مەملەكەت باسشىسى 2026 جىلدىڭ 15 ناۋرىزىندا قابىلدانعان كونستيتۋتسيانىڭ ەرەجەلەرىن جۇزەگە اسىرۋ ماقساتىندا كونستيتۋتسيالىق زاڭدارعا قول قويدى, دەپ حابارلايدى Egemen.kz.
جاڭا زاڭدار ەلدىڭ مەملەكەتتىك باسقارۋ جۇيەسىن جەتىلدىرۋگە جانە بيلىك ينستيتۋتتارىنىڭ وكىلەتتىكتەرىن ناقتىلاۋعا باعىتتالعان.
«قازاقستان رەسپۋبليكاسىنىڭ پرەزيدەنتى تۋرالى» كونستيتۋتسيالىق زاڭى قازاقستان رەسپۋبليكاسى پرەزيدەنتىنىڭ قۇقىقتىق مارتەبەسىن, وكىلەتتىكتەرىن جانە قىزمەتىن, سونداي-اق قازاقستان رەسپۋبليكاسى ۆيتسە-پرەزيدەنتىنىڭ قۇقىقتىق مارتەبەسىن قامتاماسىز ەتۋ ءتارتىبىن ايقىندايدى.
زاڭنىڭ باستى جاڭالىعى – ۆيتسە-پرەزيدەنت ينستيتۋتىنىڭ قۇرىلۋى. مەملەكەت باسشىسىنىڭ تاپسىرماسى بويىنشا ۆيتسە-پرەزيدەنت مەملەكەتتىك ورگاندارمەن ءوزارا ءىس-قيمىل بارىسىندا ونىڭ مۇددەلەرىن بىلدىرەدى جانە پرەزيدەنت ايقىنداعان مىندەتتەردى ورىندايدى.
«قازاقستان رەسپۋبليكاسىنىڭ قۇرىلتايى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭى قۇرىلتايدى ۇيىمداستىرۋ مەن ونىڭ قىزمەتىن, زاڭ شىعارۋ پروتسەسىن جانە قۇرىلتايدىڭ وكىلەتتىكتەرىن جۇزەگە اسىرۋدىڭ وزگە دە نىساندارىن, ونىڭ دەپۋتاتتارىنىڭ قۇقىقتىق مارتەبەسىن بەلگىلەيدى. قۇرىلتاي – زاڭ شىعارۋشى بيلىكتى جۇزەگە اسىراتىن ەڭ جوعارى وكىلدى ورگان.
قۇرىلتاي پارتيالىق ءتىزىم بويىنشا سايلانعان 145 دەپۋتاتتان تۇرادى. دەپۋتاتتاردىڭ وكىلەتتىك مەرزىمى 5 جىلدى قامتيدى.
ورگاندى مەملەكەتتىك ءتىلدى جەتىك مەڭگەرگەن دەپۋتاتتار اراسىنان جاسىرىن داۋىس بەرۋ ارقىلى كوپشىلىك داۋىسپەن سايلاناتىن توراعا باسقارادى.
زاڭدا قۇرىلتاي وكىلەتتىكتەرىنىڭ كەڭ اۋقىمى, سونىڭ ىشىندە ۆيتسە-پرەزيدەنتتى, پرەمەر-ءمينيستردى, كونستيتۋتسيالىق سوت سۋديالارىن, ورتالىق سايلاۋ كوميسسياسىنىڭ, جوعارى اۋديتورلىق پالاتانىڭ مۇشەلەرىن تاعايىنداۋعا كەلىسىم بەرۋ, پرەزيدەنت ۇسىنۋى بويىنشا جوعارعى سوتتىڭ سۋديالارىن سايلاۋ جانە قىزمەتتەن بوساتۋ, سونداي-اق كونستيتۋتسيالىق سوت پەن جوعارعى سوت سۋديالارىن قولسۇعىلماۋشىلىق قۇقىنان ايىرۋ, پرەزيدەنت سايلاۋىن تاعايىنداۋ جانە بيۋدجەتتى بەكىتۋ سياقتى ماسەلەلەر ايقىندالادى.
