىن ادىلەتتى قوعامنىڭ مىزعىماس تۇعىرى. ادام جانە ونىڭ ءومىرى – ەلىمىزدىڭ اتا زاڭىنا ارقاۋ بولعان باستى قۇندىلىق. كونستيتۋتسيادا ازاماتتاردىڭ قۇقىقتارى مەن بوستاندىقتارىن ساقتاۋ, زاڭ ۇستەمدىگىن قامتاماسىز ەتۋ, حالىقتىڭ تۇرمىس ساپاسىن جاقسارتۋ مەملەكەتتىڭ باستى مىندەتتەرى رەتىندە ايقىندالدى. تۇپتەپ كەلگەندە, جاڭا تۇرپاتتى ەل بولۋ جولىنداعى ءاربىر رەفورما, ەڭ الدىمەن, حالىقتىڭ قالاۋىمەن, جۇرتشىلىقتىڭ تىكەلەي قولداۋىمەن جاسالادى. ارينە, مۇنىڭ بارلىعى ءبىر ساتتە جۇزەگە اسپايتىنى بەلگىلى», دەدى مەملەكەت باسشىسى.
جاڭا كونستيتۋتسيانىڭ كۇشىنە ەنۋىنە 26 كۇن قالدى
ەسكە سالايىق, بۇگىن مەملەكەت باسشىسى 2026 جىلدىڭ 15 ناۋرىزىندا قابىلدانعان كونستيتۋتسيانىڭ ەرەجەلەرىن جۇزەگە اسىرۋ ماقساتىندا كونستيتۋتسيالىق زاڭدارعا قول قويدى.