قازاقستان جاستار قۇراماسى وزبەكستانعا قارسى تاشكەنتتە ەكى جولداستىق كەزدەسۋ وتكىزدى. كوماندانىڭ اعا جاتتىقتىرۋشىسى بۇل ويىنداردى قورىتىندىلاي وتىرىپ, ءوز قىزمەتىنەن كەتەتىنىن مالىمدەدى, دەپ حابارلايدى Egemen.kz قازاقستان فۋتبول فەدەراتسياسىنىڭ ءباسپاسوز قىزمەتىنە سىلتەمە جاساپ.
ء«بىز تاشكەنتتە وزبەكستان قۇراماسىمەن ەكى جولداستىق كەزدەسۋ وتكىزدىك. مۇنداي مۇمكىندىك كەزىندە ەكى ويىندىق فورماتتى تاڭدادىق, سەبەبى ءبىزدىڭ جىگىتتەرگە حالىقارالىق تاجىريبە قاجەت. سونىمەن قاتار قۇرامنىڭ الەۋەتىن تەكسەرىپ, بارلىق فۋتبولشىعا ويىن تاجىريبەسىن بەرگىمىز كەلدى», دەدى باپكەر.
الايدا قوس كەزدەسۋ دە ءساتسىز اياقتالدى. باپكەرلىك شتاب ويىنشىلاردىڭ كوڭىل-كۇيىنە اندورراداعى اۋىر جەڭىلىستىڭ اسەر ەتكەنىن بايقاعان.
«جىگىتتەر اندورراداعى ماتچتان كەيىن وزبەكستانعا قارسى العاشقى ويىندا جانكۇيەرلەردى قۋانتقىسى كەلدى. بىراق سوڭعى مينۋتتاردا گول جىبەرىپ, 0:1 ەسەبىمەن ۇتىلدىق. ەكىنشى ويىندا قارقىن الىپ, جىلدام گول سوقتىق, الايدا مۇمكىندىكتەرىمىزدى پايدالانا الماي, تاعى دا جەڭىلىپ قالدىق», دەدى ول.
ەكىنشى ماتچتان كەيىن جاتتىقتىرۋشى كيىم اۋىستىراتىن بولمەدە كومانداعا ءوز شەشىمىن حابارلاعان.
«ويىنشىلارعا كاسىبيلىگى ءۇشىن العىسىمدى ايتىپ, ەۋروپا چەمپيوناتىنىڭ ىرىكتەۋ تۋرنيرىنە ساتتىلىك جانە قازىرگى جاعدايدىڭ تەزىرەك وڭالۋىن تىلەيمىن», دەدى بۇرىنعى اعا باپكەر.