كونستيتۋتسيانى نىعايتاتىن زاڭدار توپتاماسى
«قازاقستان حالىق كەڭەسى تۋرالى» كونستيتۋتسيالىق زاڭى قازاقستان حالىق كەڭەسىنىڭ قۇقىقتىق مارتەبەسىن, وكىلەتتىگىن, قۇرىلۋ ءتارتىبىن, قۇرامىن قالىپتاستىرۋدى جانە قىزمەتىن ۇيىمداستىرۋدى بەلگىلەيدى. قازاقستان حالىق كەڭەسى جوعارى كونسۋلتاتيۆتىك ورگان بولىپ سانالادى جانە ازاماتتىق قوعامنىڭ ەلدەگى ىشكى ساياساتتى قالىپتاستىرۋعا قاتىسۋىن قامتاماسىز ەتۋ ماقساتىندا قۇرىلادى. كەڭەستىڭ زاڭنامالىق باستاما كوتەرۋگە جانە جالپىحالىقتىق رەفەرەندۋم وتكىزۋدى ۇسىنۋعا قۇقىعى بار.
قازاقستان حالىق كەڭەسى قازاقستان رەسپۋبليكاسىنىڭ ازاماتتارىنان قۇرالادى. كەڭەس قۇرامىندا ەتنومادەني جانە قوعامدىق بىرلەستىكتەردىڭ, سونداي-اق ءماسليحاتتار مەن قوعامدىق كەڭەستەردىڭ وكىلدەرىنەن 42 ادامنان ءۇش تەڭ كۆوتا بويىنشا وكىلدىك قالىپتاسادى, ونى قازاقستان رەسپۋبليكاسىنىڭ پرەزيدەنتى بەكىتەدى. حالىق كەڭەسىنە توراعا باسشىلىق جاسايدى. كەڭەستىڭ وكىلەتتىك مەرزىمى 4 جىلدى قۇرايدى.
«قازاقستان رەسپۋبليكاسى استاناسىنىڭ مارتەبەسى تۋرالى» كونستيتۋتسيالىق زاڭى استانانىڭ جۇمىس ىستەۋى سالاسىنداعى قوعامدىق قاتىناستاردى رەتتەيدى جانە ونىڭ قۇقىقتىق, ەكونوميكالىق جانە ۇيىمدىق نەگىزدەرىن ايقىندايدى. قۇجاتتا ءماسليحاتتىڭ, جەرگىلىكتى ءوزىن-ءوزى باسقارۋ ورگانىنىڭ جانە قالا اكىمى جەتەكشىلىك ەتەتىن جەرگىلىكتى اتقارۋشى ورگاننىڭ وكىلەتتىكتەرى ناقتى بەلگىلەنگەن. سونىمەن قاتار, ەلوردانىڭ بىرىڭعاي ساۋلەتتىك كەلبەتى مەن ديزاين كودىنا قويىلاتىن تالاپتار بەكىتىلىپ, ينفراقۇرىلىمدى دامىتۋ جانە قالانى باسقارۋ جۇيەسىنىڭ نەگىزدەرى ايقىندالادى.
«اكىمشىلىك-اۋماقتىق قۇرىلىس تۋرالى» كونستيتۋتسيالىق زاڭ اكىمشىلىك-اۋماقتىق بىرلىكتەردى قۇرۋ جانە تاراتۋ, ولاردىڭ شەكارالارىن بەلگىلەۋ جانە وزگەرتۋ, تىركەۋ مەن ەسەپكە الۋ, اتاۋ بەرۋ جانە وزگەرتۋ ءتارتىبىن ايقىندايدى. زاڭنىڭ ماقساتى – ءتيىمدى مەملەكەتتىك باسقارۋ ءۇشىن قازاقستان رەسپۋبليكاسىنىڭ اۋماقتىق قۇرىلىمىن ۇتىمدى ۇيىمداستىرۋدى قامتاماسىز ەتۋ.
ەسكە سالا كەتەيىك, بۇعان دەيىن پارلامەنت اتالعان زاڭ جوبالارىن ەكىنشى وقىلىمدا ماقۇلداعان بولاتىن.