مادەنيەت جانە اقپارات مينيسترلىگىنىڭ قولداۋىمەن روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمى ەلوردادا «Kóshpendiler áýeni» II حالىقارالىق ەتنيكالىق مۋزىكا فەستيۆالىن وتكىزدى, دەپ حابارلايدى Egemen.kz.
جوبانىڭ ماقساتى – تاريحى تەرەڭگە جايىلعان ونەر, ەجەلگى سالت-ءداستۇر ارقىلى تۇركى حالىقتارىنىڭ بىرلىگى مەن رۋحانياتىن ۇلىقتاۋعا باعىتتالعان تۇركى مادەنيەتىن دارىپتەۋ. فەستيۆال ۇزدىك ونەرپازدار تاجىريبە الماسىپ, ۇرپاقتار ساباقتاستىعىن ناسيحاتتايتىن الاڭعا اينالدى. سونىمەن قاتار, جوبا جاس ورىنداۋشىلاردىڭ كوركەمدىك تالعامىن تاربيەلەۋگە جانە ولاردى ۇزدىك مادەني قۇندىلىقتارعا باۋلۋعا باعىتتالعان.
كونتسەرتتىك باعدارلامادا كورەرمەن فولكلورلىق داستۇرلەرمەن تىعىز بايلانىستى, تۇركى الەمىنىڭ مۋزىكالىق مۇراسىن جاڭا قىرىنان تانىتاتىن ورىنداۋشىلاردىڭ ونەرىن تاماشالادى. سونداي-اق, دالا اۋەندەرىنىڭ بايىرعى ۇلگىلەرى مەن حالىق اندەرىنىڭ زاماناۋي وڭدەلگەن نۇسقالارى, ۇلتتىق اسپاپتارعا ارنالعان تۋىندىلار مەن ورىنداۋشىلىقتىڭ تىڭ فورمالارى ۇسىنىلدى.
فەستيۆالدىڭ العاشقى كۇنى رەسەي فەدەراتسياسىنان «نامعار» توبى (بۋرياتيا), زاكير دۇيشەنبەك (قىرعىزستان) جانە جانىبەك پيازوۆ (قاراقالپاقستان), سونداي-اق وتاندىق «استانا سازى» قازاق مەملەكەتتىك فولكلورلىق ءانسامبلى, «جوشى» ءانسامبلى, «Satzhan Project» توبى, ەدىل قۇسايىنوۆ, قازىبەك ادىكەي, امانجول نىعمەت, ساندجاي الميشەۆ جانە ايحات قازيحان ءوز ونەرلەرىن ورتاعا سالدى.
فەستيۆالدىڭ ەكىنشى كۇنى ارسلانبەك سۇلتانبەكوۆ (تۇركيا), «زافار» توبى (ازەربايجان), رەسەي فەدەراتسياسىنان ەركين الەكسەەۆ (ساحا رەسپۋبليكاسى) جانە ازات بيكچۋرين (باشقۇرتستان), «قورقىت» ەتنو-فولكلورلىق ءانسامبلى, «تۇركىستان» كامەرالىق ءانسامبلى, ەدىل قۇسايىنوۆ جانە سالتانات ەرسۇلتان ونەر كورسەتتى.
ايتا كەتەيىك وسىدان ەكى جىل بۇرىن العاش رەت وتكەن «Kóshpendiler áýeni» حالىقارالىق ەتنيكالىق مۋزىكا فەستيۆالىنە ياكۋتيا, وزبەكستان, قىرعىز رەسپۋبليكاسى, تۇركيا جانە ماجارستان ەلدەرىنىڭ ونەرپازدارى قاتىسقان بولاتىن.