تاياۋدا جۇمىس ساپارىمەن ارقالىققا بارىپ قايتتىق. شالعايدا جاتقان شاعىن قالانىڭ جەراستى قۇبىرلارى كەيىنگى ەكى جىل ىشىندە تۇگەل جاڭارتىلدى. تۇرعىن ۇيلەردىڭ ءبارى ساپالى اۋىزسۋمەن قامتاماسىز ەتىلدى دەگەن جىلى حابار ەستىگەنبىز. سالىپ ۇرىپ قالالىق جىلۋ-ەنەرگەتيكالىق كومپانياسىنا قاراستى سۋ تازارتقىش قۇرىلعىلار ۋچاسكەسىنە جەتكەن بەتىمىز. مەكەمە گورباچەۆ كوشەسىندە ەكەن. كوشە اتاۋىن العاش كورگەندە تىكسىنىپ قالعانىمىز راس. سۋ باسىنداعى ماماننان كوشە جايىن سۇراپ ەدىك, جايباراقات قانا ء«وزىمىزدىڭ گورباچەۆ قوي», دەپ جاۋاپ قاتتى. ء«ا-ءا...» دەدىك تە, ءارى قاراي قازبالاۋدى ءجون كورمەي, اڭگىمە اۋانىن نەگىزگى ماسەلەگە بۇردىق.
سۋ مەكەمەسىندەگى شارۋامىزدى تىندىرىپ العان سوڭ, دالا ولكەسى تاريحى مۇراجايىنا كىرگەنبىز. مۋزەي زالىن ارالاپ ءجۇر ەدىك, گورباچەۆ تاعى الدىمىزدان شىقتى. بىراق فوتوسۋرەتى ءبىز ويلاعان كىسىنىكىنە ۇقسامايدى. مۇنى بايقاعان مۋزەي مامانى: «جەرلەسىمىزدى كوبى كسرو-نىڭ العاشقى جانە سوڭعى پرەزيدەنتى ميحايل گورباچەۆپەن شاتاستىرىپ جاتادى. ال, شىن مانىسىندە, ۆاسيلي گورباچەۆ – وتكەن عاسىردىڭ 60-جىلدارى ارقالىق اۋداندىق اتقارۋ كوميتەتىن باسقارعان كىسى. 1966 جىلى بوراندى كۇنى ەكى بالانى اجالدان امان الىپ قالىپتى. ەندى باسشى بولعان سوڭ, اۋىل-اۋىلدى ارالايدى عوي. سونداي ءبىر ساپارىندا قويشى اۋىلدان ەكى بالانى دەمالىستان قالاداعى وقۋىنا الا كەتەدى. ءوزى, جۇرگىزۋشىسى, ەكى بالا بار, جولدا كولىكتەرى بۇزىلىپ قالادى. ايدالا, ساقىلداعان سارى اياز, اقتۇتەك بوران. سودان اۋدان باسشىسى جۇرگىزۋشىنى كولىكتە قالدىرىپ, ەكى بالانى ەرتىپ كومەك الىپ كەلۋ ءۇشىن جولعا جاياۋ شىعادى. ابىروي بولعاندا, الدارىنان ۇلكەن مايا كەزدەسىپ, ابدەن توڭىپ, قالجىراعان ەكى بالانى جىلى ءشوپتىڭ ىشىنە جاسىرادى دا, «وسى جەردە جاتا تۇرىڭدار. ءبىرازدان سوڭ, كولىكپەن كەلىپ الىپ كەتەمىن», دەپ ءارى قاراي ءوزى جالعىز كەتەدى. الايدا ءسات سايىن جىن سوققانداي قۇتىرىپ ءورشي تۇسكەن اق تۇتەك بوراندا جول تابا الماي اداسىپ كەتەدى. ءوزى دە بالالاردىڭ قاسىندا, جىلى ءشوپتى پانالاپ, بوراننىڭ باسىلۋىن كۇتۋىنە بولار ەدى. الايدا ارلى ازامات كولىكتە قالعان جۇرگىزۋشى ءۇسىپ قالماسا ەكەن دەپ ويلاعان سياقتى. ءوزى قازا بولعانمەن, قويشىنىڭ ەكى بالاسىن اجالدان امان الىپ قالدى. كەيىن ول كىسىنىڭ ەسىمىن ەل ەسىندە ساقتاۋ ءۇشىن ارقالىق تۇرعىندارى ءبىر كوشەگە ۆاسيلي گورباچەۆتىڭ ەسىمىن بەردى. بۇل كوشەنىڭ تاريحى وسىنداي», دەدى.
قوستاناي وبلىسى