پاۆلوداردا حالىق قاھارماندارى مەن قازاقستاننىڭ ەڭبەك ەرلەرىنىڭ رەسپۋبليكالىق IV كونفەرەنتسياسى ءوتتى. ءىس-شارادا ۇلتتىق قۇندىلىقتار دارىپتەلىپ, جاستاردىڭ پاتريوتتىق رۋحىن نىعايتۋ, ازاماتتىق جاۋاپكەرشىلىكتى ارتتىرۋ, ۇرپاقتار ساباقتاستىعىن قالىپتاستىرۋ باعىتىندا تاعىلىمدى اڭگىمەلەر ايتىلدى.
ەكىباستۇز قالاسىندا باستالىپ, باياناۋىلدا جالعاسقان كونفەرەنتسيانىڭ ەڭ باستى ءماجىلىسى وبلىس ورتالىعىنداعى دوستىق ۇيىندە ءوتتى. ءىس-شاراعا وبلىس اكىمىنىڭ ورىنباسارى ايگۇل مالىكوۆا, حالىق قاھارمانى, گەنەرال-لەيتەنانت باقىتجان ەرتاەۆ قاتىسىپ, جاس ۇرپاقتى ەڭبەككە باۋلۋ, وتاندى ءسۇيۋ دەگەن نە, ەلى مەن جەرى ءۇشىن ادال ەڭبەك ەتۋگە تاربيەلەۋ جانە باسقا دا تاقىرىپتاردا تاعىلىمدى اڭگىمەلەر قوزعالدى.
– يگى ءىس-شارانىڭ باياناۋىل مەن ەكىباستۇز وڭىرىنەن باستاۋ الۋى تەگىننەن-تەگىن ەمەس. ءبىزدىڭ ءوڭىر – تالاي باتىرلار مەن ەل قورعاعان ەرلەردى دۇنيەگە اكەلىپ, حالقىمىزدىڭ رۋحان اسقاقتاتقان كيەلى ايماق. اتا-بابامىزدىڭ قايسارلىعى مەن باتىرلىعى بۇگىنگى ۇرپاقتى بىرلىككە, وتانىن سۇيۋگە ۇندەيدى. مەملەكەت باسشىسى قاسىم-جومارت توقاەۆ ءوز جولداۋىندا: ء«بىز كەشە كىم بولعانىمىزدى ۇمىتپايمىز. ءتول تاريحىمىزعا قۇرمەتپەن قارايمىز, ال كەلەشەكتە كىم بولاتىنىمىز تەك ءوز قولىمىزدا ەكەنىن جاقسى تۇسىنەمىن», دەگەن بولاتىن. ال حالقىمىزدىڭ اتا ءداستۇرى ەلدىگىمىزدىڭ تەمىرقازىعى دەگەن ەدى. سوندىقتان حالقىمىزدىڭ اتا ءداستۇرى ەلدىگىمىزدىڭ تەمىرقازىعى دەگىم كەلەدى, – دەدى ايگۇل قايىرتاسقىزى.
«تاۋەلسىز قازاقستاننىڭ حالىق باتىرلارى» قوعامدىق بىرلەستىگىنىڭ توراعاسى, گەنەرال-لەيتەنانت باقىتجان ەرتاەۆ جاستارعا وتان قورعاۋ دەگەنىمىز نەدەن باستالاتىنىن, وتانسۇيگىشتىك دەگەنىمىز نە ەكەنىن قاراپايىم تىلمەن ءتۇسىندىردى. حالىق قاھارمانى ءار ەر-ازامات ءۇشىن اسكەرگە بارۋ, ازاماتتىق بورىشىن وتەۋ وتان الدىنداعى ەڭ ۇلكەن پارىزى ەكەنىن اتاپ ءوتتى.
كونفەرەنتسياعا قازاقستاننىڭ ەڭبەك ەرى, ساتباەۆ قالاسىنان كەلگەن شاحتەر-پروحودچيك تۇرسىنبەك ماكىشەۆ, ەڭبەك ەرى, ورال قالاسىنداعى اسان تايمانوۆ اتىنداعى مەكتەپ-گيمنازيانىڭ ورىس ءتىلى مەن ادەبيەتى ءپانىنىڭ مۇعالىمى ەلمارا ترايسوۆا, ەڭبەك ەرى, ەكىباستۇز قالاسىنىڭ تۇرعىنى رىشات امىرەنوۆ, وبلىستىق ارداگەرلەر كەڭەسىنىڭ توراعاسى رىمتاي شوكەەۆ سىندى ەل اعالارى قاتىسىپ, قاراپايىم ەڭبەك ادامىنىڭ بۇگىنگى قوعامداعى ورنى, ولارعا دەگەن قۇرمەتتى ارتتىرۋ تۋرالى وي-پىكىرلەرىن ورتاعا سالدى.
كونفەرەنتسيا باعدارلاماسى اياسىندا پاۆلودار, ەكىباستۇز قالالارى مەن باياناۋىل اۋدانىندا 10-نان اسا ءىس-شارا وتكىزىلدى. قاتىسۋشىلار ەكىباستۇز قالاسىنداعى ءبىلىم بەرۋ مەكەمەلەرىن ارالاپ, ق.ساتباەۆ اتىنداعى ينجەنەرلىك-تەحنيكالىق ينستيتۋتىنىڭ ستۋدەنتتەرىمەن كەزدەستى. سونداي-اق «سامعاۋ» ورتالىعىنىڭ جانە «بوگاتىر» كومىر كەنىشىنىڭ جۇمىسىمەن تانىستى. ال باياناۋىل اۋدانىندا دەلەگاتتار ءماشھۇر ءجۇسىپ كوپەەۆ كەسەنەسىندە, ش.ايمانوۆ اتىنداعى مەكتەپ-ينتەرناتتا, ءوڭىردىڭ كيەلى نىساندارى مەن مۋزەيلەرىندە بولدى. بۇعان قوسا كونفەرەنتسيا قوناقتارى وبلىس ورتالىعىنداعى قابانباي باتىر اتىنداعى «جاس سارباز» وبلىستىق مامانداندىرىلعان ليتسەي-مەكتەبىنە بارىپ, جاس كۋرسانتتارمەن كەزدەستى.
پاۆلودار وبلىسى