پاۆلودار اۋەجايىنداعى ۇشىپ-قونۋ جولاعىن جاڭارتۋ جۇمىسى كەلەر جىلدىڭ ورتاسىندا اياقتالىپ, ۇشاقتاردى قايتا قابىلدايتىن بولادى. جاقىندا اۋەجايدىڭ ۇشۋ-قونۋ جولاعىن قايتا جاڭارتۋ جونىندە جيىن ءوتىپ, ونىڭ بارىسىندا جوبانى اياقتاۋعا قاجەتتى قاراجات زاڭسىز شىعارىلعان اكتيۆتەردى ەلگە قايتارۋ ەسەبىنەن قالىپتاستىرىلعان ارنايى مەملەكەتتىك قوردىڭ قاراجاتى ەسەبىنەن قامتاماسىز ەتىلگەنى اتاپ ءوتىلدى.
ۇكىمەت ارنايى قوردان 9,3 ملرد تەڭگە ءبولۋ تۋرالى شەشىم قابىلداعان. بۇگىندە قاراجات ارنايى ەسەپشوتقا ءتۇستى, قاجەتتى كەلىسىم-شارتتار جاسالىپ, قازىناشىلىق ورگاندارىندا تىركەلدى. بولىنگەن قاراجاتتىڭ ەسەبىنەن جوبانى ىسكە اسىرۋ قارقىنىن ارتتىرىپ, 2026 جىلدىڭ شىلدە ايىندا تولىق اياقتاۋ جوسپارلانىپ وتىر.
باستاپقى كەستەدە جۇمىستار بيىلعى قاراشا ايىندا اياقتالادى دەپ جوسپارلانعان بولاتىن. الايدا جوبانىڭ قالعان بولىگىنە قاجەت 9,3 ملرد تەڭگەنى قارجىلاندىرۋ قاجەتتىلىگىنە بايلانىستى مەرزىمى وزگەرتىلدى. قايتا جاڭارتۋ جوباسى ۇشۋ-قونۋ جولاعىن 45 مەتردەن 60 مەترگە دەيىن كەڭەيتۋدى, قوزعالىس جولى مەن اۋەجاي پەررونىن قالپىنا كەلتىرۋدى, زاماناۋي جارىقتاندىرۋ, بەينەباقىلاۋ, درەناج جۇيەلەرىن ورناتۋدى قامتيدى. جۇمىستار اۋەجايدىڭ سايكەستىك سەرتيفيكاتىن ساقتاۋ قاجەتتىلىگىنە بايلانىستى ورىندالادى. باس مەردىگەر – «Kyrylys Group RK» جشس. جوبانىڭ جالپى قۇنى – 16,4 ملرد تەڭگە.
وڭىرلىك جولاۋشىلار كولىگى جانە اۆتوموبيل جولدارى باسقارماسىنىڭ مالىمەتىنشە, بۇگىندە جوسپارلانعان جۇمىستىڭ 47%-ى ورىندالعان. اۋماعى 178 مىڭ شارشى مەتر بولاتىن اسفالت-بەتون جابىنى فرەزەرلەنىپ, جەر قازۋ جۇمىسى مەن درەناج جۇيەسىن ورناتۋ اياقتالعان. ۇزىندىعى 16,2 كم بولاتىن قورشاۋدىڭ 95%-ى ورناتىلدى. جارىقتاندىرۋ, بەينەباقىلاۋ جۇيەلەرىن ورناتۋ جالعاسىپ جاتىر. مەردىگەر ۇيىم 1,4 ملرد تەڭگەدەن استام سوماعا ماتەريال مەن جابدىق ساتىپ العان. 35 مىڭ توننا قۇم-قيىرشىق تاس قوسپاسى جەتكىزىلىپ, قۋاتتىلىعى ساعاتىنا 240 توننا اسفالت-بەتون زاۋىتى ورناتىلعان.
وبلىس اكىمى اسايىن بايحانوۆ پاۆلودار اۋەجايىنىڭ ۇشۋ-قونۋ جولاعىن قايتا جاڭارتۋ وڭىردەگى ستراتەگيالىق ماڭىزى بار ينفراقۇرىلىمدىق جوبا ەكەنىن اتاپ ءوتتى.
«جاڭارتىلعان ۇشىپ-قونۋ جولاعى ۇشۋ قاۋىپسىزدىگىن ارتتىرۋعا, ءارتۇرلى ساناتتاعى اۋە كەمەلەرىن قابىلداۋعا مۇمكىندىك بەرەدى. جوبانى ىسكە اسىرۋ ينۆەستيتسيا تارتۋعا, اۋە رەيستەرىنىڭ باعىتىن ۇلعايتۋعا جاعداي جاسايدى. بۇل ءوڭىردىڭ كولىك-لوگيستيكا الەۋەتىن نىعايتۋدىڭ ماڭىزدى كەزەڭى بولادى», دەدى ايماق باسشىسى.
پاۆلودار وبلىسى