تارباعاتاي اۋدانىنىڭ ورتالىعى اقجار اۋىلىندا «اۋىل – ەل بەسىگى!» مەملەكەتتىك باعدارلاماسى اياسىندا سالىنعان دەنە شىنىقتىرۋ-ساۋىقتىرۋ كەشەنىنىڭ اشىلۋى اۋىل جۇرتشىلىعى ءۇشىن عانا ەمەس, اۋدان سپورتى ءۇشىن دە ايتۋلى وقيعا بولدى. بۇل كۇنى سپورت نىسانى اشىلىپ, ارتىنشا كوكپار تارتىلدى.
كەيىنگى جىلدارى ەلىمىزدە بۇقارالىق سپورتتى دامىتۋعا ەرەكشە كوڭىل ءبولىنىپ كەلەدى. مەملەكەت باسشىسى قاسىم-جومارت توقاەۆ ءوز جولداۋلارىندا حالىقتىڭ سپورتپەن جۇيەلى اينالىسۋىنا جاعداي جاساۋ دەنى ساۋ ۇلت قالىپتاستىرۋدىڭ باستى العىشارتتارىنىڭ ءبىرى ەكەنىن ايتتى. وسى باعىتتاعى جۇمىستار وڭىرلەردە ناقتى جوبالار ارقىلى جۇزەگە اسىرىلىپ جاتىر. اقجار اۋىلىندا بوي كوتەرگەن جاڭا كەشەن سونىڭ جارقىن مىسالى. جالپى اۋماعى 1200 شارشى مەتردەن اساتىن نىسان تولىق زاماناۋي تالاپتارعا ساي جابدىقتالعان. ءبىر اۋىسىمدا 47 ادامعا دەيىن قابىلداي الاتىن كەشەندە سپورتشىلار مەن اۋىل تۇرعىندارىنىڭ الاڭسىز جاتتىعۋىنا بارلىق جاعداي جاسالعان.
سالتاناتتى ءىس-شاراعا ارنايى بارعان وبلىس اكىمى جاڭا نىساننىڭ اۋدان جاستارى ءۇشىن ماڭىزى زور ەكەنىن اتاپ ءوتتى.
– مەملەكەت باسشىسىنىڭ تاپسىرماسىمەن وبلىسىمىزدا بۇقارالىق سپورت جۇيەلى تۇردە دامىپ كەلەدى. تارباعاتاي دەگەندە ەڭ الدىمەن اۋدانداعى سايدىڭ تاسىنداي ۆولەيبولشىلارى ەسكە تۇسەدى. جاڭا كەشەندە تەك ۆولەيبول عانا ەمەس, وزگە دە سپورت تۇرلەرىنەن كوك تۋىمىزدى كوكتە جەلبىرەتەر چەمپيوندار شىعادى دەپ سەنەمىن, – دەدى ءوڭىر باسشىسى نۇرىمبەت ساقتاعانوۆ.
وبلىس اكىمى سپورت مەكەمەسىنە شاعىن اۆتوبۋستىڭ سەرتيفيكاتىن تابىس ەتتى.
بۇل تارباعاتاي اۋدانىندا ەل يگىلىگىنە بەرىلىپ وتىرعان ەكىنشى ءىرى سپورت نىسانى. كەشەندە باسكەتبول, ۆولەيبول, شاعىن فۋتبول, تەننيس, بادمينتون, بوكس, قازاق كۇرەسى, اۋىر اتلەتيكا سەكىلدى سپورت تۇرلەرىمەن اينالىسۋعا مۇمكىندىك بار. بارلىق زالدار قاجەتتى قۇرال-جابدىقتارمەن تولىق قامتاماسىز ەتىلگەن. سپورتشىلاردىڭ قولايلىلىعى ءۇشىن جۋىنۋ, كيىم اۋىستىرۋ بولمەلەرى, دارىگەر كابينەتى, جاتتىقتىرۋشىلارعا ارنالعان بولمەلەر قاراستىرىلعان. بۇل ءوز كەزەگىندە جاتتىعۋ ۇدەرىسىنىڭ ساپالى ءارى قاۋىپسىز ۇيىمداستىرىلۋىنا مۇمكىندىك بەرەدى.
