سەۋل قالاسىندا وتكەن «Alatau Rise With Kazakhstan» ينۆەستيتسيالىق فورۋمىندا قازاقستان تاراپىنان بىرقاتار ماڭىزدى باستامالار جاريا ەتىلىپ, قر پرەمەر-ءمينيسترى قانات بوزىمباەۆ جاڭا Alatau City جوباسىن تانىستىردى. فورۋمعا قازاقستان تاراپىنان Caspian Group كومپانياسىنىڭ توراعاسى يۋري تسحاي جانە جوبانىڭ ينۆەستيتسيالىق سەرىكتەسى – Alatau City Bank اكتسيونەرى ۆياچەسلاۆ كيم قاتىستى, دەپ حابارلايدى Egemen.kz.
جاڭا قالا الماتى وبلىسىنىڭ اۋماعىندا, ماڭىزدى كولىك دالىزدەرىنىڭ تورابىندا ورنالاسقان. جالپى اۋدانى 88 مىڭ گەكتاردى قامتيدى. قالا تولىقتاي ارنايى ەكونوميكالىق ايماقتىڭ قۇرامىنا ەنگىزىلگەن. مۇندا كورپوراتيۆتىك تابىس سالىعىنان, جەر جانە م ۇلىك سالىعىنان بوساتۋ, سونداي-اق قالا اۋماعىندا ساتىلاتىن تاۋارلارعا نولدىك قوسىمشا قۇن سالىعىن قولدانۋ سەكىلدى اۋقىمدى جەڭىلدىكتەر قاراستىرىلعان.
ەستەرىڭىزگە سالا كەتەيىك, قىركۇيەك ايىندا مەملەكەت باسشىسىنىڭ ارنايى جارلىعىمەن الاتاۋ قالاسىنا دامۋ قارقىنى وزىق قالا دەگەن مارتەبە بەرىلىپ, ونىڭ ستراتەگيالىق باسقارۋ تەتىگى ۇكىمەت قاراماعىنا ءوتتى. ال پرەمەر-ءمينيستردىڭ توراعالىعىمەن قۇرىلعان دامىتۋ كەڭەسى جوبانىڭ نەگىزگى شەشىم قابىلدايتىن ورگانى سانالادى.
قانات بوزىمباەۆ ءوز سوزىندە قازاقستان مەن كورەيا اراسىنداعى سەرىكتەستىككە ەرەكشە توقتالىپ, ەلەكترونيكا, جاڭارتىلاتىن ەنەرگيا كوزدەرى, مەديتسينا, ءبىلىم بەرۋ جانە قالالىق سەرۆيستەردى تسيفرلاندىرۋ باعىتتارىندا بىرلەسكەن جوبالاردى دامىتۋعا زور مۇمكىندىك بار ەكەنىن اتاپ ءوتتى.
«بۇگىندە كورەيانىڭ 800-دەن استام كومپانياسى قازاقستاننىڭ بارلىق وڭىرلەرىندە ەنەرگەتيكا, قۇرىلىس, قارجى, دەنساۋلىق ساقتاۋ, اۆتوكولىك جانە جوعارى تەحنولوگيالار سالالارىندا تابىستى جۇمىس ىستەۋدە. ءبىز بىرلەسكەن جوبالاردى كەڭەيتۋگە, كورەيانىڭ ونەركاسىپتىك جانە ەنەرگەتيكالىق كومپانيالارىن تارتۋعا مۇددەلىمىز. ءوزارا ءتيىمدى ىنتىماقتاستىققا اشىقپىز جانە سىزدەردى ۇلتتىق Alatau City جوباسىنا قاتىسۋعا شاقىرامىز», دەدى ول.
فورۋم اياسىندا قازاقستان مەن كورەيا رەسپۋبليكاسىنىڭ مەملەكەتتىك جانە ىسكەر قۇرىلىمدارى اراسىندا ءوزارا تۇسىنىستىك تۋرالى بىرقاتار مەموراندۋمعا قول قويىلدى. مەموراندۋمدارعا كەلەسى تاراپتار: قر ەنەرگەتيكا مينيسترلىگى مەن GGGI (Global Green Growth Institute); قر كولىك مينيسترلىگى, Korea Airports Corporation (KAC) جانە AAAG; الماتى وبلىسىنىڭ اكىمدىگى مەن RETD كومپانياسى قول قويدى.
سونىمەن قاتار قر عىلىم جانە جوعارى ءبىلىم مينيسترلىگى, كورەيانىڭ عىلىم جانە تەحنولوگيالار ينستيتۋتى (KAIST) جانە Alatau City Bank اراسىندا قازاقستاندا جاڭا ۋنيۆەرسيتەت قۇرۋ جانە دامىتۋ سالاسىندا ىنتىماقتاستىق تۋرالى مەموراندۋمعا قول قويىلدى.
ءىسساپار بارىسىندا قانات بوزىمباەۆ كورەيانىڭ مەملەكەتتىك جانە ىسكەر توپ وكىلدەرىمەن — ۇلتتىق جينالىس دەپۋتاتى پاك حون گىنمەن, ۇلتتىق اسسامبلەيا مۇشەسى مەن سون گيۋمەن, ساۋدا, ونەركاسىپ جانە ەنەرگەتيكا ءمينيسترى كيم دجۋنگ كۆانمەن, سونداي-اق KITA توراعاسى يۋن دجين سيك جانە Young Business Leaders Network باسشىلىعىمەن كەزدەسۋلەر وتكىزدى.
تاراپتار ەكىجاقتى ەكونوميكالىق بايلانىستاردىڭ تۇراقتى دامىپ كەلە جاتقانىن اتاپ ءوتتى. 2024 جىلى كورەيا رەسپۋبليكاسى قازاقستاننىڭ نەگىزگى ساۋدا سەرىكتەستەرى اراسىندا 10-ورىنعا, ال ينۆەستيتسيا كولەمى بويىنشا 3-ورىنعا شىققان. كەزدەسۋلەر ناتيجەسىندە ەكى ەل ءوزارا ءتيىمدى ىنتىماقتاستىقتى تەرەڭدەتۋگە جانە جاڭا بىرلەسكەن جوبالاردى ىسكە اسىرۋعا نيەتتى ەكەنىن مالىمدەدى.