تارباعاتاي اۋدانى ەجەلدەن سپورتتىق ءداستۇرى قالىپتاسقان وڭىرلەردىڭ ءبىرى. اسىرەسە اۋدان ۆولەيبول مەكتەبىمەن رەسپۋبليكا كولەمىندە تانىمال. جەرگىلىكتى سپورتشىلار سان مارتە وبلىستىق, رەسپۋبليكالىق جارىستاردا توپ جارىپ, اۋداندى تانىتىپ كەلەدى. سوندىقتان جاڭا سپورت كەشەنىنىڭ اشىلۋى اۋدان جاستارىنا تىڭ مۇمكىندىكتەرگە جول اشادى.
مامانداردىڭ ايتۋىنشا, اۋىلدىق جەرلەردە سپورت ينفراقۇرىلىمىن دامىتۋ جاستاردىڭ بوس ۋاقىتىن ءتيىمدى ۇيىمداستىرۋعا, سالاماتتى ءومىر سالتىن قالىپتاستىرۋعا, بۇقارالىق سپورتتى كەڭىنەن دامىتۋعا ىقپال ەتەدى. سونىمەن قاتار مۇنداي نىساندار تالانتتى سپورتشىلاردى انىقتاپ, ولاردىڭ كاسىبي دەڭگەيدە وسۋىنە جاعداي جاسايدى.
اشىلۋ راسىمىنەن كەيىن اقجار اۋىلىندا ارداگەر كوكپارشىلار اراسىندا اۋدانارالىق اشىق تۋرنير ءوتتى. ءدۇبىرلى دوداعا تارباعاتاي, ۇلان, زايسان, كۇرشىم, سامار اۋداندارىنان كەلگەن 50 جاستان اسقان ارداگەر كوكپارشىلار قاتىستى. ءار كوماندا قۇرامىندا 12 سپورتشىدان ونەر كورسەتتى. جارىستىڭ ەرەكشەلىگى سول, جاس بۋىن ەمەس, ۇلتتىق سپورتتىڭ بيىك بەلەسىن باعىندىرعان تاجىريبەلى شاباندوزدار باق سىنادى.
جالپى, ۇلتتىق سپورت تۇرلەرىن دامىتۋ مەملەكەتتىك دەڭگەيدەگى ماڭىزدى مىندەتتەردىڭ بىرىنە اينالعانى بەلگىلى. كەيىنگى جىلدارى ەلىمىزدىڭ تۇكپىر-تۇكپىرىندە كوكپار, بايگە, اۋدارىسپاق, تەڭگە ءىلۋ سياقتى ۇلتتىق سپورت تۇرلەرىنە قىزىعۋشىلىق ارتىپ كەلەدى. بۇل ءۇردىس جاستاردىڭ تاريحي تامىرىنا قايتا بەت بۇرۋىنا ىقپال ەتىپ جاتىر. اقجارداعى ءتۋرنيردىڭ نەگىزگى ماقساتى دا وسى – ۇلتتىق قۇندىلىقتاردى دارىپتەۋ, جاستاردى سپورتقا باۋلۋ, سالاماتتى ءومىر سالتىن ناسيحاتتاۋ. جارىستا جانكۇيەرلەر تارتىستى باسەكەنىڭ كۋاسى بولدى. ات ۇستىندەگى ايلا-ءتاسىل, شاپشاڭدىق پەن تاجىريبە ۇشتاسقان سايىس ۇلتتىق سپورتتىڭ ومىرشەڭدىگىن تاعى ءبىر مارتە دالەلدەدى.
شىعىس قازاقستان وبلىسى,تارباعاتاي اۋدانى